Македонија
Турска агенција донираше над 130 компјутери за затворите во Македонија
Дo Управата за извршување санкции денеска пристигна информатичка опрема – донација од турската владина Агенција за соработка и координација – ТИКА, којашто ќе биде распоредена во сите казнено-поправни установи во Македонија.
Станува збор за донација на информатичка опрема за потребите на казнено-поправните и воспитно-поправните установи, од кои 134 компјутери, 88 печатачи, четири скенери и два фотокопира. Опремата ќе биде доделена на сите 12 затвори на територијата на Македонија.
На официјалното примопредавање денеска во казнено-поправниот дом „Идризово“ присуствуваше министерката за правда, Рената Дескоска, придружена од директорот на Управата за извршување санкции, Јовица Стојановиќ, а донацијата ја предаде Ајтекин Ајден, координатор на ТИКА за Македонија. На примопредавањето присуствуваа и директорите на сите КПУ во земјава.
Дескоска изјави дека процесот на подобрување на условите во казнено-поправните домови е веќе почнат.
„Една од целите на Владата е создавање достоинствени услови за извршување на казната затвор, а соработката со други меѓународни институции и партнери во оваа насока е секогаш ценета и добредојдена. Владата инвестира во подобрување на условите во затворите, а ова подобрување се надевам ќе биде забележано и во извештаите во кои оценката за реалната состојба за условите во затворите е загрижувачка“, рече Дескоска.
Таа се заблагодари за помошта која ТИКА ја инвестирала во казнено-поправните домови и во правосудството.
Директорот на Управата за извршување на санкциите, Јовица Стојановиќ, истакна дека со обезбедување на потребната информатичка опрема во казнено-поправните установи значително ќе се подобри ефикасноста при извршувањето на тековните работни задачи во установите и дека таа ќе им служи и на лицата кои ја извршуваат казната затвор.
По завршувањето на примопредавањето, министерката за правда изврши увид на активностите кои ги презема Управата за извршување на санкциите во насока на подобрување на условите и го посети новоизграденото, полуотворено одделение во КПД Идризово.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска има повеќе од двојна предност пред Пендаровски, покажуваат првичните резултати на ДИК
Кандидатката за претседателка, Гордана Силјановска-Давкова од ВМРО-ДПМНЕ има повеќе од двојно водство пред Стево Пендаровски од СДСМ, покажуваат првичните резултати на ДИК.
Од обработените податоци, Силјановска има 148.568 гласа, односно 62,74 отсто, наспроти нејзиниот опонент со 71.906 гласа, односно 30,37 отсто.
ДИК претходно објави дека постигнат е цензусот за претседателските избори.
Македонија
ВМРО-ДПМНЕ има убедлива предност пред СДСМ, покажуваат првичните бројки од партискиот штаб
Од обработени 9,61% од гласовите ВМРО-ДПМНЕ има освоено 20.713 а СДСМ 5.857 глас, покажуваат првичните резултати од аналитичкиот центар на ВМРО-ДПМНЕ.
Така, од партијата анализираат дека ВМРО-ДПМНЕ има убедливо водство пред СДСМ и другите партии на парламентарните избори.
Бројките на партијата досега се: ВМРО – ДПМНЕ – 20.713, СДСМ – 5.857, ДУИ – 7.552, ЛЕВИЦА – 1771, ЗНАМ – 1.552, ВЛЕН – 4.100, ГРОМ – 109.
Потпретседателот на ВМРО-ДПМНЕ, Владо Мисајловски и носител на изборната единица број 2 во изјава за медиумите говорејќи за претседателските избори рече дека Гордана Силјановска Давкова има убедливо водство пред Стево Пендаровски.
Според партиските бројки, од избројани 12.54 осто од избирачките места, Сиљановска-Давкова има освоено 126.678 гласови, додека пак кандидатот на СДСМ, Стево Пендаровски има 51.965 гласови.
Македонија
Али Ахмети од денеска е најголемиот политички губитник, кажа Меџити
Претседателот на Демократското движење и носител на листа на пратениците од коалицијата ВЛЕН во ИЕ 1, Изет Меџити на вечерашната прес-конференција кажа дека ВЛЕН е апсолутен победник во албанскиот кампус.
„Ви благодариме на трпението и отпорот на сите закани. Како што предупредувавме во текот на кампањата, денеска изборниот процес беше се, само не демократски. За жал државните институции кои имаат задача да го гарантираат процесот, денеска повторно се ставија во служба на ДУИ. Се е документирано и во текот на наредните денови ќе ги информираме претставниците на амбасадите, набљудувачките мисии за сите овие настани и другите релевантни инститиции во земјата и странство. За насилството врз гласачкото право ќе се одговоара“, кажа Меџити.
Тој се осврна и за бојкотот на изборите од страна на ДУИ.
„Денеска драги Албанци, партијата којашто владееше со институциите 22 години го покажа своето вистинско лице, маските на крај паднаа. Со бојкото ДУИ за жал се обиде да го врати политичкото организирање на Албанците во Македонија на предполитичко ниво. Партијата која излезе под името Европски фронт го бојкотираше изборниот процес, примитивен и недемократски чин, чин спротивен на секој европски и демократски принцип, чин кој создава горчлива слика за Албанците во светот“, рече Меџити.
Тој јавно го праша Бујар Османи како ќе го оправда бојкотот на изборите и примитивното однесување на денот на изборите утре пред меѓународните партнери.
„Од утре Македонија се подготвува за политичка ротација. Новата влада ќе ја одразува мнозинството на албански гласачи. Со денешниот ден Али Ахмети ја запечати својата конечна изолација од сите релевантни општествени и политички чинители и фактори во државата и меѓународните фактори. Али Ахмети од денеска е најголемиот политички губитник. Заедно со Артан Груби и неговите пријатели кои во оваа кампања демонстрираа само ароганција и насилство, од денеска ќе заврши во политичка изолација од коалициските партнери од опозициските партии од странските амбасадори, од меѓународната заедница, од невладините организации“, кажа Меџити.