Регион
Ципрас првпат стави вратоврска: Имав потешкотии, но ќе се навикнам
Грчкиот премиер, Алексис Ципрас, го исполни облогот – стави вратоврска. „Имав потешкотии, но ќе се навикнам“, рече Ципрас пред членовите на Владата и додаде дека облозите мора да се исполнуваат.
Инаку, грчкиот премиер вети дека ќе стави вратоврска кога земјата ќе излезе од економската криза. „Денешниот ден им припаѓа на оние што брутално ги погоди кризата и чии животи беа уништени“, истакна Ципрас.
Тој додаде дека по вчерашната одлука за грчкиот долг, Грција дефинитивно врти нова страница. Ципрас истакна дека земјата поминува низ нов период.
„По осум години успеавме да го решиме проблемот со грчкиот долг, долг што не го создадовме, долг што го наследивме од силите на стариот режим. Ја преземавме тешката, но неопходна задача за трансформација на земјата”, истакна тој.
Kредиторите вчера се договорија за начинот на излегување на Грција од програмата за помош, која земјата ја користи веќе осум години, како и за мерките за намалување на долгот.
По состанокот на министрите за финансии на еврозоната во Луксембург, кој траел повеќе од шест часа, извори за „Франс прес“ изјавиле дека новиот договор ќе овозможи, како што претходно било планирано, официјална Атина од 20 август веќе да не биде под покровителство на доверителите и повторно сама да почне да се финансира на пазарите по повеќегодишната длабока рецесија.
Грција во последните осум години доби повеќе од 273 милијарди евра помош од своите доверители, еврозоната и Меѓународниот монетарен фонд (ММФ) преку три програми за помош. За возврат Грците мораа да спроведат стотици реформи, често болни за општеството, особено за да ги залечат своите јавни финансии.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Дете најдено живо по два дена од поплавите во Јабланица под урнатините на семејната куќа
Продолжува борбата на голем број спасувачи за пронаоѓање на живите исчезнати лица по катастрофалната поплава што пред два дена се случи во Јабланица и во околните населени места.
Според официјалните информации, досега животот го загубиле 18 лица, а по голем број се уште се трага.
Сепак се појави и една добра вест, спасувачите пронашле дете под урнатините на неговата семејна куќа. Успеале да го извлечат и итно бил пренесен во болница.
Момчето било пронајдено под плочата тешка два тона која се срушила одозгора.
Регион
Во Јабланица прогласена тридневна жалост: Загинаа 15 лица, се трага по уште исчезнати
Градоначалникот на општина Јабланица Дамир Шабановиќ деновите од недела до вторник ги прогласи за Денови на жалост во врска со трагичната смрт на сограѓанин во природна катастрофа што го зафати подрачјето на Јабланица, пренесува Ал Џезира Балканс.
Деновите на жалост се одбележуваат со спуштање на знамињата на половина копје на зградите на општината и јавните установи основани од општина Јабланица.
Културни, забавни и слични програми нема да се одржуваат на јавни места, а физичките и правните лица кои вршат угостителска дејност, како и локалните медиуми ќе го приспособат своето работење.
Досега на подрачјето на Јабланица и Коњица се пронајдени телата на 15 лица, а по 10 до 15 исчезнати лица се уште се трага.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.