Македонија
Влатко Стефановски и Теодосиј Спасов на Деновите на Свети Кирил во Рим
Вчера во Палата Брачи на Музејот во Рим, во рамки на програмата на манифестацијата „Македонија во чест на Св. Кирил“, се одржа заедничка културно – уметничка програма од страна на Mинистерствата за култура на Република Македонија и Република Бугарија, на која настапија музичките уметници со светско реноме, Влатко Стефановски и Теодосиј Спасов.
На настанот, на кој присуствуваа и министерот за култура на Република Бугарија, Боил Банов, митрополитите на МПЦ Пимен, Јосиф, бискупот Зоран Стојанов и други видни гости, пред присутните се обрати министерот за култура на Република Македонија, Роберт Алаѓозовски, кој го истакна неговото задоволство што со автентичниот концерт на добрите пријатели и светски музичари Влатко Стефановски и Теодoсиј Спасов, го празнуваме Денот на сесловенските просветители Св.Кирил и Методиј и на тој начин се поклонуваме пред нивното грандиозно дело.
„Нашата земја, речиси пет децении преку манифестацијата „Македонија во чест на Свети Кирил” е дел од глобалното одбележување на неуморната работа на словенските просветители, кои преку својата мисија го поврзаа Истокот и Западот и оставија богато духовно наследство за човештвото. Годинава, задоволството на традиционалното празнување во Рим за нашата земја е уште поголемо, зашто го одбележуваме овој ден заедно со нашите пријатели од Република Бугарија, на највисоко институционално ниво. И низ ова заедничко чествување, ја демонстрираме нашата недвосмислена определба за унапредување на добрососедските односи, продлабочување и интензивирање на соработката во културата и во сите други области. Верувам дека владите на двете пријателски земји ќе продолжат заеднички се залагаат за прогресивни општествени процеси кои ќе обезбедат рамноправни европски перспективи за целиот регион“, нагласи Алаѓозовски.
Тој изрази убедување дека и покрај предизвиците во регионот, како и глобалната политичка слика која станува се посложена и претставува предизвик за целото човештво, Македонија и Бугарија, нашите народи, нашите уметници и културни работници, во духот на заедничките светли традиции и богатото културно наследство, ќе бидат достојни на овие предизвици и ќе работат посветено на градење на поубава, заедничка иднина и просперитет за сите наши граѓани, во Европа од 21 век.
„Манифестацијата за одбележување на Денот на Св. Кирил, токму во Рим, е уште една потврда дека културната и религиската разноликост се вистинско богатство и предност на секоја земја.Тие се извор на голем креативен потенцијал и мост на меѓусебно разбирање и почитување. Затоа, нашите напори се и ќе бидат насочени кон воспоставување на вистински културен дијалог, во нашата земја, во регионот а и пошироко, преку кој ќе го сочуваме мирот и стабилноста, ќе ги следиме највисоките идеали на современиот свет и ќе ја испратиме пораката дека Македонија ѝ припаѓа на модерна Европа и е нераскинлив дел од европското семејство“, рече Алаѓозовски.
Според македонскиот министер за култура, Владата и Министерството продолжуваат со политиките на поддршка, заштита и негување на непроценливото културно и духовно наследство што го имаме, како и со поддршка на високите вредности во уметноста и нивна афирмација во светот. Културата не познава граници, рече Алаѓозовски, токму затоа што големите и вистински уметници во практика ги применуваат политиките за културен дијалог и зближување меѓу народите, претворајќи се себеси и нивните дела во мостови за меѓусебно разбирање и комуницирање и платформи за изградба на нови, заеднички културни и естетски вредности.
„Вечерва, во духовното средиште на светската култура и цивилизација, пред нас ги имаме виртуозите Стефановски-Спасов, кои посветија голем дел од нивното творештво градејќи такви мостови на соработка, врвни артисти кои постојано ја истражуваат, ја надополнуваат и ја збогатуваат музичката традиција на двете земји, создавајќи нова богата музичка слика која во светот го проектира духовното богатство на регионот“, истакна Алаѓозовски.
Инаку, во текот на вчерашниот ден, македонската делегација предводена од Претседателот на Владата на Република Македонија, Зоран Заев, оствари средба со Папата Франциск и со државниот секретар Пјетро Паролин, во Светата Столица во Рим. На средбата Претседателот на Владата на Република Македонија Зоран Заев и Папата Франциск разговараа за длабоко вкоренетата традиција на меѓурелигиска толеранција, почитување на разни верски убедувања и негување на верските слободи во Република Македонија. Посебно внимание во разговорот со Папата Франциск Премиерот Заев, посвети на градењето и негувањето на темелна определба на Република Македонија – Едно општество за сите.
Ден претходно, владини делегации на Македонија и Бугарија, предводени од премиерите Заев и Борисов учествуваа на молебенот и на церемонијата на полагање на венец на гробот на Св. Кирил во Базиликата Сан Клементе во Рим. Со црковната служба на македонската православна црква, молебен во чест на Свети Кирил, началствуваше Митрополит Европски Пимен, во сослужение со Митрополит Кумановски и осоговски Јосиф, и Митрополит Тетовски и гостиварски Јосиф. Митрополитот Европски Пимен, после црковната служба одржа беседа за црковното дело на Свети Кирил и за неговиот брат Свети Методиј.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.
Македонија
Проданоски: Експресниот пат Градско-Прилеп ни од далеку не е готов, да ставиме крај на лагите на СДСМ на 8 мај
Тука сме на лице место за да ги разобличиме лагите кои што СДСМ се обидуваат да ги пласираат до јавноста, рече Дејан Проданоски, претседател на ОК на ВМРО-ДПМНЕ Прилеп.
– Овде во Дреновската клисура каде што сме на самиот старт на почетни градежни активности, а за кои што слушнавме дека во 90 % експресниот пат е завршен. Овие се истите лаги исто како оние на почетокот на нивниот мандат кога Фејсбук и Гугл чекаа на граница, истите лаги како фабриката за автомобили во Тетово. Но, македонските граѓани треба да видат и да знаат дека овде на ова место е сам старт на почеток на градежни активности, а не е видлив ниту крајот на она како што тие сакаат да го пласираат. Да не зборувам тука и за третата фаза од експресниот пат за која што има обезбедено средства и за која што можеше исто да биде завршена ако не беа платени пеналите кон компанијата на која што и се бараше рекет за да остане да го гради автопатот и се изгуби значително голем период од изградба на патот и барање на друга компанија, рече тој.
На лагите од СДСМ им нема крај, овие лаги мора да завршат, затоа на 8-ми мај ве повикувам сите да заокружите број 2 за да и ова автопатско решение биде завршено и биде ставено во функција на секој граѓанин на Република Македонија, додаде Проданоски.