Македонија
Заев во Виена: Македонија е голема надеж за Балканот, затоа потребни се мотивирачки пораки од ЕУ и НАТО
Премиерот Зоран Заев во Виена се обрати во австрискиот Институт за меѓународни односи (ОИП), кој заедно со Европскиот фонд за Балканот (ЕФБ) и Балканската советодавна група за политика во Европа, ја организираше дебатата на тема „Кон заедничка европска иднина на Југоисточна Европа – примерот на Македонија“.
„За мене како премиер, но и мојата земја и граѓаните на Република Македонија претставува голема чест да отвориме дебата од стратешко значење за земјата и регионот, за европската иднина на Југоисточна Европа преку случајот со Македонија“, рече Заев во обраќањето додавајќи дека Македонија направила голем скок напред само за една година, од работ на неуспех – кон најголемите аспирации – ЕУ и НАТО.
Премиерот истакна дека чудата се можни кога цврсто веруваме во вредностите, а тоа во случајот со Македонија се европските вредности што, како што рече, биле поттик да се изложи целиот политички кредибилитет и да се работи со транспарентност.
„Кога го потпишавме договорот со Грција за решавање на спорот и стратешкото партнерство поместивме планини и не треба да се сомневаме, тоа беше постигнато со нашата чесна желба за подобра сегашност и иднина на граѓаните на Македонија, регионот, Европа и светот“, рече Заев.
Премиерот посочи дека новата демократска Влада, по 10-годишен режим, влегла во реформска акција за обнова и развој на демократските вредности, владеењето на правото и правдата, безбедноста на граѓаните и нивната економска стабилност и дека покажала лидерство во обидот да ги затвори сите отворени прашања со соседите.
Заев потоа ги соопшти и личните очекувања и, како што рече, очекувањата на граѓаните на Македонија.
„Очекуваме датум за отворање на преговорите со ЕУ. Затоа, повторно тука ја испраќам пораката – Ве молам да продолжите да нѐ поддржувате. Добивањето датум за отворање на преговорите со ЕУ значи подобар животен стандард за граѓаните во Македонија. За регионот тоа ќе значи мотивација за политиката на отворени врати на Унијата. За Европа и светот, тоа ќе значи зајакнување на евро-атлантските перспективи за овој стратешки важен регион, што честопати претставуваше извор на конфликт, но сега тој се трансформира во извор на стабилност, безбедност и перспективи во светски рамки“, истакна Заев.
Како што информираат од владината прес-служба, премиерот, од организаторите на дебатата добил значајна порака, дека сакаат да ја видат Република Македонија како дел од Европската унија и порака оти сега е моментот, по позитивните промени во земјата, државата да отпочне преговори со Унијата.
Во одговорите на прашањата во текот на дебатата, Заев рекол дека очекува позитивен референдум за името, дека Русија и Турција се исто така големи пријатели на Македонија со кои државата ќе продолжи да ја развива економската соработка и дека во врска со мигрантската криза земјава ќе продолжи да постапува во партнерство со ЕУ.
На настанот присуствувале истакнати претставници на научната и универзитетска јавност, на политиката, претставници на дипломатскиот кор, студенти, и граѓани од Македонија кои учат или живеат во Австрија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
По назначувањето на новото раководство, значително е намален бројот на заостанати предмети, велат од Агенцијата за катастар на недвижности
Значително е намален бројот на заостанати предмети во Агенцијата за катастар на недвижности.
Во последните два месеци, бројот на заостанати предмети во подрачните одделенија на Агенцијата за катастар на недвижности е намален за 85%. По назначувањето на новото раководство и по интерната реорганизација, бројката од 5600 нерешени предмети е сведена на само 980 предмети, од кои 300 се тековни и 680 се заостанати предмети.
„Соодветната организација во работењето, грижата за вработените, инвестирањето во човечки ресурси и материјални средства, го дава посакуваниот ефект. Кога дојдов во агенцијата, затекнав повеќе од 5000 нерешени предмети, таа бројка денес е намалена за повеќе од 80%, а без застој се решаваат и тековните предмети“, изјави директорот Живковски.
„Целта на агенцијата да биде вистински сервис на граѓаните, каде тие ќе добијат квалитетна услуга по нормални цени. Во таа насока покрај решавањето на заостанатите предмети, во тек е и процесот на дигитализација на услугите, кој се одвива според планираната динамика. Исто така, наскоро ќе биде спроведено и намалувањето на цените на услугите, што беше најавено минатиот месец. До крајот на годината, Агенцијата ќе презентира уште неколку важни проекти кои ќе овозможат полесен пристап на граѓаните и компаниите до услугите на катастарот“, велат од Агенцијата во нивното соопштение.
Македонија
Претседателката на Собранието на Албанија во посета на Македонија
Претседателката на Собранието на Република Албанија, Елиса Спиропали денеска ќе биде во посета на Северна Македонија.
Според собраниската прес-служба, Спиропали ќе оствари неколку средби. Предвидено е да има тет-а-тет средба со претседателот на Собранието, Африм Гаши, а најавени се и средби со лидерот на ДУИ Али Ахмети и со Талат Џафери, поранешен претседател на Собранието, како и со лидерот на СДСМ Венко Филипче.
По средбата со претседателот на Собранието предвидена е изјава за медиумите.
Македонија
Утрото посвежо, преку денот сончево и релативно топло
Утрото посвежо, преку денот сончево и релативно топло со мала до умерена локална облачност. Ќе дува слаб ветер од јужен правец. Минималната температура ќе биде во интервал од 3 до 12, а максималната ќе достигне од 22 до 29 степени.
Во Скопје утрото посвежо, преку денот сончево и релативно топло. Минималната температура ќе се спушти до 8, а максималната ќе достигне до 27 степени.
Следува период на релативно топло време. Утре ќе се задржи сончево време со мала до умерена облачност и со ниски утрински температури. Во вторник и среда ќе има зголемено наоблачување со локални врнежи од дожд, наместа поројни и со услови за појава на грмежи. Потоа во следните денови времето ќе биде стабилно со пораст на температурата.