Македонија
(Видео) Фрчкоски: Секоја земја може да биде блокирана при влез во ЕУ, сите датуми се условени

Секоја членка која влегува во ЕУ или НАТО постои можност да биде блокирана. Сите гледаат дали се исполнети реформите во правосудството, образованието, безбедноста и по тоа ја судат земјата. Доколку не се задоволуваат стандардите може и да ни го продолжат рокот, но тоа е нормална ситуација која сите земји ја поминуваат, вели за „А1он“ и „Макфакс“, професорот Љубомир Фрчкоски.
-Претпристапните преговори сите земји ги добиваат на ист начин, тие за секоја земја се условени. Може да почнат во септември, декември или јуни, но откако ќе почнат, секоја земја која ги започнува е врзана за многу корисен притисок. Тоа е нешто што со двете раце можеме да го прифатиме, на пример условот – осуда за корупциските дела. Судовите ќе бидат притиснати да донесат одлуки на процесите за корупција, тоа за нас е супер, не е супер само за оние кои ги бранат вмровците, но тоа е нивен проблем, вели Фрчкоски.
Според професорот по меѓународно право, приказните околу тоа дали датумот е условен или не имаат скриена пермиса. Тој вели дека датумот за преговори е апсолутен успех, Македонија тоа го барала и го добила.
-Дали се условни или не, се коментари кои зад себе го кријат концептот на противење на договорот со Грција и на можноста добивањето на датум за преговори како помош за успех на референдум. Тие аналитичари кои го толкуваат овој датум како условен не сакаат да се случи успех на референдумот. Претпристапните услови можеме да ги прегрнеме со двете раце, инаку како стандард тие се еднакви за сите земји. Единствен проблем е тоа кога ќе започнат, дали во септември или во јуни, вели Фрчкоски.
Тој посочува дека вратата на ЕУ е отворена и Македонија влегува, а со тоа се отвораат и претпристапните фондови, пари кои државата ќе ги добие заедно со позитивниот притисок за вршење на темпо на реформите особено оние во правосудството и безбедносните служби кои се од исклчителна важност за земјата.
Во врска со одлуката на претседателот Иванов да не го потпише ратификуваниот договор, Фрчоски вели дека тоа е личен став на претседателот кој размислува во свое име, а не како институција претседател на држава.
– Тоа што претседателот не го потпиша ратификуваниот договор е негов личен став и е еден проблем. Втор проблем е тоа што тој не разликува личен став и институција. Ова е поврзано со неговиот карактер и знаење. Тој како институција е обврзан да го потпише договорот, доколку не го стори тоа го крши Уставот на РМ, вели Фрчкоски.
Според универзитетскиот професор, договорот со Грција во оваа етапа не дозволува претседателот да го блокира Собранието кое мора да ја спроведе својата волја, а во случајот тоа е договорот да биде спроведен.
-Ние ја знаеме позицијата на Иванов, неговото знаење и акал и тоа е судбина, ќе го трпите до кога мора. Мое мислење е дека мора да му се води импичмент и мора да се направи мнозинство да се смени од претседателската функција бидејќи така се брани Уставот. Не е тоа проблем на судир со него, туку тоа што не го почитува Уставот и тоа по трет пат. Првиот е со условеното давање мандат, што не е негова работа, второто е со Законот за јазици и сега со ратификацијата на договорот со Грција, рече Фрчкоски.
Како што вели тој датумите кои Македонија ќе ги добие, ставот околу НАТО и ЕУ ќе помогнат да се создаде позитивна атмосфера со која договорот со Грција ќе помине на референдум.
-Мое лично мислење е дека ќе успееме во тоа и со таков исход мислам дека власта ќе ја придобие опозицијата и заедно со двотретинско мнозинство да се промени насловот на Уставот по што ќе добиеме финално членство во НАТО. Таа етапа е историска за нас и мора да ја изодиме како што треба, вели Фрчкоски.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Поради пожар, целосно прекинат сообраќајот кон граничниот премин Блаце

Министерството за внатрешни работи известува дека поради ширењето на пожарот во близина на Блаце, целосно е прекинат сообраќајот на патниот правец Стенковец-ГП Блаце, во двата правци, а затворен е и граничниот премин Блаце.
„Министерството за внатрешни работи во координација со другите надлежни институции презема мерки за гасење на пожарот“.
Апелираат до граѓаните да не тргнуваат кон ГП Блаце до гасењето на пожарот и нормализирање на сообраќајот, за што соодветно ќе ја информираат јавноста.
Македонија
Граничниот премин Долно Блаце е целосно затворен за влез и излез

Граничниот премин Долно Блаце е целосно затворен за влез и излез во и од Република Северна Македонија (за сите видови возила и лица) соопшти АМСМ.
Сообраќајот на државните патишта се одвива непречено, по суви коловози.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
(Видео) Спасовски: Власта повторно не покажа ниту одговорност, ниту волја за помош за жртвите во Кочани, не гласаа за амандманот на СДСМ

Владата не само што не покажа слух и не го прифати амандманот на СДСМ, истовремено не понуди ниту образложение зошто нема потреба да се прифаќа амандман за помош на семејствата на настраданите во Кочани, потенцираше координаторот на пратеничката група на СДСМ, Оливер Спасовски на денешната прес-конференција откако на амандманската расправа за ребаланс на Буџетот, пратенците од власта не гласаа за амандманот на СДСМ и коалицијата. Амандамот предвидуваше 934 милиони и 340 илјади денари директна помош на семејствата настраданите и на повредените во Кочани, во најголемата трагедија којашто ја зафати Македонија.
Спасовски посочи дека во Буџетот има пари и дека Владата требаше да покаже добра волја и да го прифати амандманот. Тој дури и понуди како пратеничка група ако се прифати овој амандман, тогаш сите останати амандмани коишто ги предложи СДСМ да ги повлечат и да нема расправа, бидејќи како што кажа, СДСМ смета дека нема поважна тема од оваа во моментот во Македонија.
„Достоинствено до крај разговаравме и ги повикувавме пратениците на ВМРО-ДПМНЕ како мнозинство, заедно со пратениците од ЗНАМ и од ВЛЕН да овозможат и заеднички консензуално да го усвоиме амандманот и да покажеме дека знаеме да го цениме приоритетот на граѓаните, да покажеме единство, да покажеме солидарност, нешто што е потребно овие мигови за државата, но напротив претставникот на владата делеше лекции како парламентот не смеел да разговара или да отвора вакви теми“, рече Спасоски.
За амандманот на СДСМ не гласаа и пратениците на ВМРО-ДПМНЕ.
„Навистина не ми е јасно како е можно народните претставници овде како пратеници во законодавниот дом, за работа за којашто се најповикани, а тоа е да покажат дека институциите, секогаш и во најтешките моменти, се тука за било кој граѓанин, а посебно за една ваква трагедија, која што ја зафати државата во претходниот период и од тоа сметам дека мораше сите ние да покажеме малку поголемо чувство на одговорност“, нагласи Спасовски.
При тоа, Спасовски упати апел до Владата и до владеачките партии при креирањето на новиот Буџет за 2026 година, да предвидат финансиски средства коишто би биле доволни за финансиска поддршка на семејствата на загинатите и на повредените во Кочани.
„Нема поважна тема од оваа во моментот во Македонија, нема поважно нешто од 62 млади изгубени животи и од 250 повредени, нема поважно од иднината на еден град, од иднината на истокот на Македонија и ако сакате и од иднината на Македонија“, порача пратеникот Спасовски.