Македонија
Манчевски: Дигитализацијата значително ги намалува можностите за корупција
Еден од главните предизвици во администрацијата и бизнисите во секоја земја е борбата со корупцијата. Човечкиот фактор, па дури јас би рекол и дека човечката природа е генератор на корупција, изјави министерот за информатичко општество и администрација Дамјан Манчевски. Според него, дигитализацијата значително ги намалува можностите за корупција во администрацијата.
„Автоматизираните и дигитализираните процеси не можат да бидат корумпирани. А лошата вест е дека на Балканот имаме проблеми со корупцијата. Но, добрата вест е што решивме дигитално да се поврземе и да ги премостиме инфраструктурните јазови со дигитални решенија. И дигитално да се бориме против корупцијата. Клучен фактор, повторно, е силната волја и определувањето на клучните засегнати страни, заедно со силната поддршка што ја добиваме од нашите партнери“, заклучи министерот Манчевски, кој во рамки на посета на Маракеш, Мароко, се обрати на работилницата на тема: „Постигнувања и предизвици во реформата на јавната администрација во земјите од Западен Балкан“.
Манчевски рече и дека јадрото на промените на нашите општества и на нашите животи е информатичката технологија. Многу земји, рече тој, го направија скокот напред и ги прифатија промените.
„Дигиталната трансформација во администрацијата не е лесна. Тоа е всушност прилично скап потфат. Таа ги зема инвестициите во инфраструктурата, но и во човечките ресурси. Но конечно, имаме свест за важноста од овие промени. Но, конечно, и навистина сум среќен што сите земји од Западен Балкан се на иста линија. Бидејќи само со здружени напори можеме да направиме нешто повеќе за нашите граѓани. Пример за тоа беше Дигиталниот самит во Скопје, каде што истакнавме дека сме обединети во дигиталната трансформација во администрацијата. Дека имаме волја, посветеност и соработка, заедно да ја прифатиме промената“, истакна министерот Манчевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.