Економија
(Видео) Анѓушев и Манчевски на самит во Виена: Поголема економска соработка меѓу земјите од Западен Балкан

Земјите од Западен Балкан мора да воспостават уште посилни меѓусебни економски односи и да го подигнат нивото на соработка, односно заеднички да работат на промоција на регионот како поволна бизнис-дестинација и на тој начин да ја подигнат атрактивноста за привлекувањеа нови инвестиции, порача заменик-претседателот на Владата задолжен за економски прашања, Кочо Анѓушев, кој заедно со министерот за информатичко општество и администрација, Дамјан Манчевски, учествуваа на работниот состанок на министри за економија, кој како посебна сесија се одржува во Виена, во рамките на Самитот за Западен Балкан.
„Треба да ја подигнеме меѓусебната економска соработка во регионот, пред да соработуваме со земјите од ЕУ. Владата е посветена на унапредување на соработката со сите земји во регионот и сметаме дека преку овој пристап граѓаните во нашите земји и регионот генерално ќе има бенефит. Сите држави во регионот се мали држави, како такви, тие и нивните економии, не се одржливи сами за себе и затоа мора повеќе да соработуваме“, потенцираше Анѓушев.
Анѓушев посочи дека Владата посветено работи на проекти со кои ќе подобри инфраструктурното и енергетското поврзување на земјите во регионот, но и за олеснување на административни процедури за економска соработка помеѓу земјите.
Тој потенцира дека Владата е насочена на изградба на квалитетна инфраструктура, особено на меѓународните транспортни коридори 8 и 10.
Во врска со енергетските проекти Анѓушев истакна дека постои иницијатива за формирање заедничка берза за струја со Република Бугарија, односно спојување на енергетските пазари, со што ќе се влијае на поевтинување на електрична енергија за граѓаните. Изградба на 400 киловолтен далекувод со Албанија и изградба на гасовод со Република Грција се два важни проекта кои Владата ќе ги спроведува, а кои ќе донесат сигурност и конкурентност во снабдувањето со енергенси, дополни Анѓушев.
Зборувајќи за заложбите на Владата за развивање нигитални вештини, министерот Манчевски презентираше неколку проекти и активности на кои се работи во моментов.
„Дигиталните вештини се клучни за да ги задржиме младите во регионот, да работат тука за повисоки плати и да придонесат за економски развој. Преку проектот Младинска гаранција, целта е да се обучат лица од други професии во ИТ-кадри за кус временски период од најмногу една година. Проектот Поврзани училишта, на чие осмислување работиме во моментов, значи креирање дигитални содржини и поврзување на сите училишта во земјата. Во завршна фаза сме и со првиот технолошки парк и создавање инкубатори за мали компании. Ова ќе обезбеди поволна средина и систем за младите да останат во Македонија, да бидат успешни и да придонесат за развој на економијата“, заклучи Манчевски.
Еврокомесарот Хан ја реафирмираше одлуката на Европската комисија дека во 2019 година Република Македонија и Република Албанија ќе почнат преговори за членство во ЕУ.
Самитот за Западен Балкан се организира во рамките на таканаречениот „Берлински процес“, инициран од Сојузна Република Германија, а поддржан од Обединетото Кралство, Франција, Австрија и Италија. За разлика од досегашниот концепт на еднодневна конференција, годинава официјалниот дел се одвива во три дена – денес е Сесијата на Министрите за економија во Виена, на 9 јули – паралелни сесии на Министрите за надворешни работи и на Министрите за внатрешни работи, додека претседателите на Влади се состануваат на 10 јули во Лондон.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
За четири дена доставени повеќе од 2.500 пријави за самовработување

Во салата на киното „Манаки“ во Битола денеска беа презентирани мерките од оперативниот план за вработување за 2025 година.
Пред голем број граѓани претставниците од Министерството за економија и труд, Агенцијата за поддршка на претприемаштвото и Агенцијата за вработување ги презентираа мерките од оперативниот план, со акцент на трите подмерки од мерката за самовработување (претприемаштво), каде што јавните повици се објавени и сите заинтересирани може да се пријават до 20 јуни.
„Со мерките за самовработување на сите невработени лица им даваме финансиска поддршка за отворање сопствен бизнис, која се движи од 7.000 до 10.000 евра, а со здружување две лица од 14.000 до 20.000 евра. Имаме исклучително голем интерес за овој јавен повик и за само четири дена се пријавени повеќе од 2.500 лица. Ги повикувам сите лица што се заинтересирани да се пријават во кој било од 30-те центри за вработување при Агенцијата за вработување во државата“, рече заменик-министерот за економија, Марјан Ристески.
Во рамките на јавните повици од мерката 1, „Поддршка за самовработување (претприемаштво)“, во тек се три јавни повици, со кои им се дава можност на повеќе од 1.700 лица да отворат сопствен бизнис и со нив се предвидени:
– финансиска поддршка во форма на грант до 7.000 евра за основање и почнување бизнис за лица постари од 29 години;
– финансиска поддршка во форма на грант до 10.000 евра за основање и почнување бизнис за млади лица до 29 години;
– финансиска поддршка за здружување две лица во ДОО, каде што таа изнесува од 14.000 до 20.000 евра во зависност од целните групи.
Економија
Укинувањето на царините за стоките од САД не е само трговска одлука, туку и дипломатски чекор, вели Стојанова

Со новите измени и дополнувања на Законот за царинските тарифи, Собранието ќе даде зелено светло на планот на Владата да се намалат царинските давачки на голем број суровини и репроматеријали што се користат во домашната индустрија и во енергетиката, изјави Дафина Стојаноска, пратеничка од ВМРО-ДПМНЕ.
„Списокот со 70-ина производи, кој е составен на транспарентен и инклузивен начин, во соработка со Стопанската комора, вклучува намалување до 50 % на царинските стапки што важат во ЕУ, како и укинување на царините за увоз од САД. Овие измени ќе значат пониски трошоци за домашното производство, а со тоа зголемена конкурентност на странските пазари, нови инвестиции и повеќе вработувања“, рече таа.
Укинувањето на царините за стоките по потекло од Соединетите Американски Држави, пак, додаде Стојаноска, не е само трговска одлука, туку и дипломатски чекор, со кој испраќаме сигнал за зголемена подготвеност за соработка со нашите стратешки партнери и поддршка за слободната трговија.
„Со оваа законска измена македонските компании ќе станат поконкурентни, ќе се намалат цените за производство и ќе се зголеми извозот, со што директно ќе влијае на растот на економијата. Ова е само еден чекор од поширокиот план за економски раст. Клучна измена со која се посветуваме на економијата во пракса, а не само на хартија“, рече Стојаноска.
Економија
Цените на нафтата го забележаа најголемиот скок во последните неколку години поради стравот од војна

Глобалните цени на нафтата пораснаа за повеќе од 4 проценти забележувајќи го најголемиот дневен процентен пораст од март 2022 година поради стравувањата дека потенцијалното проширување на конфликтот на Блискиот Исток би можело да предизвика големи прекини во снабдувањето со енергија.
Цената на „Брент“, меѓународниот референтен стандард, се зголеми за 4,3 проценти, на 72,40 долара за барел, а американската референтна нафта West Texas Intermediate (WTI) скокна за 5 проценти, на 71,40 долар за барел.
Според „Ројтерс“, ова се најголемите еднодневни скокови за двете референтни цени на нафтата од март 2022 година кога почна војната во Украина.
„Остриот пораст на цените на ‘Брент’ ги одразува не само тековните ризици за снабдување туку и растечкото чувство дека потенцијалната ескалација на конфликтот би можела да трае за разлика од претходните краткотрајни епизоди меѓу Израел и Иран“, рече Ахмад Асири, истражувачки стратег во „Пеперстоун“.
Нервозата на пазарите дополнително се потврдува со движењата на американските берзи, пренесува „Танјуг“.