Глумци, пејачи, новинири, спортисти, водители и други јавни личности… сите во еден глас праќаат порака „Го сакам градот безбеден“ и со тоа даваат поддршка на новата едукативна активност на РСБСП, која го носи токму овој наслов, а има цел подигнување на сообраќајната култура и свест во секој град и во секое населено место во Македонија.

На овој начин РСБСП со поддршка на јавните личности ги најавува двете значајни активности што ќе се одржат во претстојниот период. Станува збор за кампањата „Недела за безбедност на сообраќајот“ во Охрид и Битола. И двете, со ист наслов, со иста порака и со исто мото: „Го сакам градот безбеден!“

Секојдневно сме сведоци на голем број сообраќајни незгоди и сè почесто доаѓаме до заклучок дека е речиси невозможно да помине едно деноноќие или еден викенд, а да не се случи тешка сообраќајна незгода со повредени или загинати лица. Во Република Македонија во просек годишно речиси 160 лица го губат животот во сообраќајни незгоди, а околу 6.000 лица се тешко повредени. Тоа значи дека на секои два-три дена по еден човек го губи животот во сообраќајна незгода, а по неколку лица на ден се тешко повредени и остануваат со траен инвалидитет како последица на сообраќајна незгода. Сообраќајните незгоди се причина број еден за смртност кај младите лица.

Според РСБСП, брзото возење, возењето под дејство на алкохол, непочитувањето на сообраќајните правила и прописи, неетичкото, некултурно, неодговорно, нетолерантно однесување во сообраќајот, се главните причини за предизвикување сообраќајни незгоди со тешки и фатални последици. За жал, многу често на патиштата и улиците во Република Македонија можеме да видиме возачи што достигнуваат големи и неразумни брзини во или надвор од населено место, возачи што управуваат возило под дејство на алкохол, возачи и патници што не користат безбедносен појас, возачи што користат мобилен телефон за време на возењето итн. Непрописно паркирани возила и пешаци што се движат надвор од тротоарот и кои ја поминуваат улицата таму кај што им е најзгодно има речиси на секој чекор.

Во согласност со тоа РСБСП и сите јавни личности што ја поддржа кампањата „Го сакам градот безбеден“ апелираат на поголема одговорност во сообраќајот, целосно почитување на сообраќајните правила и прописи и почитување на поставената сообраќајна сигнализација. Истовремено прашуваат: Кој е твојот придонес за побезбеден град, за побезбеден сообраќај?

„Да започнеме да ја градиме и да ја менуваме сообраќајната култура почнувајќи секој од себе, преку личен пример и позитивен придонес, за помалу жртви и поголема безбедност на улиците и патиштата“, порачуваат од РСБСП и подржувачите на кампањата. Пред нас е лето, време на одмори и забави, време за нови искуства и нови доживувања, а статистичките податоци и искуствата од минатите години покажуваат дека бројот на настрадани лица во сообраќајни незгоди во летниот период двојно се зголемува. За безбедно лето, за безбеден сообраќај, бидете дел од кампањата „Го сакам градот безбеден“ и дадете го вашиот придонес за побезбеден сообраќај преку целосно и, без исклучок, почитување на сообраќајните правила и прописи, апелираат од РСБСП.