Македонија
„Глас за Македонија“: МПЦ му помага на Заев да го комплетира пакетот за името

Колку време е потребно владата на Заев да пропадне во гробот, што му го копа на својот народ со заговор, интриги и невидени лаги, прашуваат од политичката партија „Глас за Македонија“, чија претседателка е Солза Грчева.
Оттаму повикуваат на обединување на сите истомислечки сили во земјата и користење на расположивите демократски средства со цел уривање на оваа влада, со што, како што велат, би се спасила Република Македонија.
„Трагикомедијата на Зоран Заев и на неговата влада што ѝ ја приредуваат на Македонија веќе една цела година, секој ден има по еден нов скандалозен чин. Тоа до денес, не му успеало ниту на еден даровит драматург, ниту на еден политичар ‘лидер’. Освен дрското дезинформирање на јавноста за текот на преговорите со Ципрас, за кои ‘лидерот’ не доби дозвола од мнозинството на македонскиот народ, а за кои точните информации ни доаѓаат од југ (при што владата не сфаќа дека тоа е врв на понижувањето), вчера и денес, шокот на македонската јавност е поврзан со Црквата“, се наведува во партиското соопштение.
Притоа од „Глас за Македонија“ велат дека од објавеното писмо на владата упатено до Патријаршијата во Истанбул и од грчките реакции, со метод на, како што велат, вкрстување и редење камчиња во мозаик, сфатиле дека:
1. Владата на една секуларна држава се зафатила со пишување официјални писма до највисоки црковни институции, во случајов, до Вселенската патријаршија (ВП) во Истанбул
2. Премиерот Заев, на пратениците денес им тврдел дека со тоа писмо само го поткрепил писмото на Архиерејскиот Синод на МПЦ-ОА до Вселенската патријаршија, со цел да се реши канонскиот статус на нашата црква, а портпаролот на владата, тврдел дека премиерот не барал промена т.е. елиминација на името (Македонија, македонска).
3. Синодот на МПЦ – ОА, конечно, открил дека пред околу еден месец, испратил писмо до ВП барајќи решавање на својот канонски статус, како Охридска Архиепископија (без МПЦ), значи и тој не се откажал од името, само „го скратил“ за делот МПЦ, но останало историското, канонско име – ОА.
„Дека во случајов, работата на Заев да го комплетира пакетот за името во неговите лични преговори со Ципрас, ја врши и МПЦ, ни разјаснија грчките медиуми. Тие ги пренесоа изјавите на нивните политичари, дека Заев се обврзал да ја елиминира употребата на името и во називот на црквата, која нели, е Македонска Православна Црква“, велат од „Глас за Македонија“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Марш на ангелите во Кочани: Ако нема правда за ангелите, за нивните родители и семејства, нема да има за никој

Правда мора да има, ако не ќе поставиме шатори пред судот и полицијата и нема да дозволиме никој да влегува. Ако нема правда за ангелите, за нивните родители и семејства, нема да има за никој. Ова го порача поддржувач на родителите чии деца загинаа на 16 март во дискотеката „Пулс“ во Кочани.
Тој од својата инвалидска количка го предводеше осумнаесетиот марш на ангелите. Зборувајќи пред Основниот суд во Кочани, ја обвини полицијата дека дваесет минути на влезот во градот, кај ресторанот „Национал“, држела луѓе од други општини затоа што доаѓале да ги подржат кочанчани.
– Без никакво образложение легитимирале, претресувале. И порачувам на цела Влада – помеѓу тие луѓе нема ниту еден терорист, ниту еден нарко дилер, ниту еден криминалец. Тоа се луѓе со душа и срце. Зошто се прави таков притисок, се обидувате ли нешто да скриете. Истрагата „терајте“ ја како што треба. Родителите на починатите веќе немат солзи во очите, изјави поддржувачот на родителите.
Осумнаесетиот марш на ангелите вечерва се одвиваше по истата маршрута како и претходно: Парк на Револуцијата, кафуле „Класик“, Општина, УЈП, полиција, суд, со тоа што вечерва немаше свирежи пред споменатите институции.
Родителите беа доста тивки. Сестра на починато момче во пожарот во „Пулс“ само потсети дека денеска, 16 август, навршија пет месеци откако на 16 март 62 лица ги загубија своите животи.
Македонија
Пожарот што зафати дел над селото Лојане, Општина Липково, во голем дел е локализиран и изгаснат

Пожарот што зафати дел над селото Лојане, Општина Липково, во голем дел е локализиран и изгаснат. Селото е целосно заштитено, а интензитетот на горењето во појасот на боровата шума значително е намален, информира вечерва директорот на Центарот за управување со кризи (ЦУК) Мухамед Али.
Со отворањето на патот за пристап, како што наведува, се овозможи пешадиско дејствување на екипите на „Национални шуми“, што значително придонесе кон ограничување на ширењето на огнот.
– Во акцијата беа ангажирани хеликоптер Бел-412 на МВР, две екипи на Територијалната противпожарна единица Куманово со соодветни противпожарни возила, како и екипи на „Национални шуми“ – Подружница Куманово со специјализирани возила за шумски пожари. Активно учество зема и месното население, чија помош беше од големо значење. Како директор на Центарот за управување со кризи, лично ги координирав активностите на терен, осигурувајќи соработка меѓу институциите и брза реакција за заштита на животите и имотот на граѓаните. Благодарност до сите учесници за професионалниот ангажман и посветеност, нагласи Али.
ЦУК соопшти дека вечерва до 18:00 часот на територијата на цела држава има вкупно 19 пожари на отворен простор, од кои четири се активни, а 15 се изгаснати. Освен пожарот во селата Лојане и Табановце, активни пожари има и во повеќенаменското подрачје „Јасен“, во општина Јегуновце, меѓу селата Рогачево, Јажинце, Долно Орешје, каде се зафатени пасишта и мешана шума и во кумановското село Черкези.
Македонија
На Табановце се чека 40 минути

Зголемена е фреквенцијата на возила во земјава. На граничниот премин „Табановце времето на чекање за излез е околу 40 минути, додека на останатите гранични премини од македонска страна нема подолги задржувања при влез или излез од државата.
Како што информира АМСМ, сообраќајот на државните патишта се одвива непречено, по суви коловози, а интензитетот на патиштата надвор од градските средини е зголемен.
Се препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.