Во рамките на посетата на најстариот национален парк во Македонија, Националниот парк Пелистер, министерот за животна средина и просторно планирање, Садула Дураку, ги промовира добитниците на грантови од проектот „Подобрување на управувањето со заштитените подрачја“, меѓу кој е и националниот парк во непосредна близина на Битола.

„Националниот парк Пелистер е еден од осумте проекти за големи заштитени подрачја. Овој проект очекуваме да помогне во препознавање на социјалните и економските придобивки што произлегуваат од заштитата и поодржливото управување со природните ресурси во заштитените подрачја, а истовремено да ги зголеми капацитетите на локалните самоуправи и граѓански организации за управување и промовирање на заштитените подрачја на професионален и одржлив начин“, истакна министерот Дураку во изјава за медиумите, кој дополни дека проектот за НП Пелистер е со буџет од 300.000 американски долари.

Покрај проектот за Пелистер, развиени се уште 7 апликации за големи заштитени подрачја, и тоа за Галичица, Маврово, Дојранското Езеро, Националниот парк Преспанско Езеро и Националниот парк Езерани, исто како и за подрачјето Матка – Водно – Сарај и за заштитеното подрачје Јасен и за Охридско Езеро – Сатеска Река, со предвидени износи од 200.000 до 400.000 евра.

Проектот е финансиран од Европската Унија, преку ИПА II – Секторска оперативна програма за еколошка и климатска акција 2014-2020, а имплементиран од Програмата за развој на Обединетите нации (УНДП) во тесна соработка со Министерството за животна средина и просторно планирање.