Македонија
Димитров на работен појадок со министрите за надворешни работи на земјите членки на ЕУ

Министерот за надворешни работи Никола Димитров кој престојува во тридневна работна посета на Брисел, денес во организација на министрите за надворешни работи на Бугарија и Австрија, учествуваше на работен појадок со министрите за надворешни работи на земјите членки на Европската унија.
Дискусиите на работниот појадок, кој се одржа во рамките на бугарското претседателсво со Советот на ЕУ, претстојното австриско претседавање и во пресрет на Советот за надворешни работи на ЕУ, беа фокусирани на политичките состојби околу евроинтегративните процеси на Република Македонија, имплементацијата на реформската агенда на Владата, како и добрососедските односи.
Димитров ги запозна министрите на земјите членки со постигнувањата на Република Македонија во имплементацијата на внатрешните реформи и унапредувањето на добрососедските односи, како и со плановите на Владата и очекувањата во периодот кој доаѓа. Тој исто така ја истакна потребата од поддршка на земјите членки за усвојување на одлука за почеток на пристапните преговори со Република Македонија, која ќе има значителен придонес во затворањето на сите отворени прашања и успешното спроведување на домашните реформи.
Во таа насока Министерот Димитров истакна: „Имаме шанса во регионот да се натпреваруваме за прашања кои се важни сега, но и во иднина. Имаме историска можност за суштински напредок, но и Европа ќе има вистински бенефит ако ја искористиме оваа можност за добри вести на континентот.”
Во текот на вториот ден од работната посета на Брисел, во Советот на ЕУ, министерот Димитров имаше и билатерални средби со неговите колеги од Данска, Андрес Самуелсен; Романија, Теодор Малешану; Тимо Соини од Финска како и со државниот секретар за европски прашања во португалското МНР, Ана Паула Закариас, британскиот министер за Европа, Алан Данкан, неговиот германски колега Михаел Рот и заменик шефот на кабинет на претседателот на Европската комисија и висок дипломатски советник, Ричард Шостак.
Тој вчера се сретна со високата претставничка Федерика Могерини и со грчкиот министер за надворешни работи, Никос Коѕијас. Работната посета на Брисел продолжува и утре.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.