Регион
Утре ќе се гласа за недоверба на Ципрас поради договорот со Македонија
Грчкиот парламент започна расправа по барањето за недоверба на владата на премиерот, Алексис Ципрас. Барањето го поднесе лидерот на најголемата опозициска партија, „Нова демократија“, Киријакос Мицотакис, поради договорот со Македонија за новото име на земјата.
Дебатата треба да биде завршена во сабота, во 14 часот по локално време, одлучило претседателството на парламентот, а пренесе новинската агенција АНА.
Мицотакис, поднесувајќи го барањето, ја обвини владата дека со економските и национални прашања раководи на опасен начин и без парламентарен легитимитет. Договорот со македонската влада го нарече штета за националните интереси и конечен удар за Грците кои со години живееле под мерки за строго штедење.
„Ципрас е подготвен да го потпише договорот и да ја обврзе земјата за рамка што ќе не стави пред свршен чин. Интересот за националните прашања не е случаен, туку е намерен избор со цел да се одвлече вниманието од економските проблеми“, смета лидерот на опозицијата.
Паралелно со ваквата вжештена расправа во грчкиот парламент, мала група граѓани уште од рано утрово се собраа пред објектот, во пресрет на централниот собир, најавен преку соцјалните мрежи, кој треба да се одржи денеска со почеток од 20 часот. Имено, Комитетот за борба за грчкиот карактер на Македонија под слоганот „Македонија значи Грција“ организира протести во следните три дена за постигнатиот договор меѓу двете земји.
Барањето за гласање на недоверба на грчката Влада се прифаќа само ако е поддржано со апсолутно мнозинство од вкупно 300 пратеници избрани во парламентот, напоменува грчката агенција.
Владејачката левичарско-десничарска коалиција на Ципрас има 154 места во парламентот од 300 члена, па оттука мали се шансите дека владата ќе падне, оценува „Ројтерс“. Меѓутоа, британската агенција укажува дека доколку парламентот изгласа недоверба на Владата, Ципрас ќе мора мандатот да му го предаде на претседателот на земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Во Јабланица прогласена тридневна жалост: Загинаа 15 лица, се трага по уште исчезнати
Градоначалникот на општина Јабланица Дамир Шабановиќ деновите од недела до вторник ги прогласи за Денови на жалост во врска со трагичната смрт на сограѓанин во природна катастрофа што го зафати подрачјето на Јабланица, пренесува Ал Џезира Балканс.
Деновите на жалост се одбележуваат со спуштање на знамињата на половина копје на зградите на општината и јавните установи основани од општина Јабланица.
Културни, забавни и слични програми нема да се одржуваат на јавни места, а физичките и правните лица кои вршат угостителска дејност, како и локалните медиуми ќе го приспособат своето работење.
Досега на подрачјето на Јабланица и Коњица се пронајдени телата на 15 лица, а по 10 до 15 исчезнати лица се уште се трага.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.
Регион
Страшни детали од поплавите во Босна и Херцеговина, загина трудница, а брачен пар се најдени гушнати
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај. Најмалку 21 лице го загуби животот во поплавите во БиХ, од кои 16 се сметаат за исчезнати.
„Најмалку 16 лица од областа на северна Херцеговина во моментов се водат како исчезнати, откако беше потврдено дека исто толку луѓе загинале само на подрачјето на Јабланица“, изјави премиерот на Федерацијата на БиХ, Нермин Никшиќ.
Затрупани се многу куќи, а утринава пристигна и дополнителна механизација.
Во тек е состанок на кризниот штаб за координација на спасувачките активности, а по него треба да се дознаат подетални информации за состојбата на теренот.
Најтешка е состојбата во Долна Јабланица каде се сомнева дека каменолом ја предизвикал трагедијата во населбата која е целосно затрупана со отпад од гранит.с