Македонија
Манчевски: Регионална координација за дигитална трансформација
Потребна е регионална координација за дигитална трансформација, изјави министерот за информатичко општество и администрација, Дамјан Манчевски, при обраќање на шестата Меѓународна регулаторна конференција, која се одржува во Охрид во организација на Агенцијата за електронски комуникации.
Манчевски се осврна на активностите што во моментот ги презема МИОА во областа на информатичко-комуникациските технологии.
„Македонија многу бргу ќе ја усвои стратегијата за широкопојасен интернет, како и националната стратегија за сајбер-безбедност. Веќе во октомври ќе ја презентираме и новата долгорочна ИКТ-стратегија. Во соработка со АЕК ги мапиравме белите зони, каде што дополнително ќе инвестираме. За реализација на овие активности имаме силна поддршка од ЕУ како наш стратешки партнер за дигитална трансформација. Граѓаните набргу ќе ги осетат придобивките од ова партнерство. Како што заклучивме и на првиот Дигитален самит за земјите од Западен Балкан, ЕУ ќе го намали роамингот за земјите од регионот. Дополнително, сите шест економии постигнаа согласност за мерката роаминг како дома за своите граѓани кога патуваат во регионот. За ова имаме голема поддршка од еврокомесарката Марија Габриел“, информира министерот Манчевски.
Како што истакна министерот, од особена важност е што и регулаторните агенции се свесни дека сега е вистинско време за рагионална соработка и координирана акција за дигитализација.
„Целта е да им обезбедиме на граѓаните ефикасни, брзи и евтини услуги. Денес, полесно е да ги донесеме услугите до граѓаните, а не граѓаните до услугите. Тоа можеме да го направиме со помош на технологијата. Ова е многу важно за нас, особено затоа што оваа година ќе го ставиме во функција националниот портал за е-услуги, порталот за отворени податоци, а ќе го претставиме и проектот за електронски идентитет на граѓаните“, посочи министерот.
Како што заклучи Манчевски, за целосна дигитализација на Македонија, потребно е вклучување на сите засегнати страни во државата, но и тесна соработка со земјите од регионот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК: ВМРО-ДПМНЕ освои 59 мандати, СДСМ 19, Европски фронт 18, ВЛЕН 13, Левица 6 и ЗНАМ 5 мандати
Државната изборна комисија ги објави првичните резултати за парламентарните избори, а бројките ги потврдија пресметките на партиските штабови.
„На ниво на држава по мандати коалицијата ’Твоја Македонија’ со ВМРО-ДПМНЕ освои 59 мандати, коалиција ’За европска иднина’ со СДСМ 19 мандати. Коалицијата ’Европски фронт’ има 18 мандати, коалиција ВЛЕН 13 мандати, политичка партија Левица 6 мандати и ЗНАМ 5 мандати. Може да се случат некои мали промени да претрпат овие бројки. 94,05 е голем процент на обработени податоци, не верувам дека ќе има некои сериозни промени. Тоа ќе го знаеме веќе утре“, рече претседателот на Државната изборна комисија, Александар Даштевски.
Вечерва почнаа да течат и рокови за приговори за парламентарните избори. Приговори за текот на гласањето може да се поднесат до 19 часот на десетти мај, а приговори за сумирање и утврдување резултати до 23.30 часот исто така на десетти мај.
Македонија
ВМРО-ДПМНЕ ја слави двојната победа, Мицкоски порача: Сите кои што мислеа дека можат да ја уништат Македонија, завршија на буниште
Членовите на партијата ВМРО-ДПМНЕ, заедно со своите симпатизери ја слават победата на претседателските и парламентарните избори на плоштадот во Скопје.
На насобраните луѓе им се обрати лидерот на ВМРО-ДПМНЕ, Христијан Мицкоски.
„Ја ослободивме Македонија. Сите тие кои што мислеа дека можат да ја ограбат Македонија, да ја понижат, да ја уништат, денеска завршија на буниште, а набргу ќе одговараат“, порача тој.
Мицкоски претходно ги повика граѓаните да дојдат на плоштадите низ сите градови на Македонија заедно да ја прослават победата.
Македонија
Ахмети: ДУИ е втора сила во државата
ДУИ е втора сила во државата, изјави вечерва лидерот на интегративците, Али Ахмети.
„Ние Европскиот фронт сме втора сила во државата. Ние всушност го имавме ВМРО-ДПМНЕ како главен противник, затоа што ВМРО многу му помогна на Влен, но разликата помеѓу Европскиот фронт и Влен е преку 30.000 гласови“, рече Ахмети.
Според официјалните податоци на ДИК, ДУИ освои 18 мандати, коалицијата Влен освои 13 мандати.
ВМРО-ДПМНЕ која извои убедлива победа со 59 пратеници и ќе го добие мандатот за формирање Влада, најави дека ќе почне преговори со Влен за коалицирање. Партискиот лидер, Христијан Мицкоски и вечерва повтори дека е време ДУИ да замине во опозиција.