Македонија
Неждет Мустафа: Толку ли вреди интелектуалниот потенцијал на Амди Бајрам за да биде дел од секоја владина коалиција

По одлуката на Амди Бајрам по 11 години поддршка за власта на ВМРО-ДПМНЕ, сега да влезе и во Владата на Зоран Заев, со остра реакција се јави претседателот на Обединетата партија за еманципација на Ромите (ОПЕР), Неждет Мустафа.
„Тоа е човекот што речиси 25 години ги злоупотребува политиката и чувствителните ромски прашања за свои лични цели и интереси, неконзистентен партнер без политичка идеологија, чија максима се само личниот бизнис и богатење газејќи по грбот на уценетите и купените ромски граѓани во сите досегашни изборни циклуси. Личност што изминатите две и пол децении служеше и сè уште служи за потсмев, инспирација за хумор кај медиумите, инспирација за карикатуристите и забавните шоу-емисии. Сликата за него многумина ја изедначуваа со сликата за најголем дел од ромската заедница, што претставува неоправдано понижување на цел еден народ. Нема да биде никаква навреда или критика ако кажеме дека тој всушност беше дворски шут на сите досегашни влади. Почнуваше со додворување кон естаблишментите, пофалби за нивната политика, а целата негова политичка приказна завршуваше со добро познатиот – гол со петица. И тоа не еднаш, туку неколкупати досега. Неговото дејствување никогаш не било политичко, туку манипулативно и измамничко.
Неговите интриги ги почувствуваа Црвенковски, Тупурковски, Груевски, а верувајте, ќе ги почувствува и неговиот нов партнер, актуелниот македонски премиер. Се прашуваме – толку ли вреди интелектуалниот потенцијал на Амди Бајрам за да биде составен дел на секоја владина коалиција? Толку ли е важен неговиот глас во македонското Собрание, без да се процени колку тој чин значи срам, понижување, потценување и деградирање на современата политичко-општествена мисла на Ромите?
Се прашуваме дали со вакви квазиполитичари ќе ги спроведуваме неопходните реформски политики кон кои се стремиме? Класична утопија! Денес сакаме да го пренесеме големото разочарување од овој потег не само на ромските политички партии туку и на најголемиот дел од ромската етничка заедница во Македонија. Каква порака им испраќаме на младите генерации денес? Пораката е дека само со политичка манипулација, со лаги, со вулгарности, со квазиписменост, криминално минато и нечесни постапки можеш да успееш во животот и вечно да опстојуваш на владејачкиот трон.
Денес имаме високообразовани млади генерации Роми кои познаваат странски јазици, кои сакаат да се интегрираат во современите општествени текови, но само доколку им се даде можност и доколку државата сака да го исползува нивното знаење и вештини. Ваквите потези ги обесхрабруваат. Со избор на вакви кадри во највисоките тела на државната политика ние процесите ги враќаме назад наместо да ги туркаме напред. Во 2018 година европските стандарди и вредности никако не можеме да ги постигнеме и спроведеме со ликови како Амди Бајрам. Тоа секому треба да му стане јасно, а пред сè на оние политичари и органи што го направиле изборот токму тој да биде нивни политички партнер.
Гневот и разочараноста од ваквиот потег деновиве е широко распространета во јавноста, кај новинарската фела, кај политичките елити. Да не ги заборавиме неговите свесни реторички испади во јавноста: им се закануваше со затвор и ќотек на новинарите што ја следеа работата на македонското Собрание; искажуваше пцости од собраниската говорница без грам совест за последиците од таа реторика; на митинзите се споредуваше со ловџија кој иронично со морков во раката се закануваше дека ќе го улови сегашниот премиер, а тогашен опозиционер Зоран Заев. „Кока-кола“ личности, како што гордо и без срам себеси се нарекуваше, нам повеќе не ни требаат, ниту на Ромите како етничка заедница, а уште помалку на Република Македониja, вели Неждет Мустафа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Нов пожар избувна кај тетовско Желино

Директорот на Дирекцијата за заштита и спасување, Стојанче Ангелов, попладнево информираше дека избил нов пожар кај тетовско Желино.
Повеќе информации се очекуваат подоцна во текот на денот.
Претходно денеска Ангелов кажа дека нема активни пожари. Тој информираше и дека денеска заминува словенечкиот тим од 61 пожарникар специјализирани за гаснење на шумски пожари, со 18 возила,а утре си оди и чешкиот Блек Хок со седумчлената посада.
Македонија
(Видео) Петрушевски: Кога СДС повторно лажно ќе прашаат за истрагата за Кочани, нека погледнат накај главниот обвинител Коцевски кого го спасија и држат на функција

Кога СДС повторно лажно ќе прашаат за истрагата за Кочани, нека погледнат накај главниот обвинител Коцевски, кого го спасија и го држат на функција, кажа денеска на прес-конференција, Бране Петрушевски, пратеник на ВМРО-ДПМНЕ.
„СДС и главниот обвинител Коцевски, играа пинг-понг во јавноста, се до моментот кога тој требаше да си замине од позицијата, па СДС мораше јавно да истапи и да го брани, за да се спасат себе си. Кога граѓаните се прашуваат до каде е случајот, треба да знаат дека е на линија помеѓу главниот обвинител Коцевски и СДС. Вторите лажно го напаѓаа првиот, за да создадат привид во јавноста, операција која не им успеа затоа што мораа да го бранат во Собрание, да не останат без него“, вели Петрушевски.
Тој додава дека „на фолирањето на СДС му дојде крај. Не додржаа ниту еден месец, па СДС мораше да се соголи, и да покаже дека ќе направат се само главниот обвинител, Љупчо Коцевски, да остане на позиција“.
„Сега е многу очигледно и зошто СДС држеше пресови за Кочани, каде со лажно душегрижништво го напаѓаше ВМРО-ДПМНЕ, а всушност договорени со нивниот обвинител Коцевски, сакаа да креираат хаос. Сите обиди за хаос и сценарија на СДС се изјаловија. Секој може да види каде е вистината, а таа е дека СДС го спаси главниот обвинител Коцевски, кој има задача да ги спасува нив од одговорност, но и да им креира наративи за политички прес-конференции, како во случајот со Кочани“, истакна пратеникот Петрушевски.
Македонија
АМСМ: На Табановце се чека 40 минути, на Богородица и Дојран околу еден час

АМСМ информира дека интензитетот на сообраќај на патните правци надвор од градските средини е зголемен.
„Поради летните одмори се бележи зголемена фреквенција на возила, на ГП Табановце околу 40 минути и ГП Богородица и ГП Дојран времето на чекање за влез е околу 1 час“, велат од АМСМ и додаваат дека на останатите гранични премини од македонска страна, нема подолги задржувања за влез и излез од државата.
Поради изведување на градежни активности на Вијадукт на Сарички дол кој се наоѓа на државниот пат А1 Градско – Прилеп, обиколница на градот Прилеп, државниот пат (од раскрсница кај бензинска станица “ Лукоил” до клучка кај бензинска станица “ Салида “), ќе биде целосно затворен за сообраќај од 03 август (недела) од 07.00 часот до 06 август (среда). Сообраќајот ќе биде пренасочен низ градот Прилеп.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони.