Свет
Руди Џулијани: Трамп веројатно може самиот да се амнестира
Поранешниот њујоршки градоначалник Руди Џулијани предизвика бура на социјалните мрежи тврдејќи дека американскиот претседател Доналд Трамп веројатно може сам да се помилува себеси. Тој одговараше на прашање поврзано со истрагата на Роберт Милер наречена „Рашагејт“ во програмата „Вик“ на Еј-би-си во неделата.
Прашан дали Трамп има моќ да се помилува себеси, личниот адвокат на претседателот тврдеше дека Трамп веројатно има такво овластување додавајќи дека уставот никаде не кажува оти претседателот не може да го стори тоа. Џулијани подоцна призна дека таквата постапка веројатно би довела до импичмент.
Џулијани исто така тврди дека Трамп има овластување да ѝ стави крај на истрагата за него која се фокусира на обвинувањата за дослух меѓу претседателската кампања на Трамп во 2016 година и Русија.
Документот на 20 страници испратен од правниот тим на Трамп до Милер ја истакнува правната стратегија на претседателот и тврди дека Трамп не може да биде обвинет, суспендиран или прогласен за виновен за попречување на правдата бидејќи тој е главен спроведувач на законот во нацијата. Документот исто така тврди дека Трамп може, ако сака, да ја прекине истрага, па дури и да ја искористи својата моќ да амнестира ако така сака.
Коментарите на Џулијани предизвикаа бура на интернет. Многумина ја критикуваа идејата претседателот да ја злоупотребува моќта за помилување, а други беснееја поради двојните стандарди што ги користи неговиот личен адвокат.
Трамп постојано ја напаѓаше истрагата за можен заговор помеѓу неговата кампања и Русија нарекувајќи ја збир од лажни вести и измама.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Убиство и самоубиство во Бјеловар, Хрватска
Во Бјеловар, Хрватска во семејна куќа се пронајдени две починати и едно тешко повредено лице, кое е префрлено во болница. Најверојатно се работи за насилна смрт, а според неофицијални информации, мажот ја убил мајката на неговата жена, а се обидел да ја убие и сопругата која е тешко повредена.
Напаѓачот, според првичните инфрормации се самоубил.
Хрватската полиција засега не ги потврдува неофицијалните информации дека се работи за убиство и самоубиство.
Полицијата дојавата ја добила околу 10 часот, а на местото се врши увид.
Европа
Премиерот Фицо уште е во животна опасност, напаѓачот призна вина
Осомничениот за нападот врз словенечкиот премиер Јурај Цинтула денеска пред Специјализираниот кривичен суд во градот Пежинок призна вина. Состојбата на премиерот Фицо и понатаму е сериозна.
Обвинителството вчера побара притвор за 71-годишниот Цинтула поради евентуално бегство или повторување на кривичното дело. Напаѓачот беше спроведен под силно полициско обезбедување, а ниту на новинарите им беше дозволен влез во Судот.
Премиерот на Словачка, Роберт Фицо на 15 мај беше застрелан во градот Хандалова додека се поздравуваше со насобраниот народ. Цинтула веднаш по нападот е приведен.
Тој се соочува со обвинение за обид за убиство од одмазда, за што е предвидена казна од 25 години до доживотен затвор.
Словачките политичари изјавија дека нападот врз Фицо не е политички мотивиран.
Свет
Русија нема сила повторно да го нападне Киев, изјави Зеленски за АФП
Претседателот на Украина, Володимир Зеленски во интервју за Агенцијата Франс прес (АФП) изјави дека не верува оти Русија има сила повторно да го нападне Киев.
Тие немаат сила за голема офанзива против главниот град, како што имаа на почетокот на инвазијата, посочи Зеленски додавајќи оти главни цели на Кремљ се Харков и Донбас.
Тој ги обвини западните земји што му забраниле да ја нападне Русија со нивното оружје.
„Русите можат да не нападнат на наша територија, тоа е најголемата предност што ја има Русија, но ние не можеме да направиме ништо со западното оружје на нивните вооружени системи лоцирани на руска територија. Немаме право“, вели Зеленски.
Според него, Западот се плаши и од руски и од украински пораз и оваа ситуација ја нарече апсурдна.
„Ние сме во апсурдна ситуација кога Западот се плаши дека Русија ќе ја изгуби војната. А во исто време тие не сакаат Украина да ја изгуби. Затоа што конечната победа на Украина ќе доведе до пораз на Русија и конечна победата на Русија ќе доведе до пораз на Украина“, истакна Зеленски.