Македонија
Богдановски: Итни реформи на градскиот инспекторат за поголема ефиксност
Итни реформи на градскиот инспекторат за поголема ефикасност, негова транспарентност и достапност до граѓаните за тој да биде вистинска алатка преку која граѓаните ќе можат да ги остварат своите права – се дел од предизвиците што пред себе си ги поставува новиот раководител на Секторот Инспекторат на Град Скопје, Мирослав Богдановски.
На оваа позиција Богдановски доаѓа од Агенцијата за просторно планирање, каде што работел 10 години, а една година бил и директор на Државниот инспекторат за животна средина. Богдановски е магистер по економски науки и долгогодишен активист за заштита на животната средина, активно вклучен во неколку здруженија и иницијативи со искрена желба и амбиција да придонесува за одржлив развој и почиста и поздрава околина.
„Продолжуваме каде што застанавме. Овој мој ангажман во Град Скопје е вистински предизвик, зашто во градот има многу проблеми за решавање. Очигледно е дека ни претстои многу работа, а јас имам желба, верба и поттик за да се подобрат работите и Скопје да биде еден од најеколошките градови во Европа. Искуството што го имам стекнато во Агенцијата за просторно планирање, во Државниот инспекторат за животна средина и како активист за заштита на човековата околина, секако дека ќе го пренесам на оваа нова функција во интерес на нашето Скопје, за што очекувам поддршка и успешна соработка со другите служби во Град Скопје. Најнапред би споменал и тоа дека е потребно да се направи извесна реформа на Инспекторатот, ќе треба да се зголеми бројот на инспектори, а има потреба да се формира и еколошка или комунална полиција со зголемени надлежности. За да се отстранат пречките во работењето со кои се соочува овој Инспекторат, веќе поднесовме иницијативи за промена на одредени закони од областа на патниот сообраќај и од комуналната сфера“, вели Богдановски.
Тој додава дека Инспекторатот во изминатиов период спроведе и конкретни акции за расчистување на јавните површини.
„Во текот на изминативе денови спроведовме акции за расчистување на јавните површини од препродавачите на сезонско овошје и зеленчук. Долгогодишниот проблем, на пример, што постоеше со препродавачите на улицата Брадфордска го решивме, а ги расчистуваме јавните површини и на Бит-пазар и на булеварот Трета македонска бригада. Ваквите акции ќе бидат се почести за да се воведе ред на јавните површини. Во таа смисла и во интерес на граѓаните и на заштитата на околината, во наредниот период ќе се посветиме на делот кај Зелениот пазар, како и на булеварот Никола Карев (Пластичарската улица). Нелегалните препродавачи деновиве постојано ги опоменуваме за да ги отстранат производите од јавните површини, но потоа, доколку тоа не донесе резултат, тогаш ќе преземеме законски мерки. За успешно и ефикасно извршување на работата на инспекторите и на комуналните редари, кои работат во смени, ќе се организира и нивна соодветна едукација“, нагласува Богдановски.
За да се реши долгогодишниот проблем со препродавачите на сезонска стока на јавните површини градскиот Инспекторат во соработка со Секторот за планирање и уредување на просторот, бараат решение со кое на продавачите ќе им се овозможи легално да ја продаваат својата сезонска стока.
„При извршувањето на нашите задачи и обврски планираме да воведеме и современи смарт алатки, како што се дроновите, кои на инспекторите ќе им помогнат да имаат подобар увид врз ситуацијата на теренот. Исто така сакам да нагласам дека го зголемивме и буџетот на Инспекторатот во врска со индикативните мерења кои ќе бидат корисна алатка за инспекторите при проверката на потенцијалните загадувачи. Сакам, исто така, да нагласам дека веќе е воспоставена координација и со МВР за побрза полициска асистенција или интервенција, се разбира, во случај на потреба, кога интервенираат нашите градски инспектори“, вели Богдановски.
Тој додава дека работата на јавните градски претпријатија во наредниот период ќе биде ставена под зголемена контрола од Град Скопје, и дека ќе се проверува нивното доследно извршување на задачите и надлежностите што ги имаат. Комуналните редари, пак, ќе добијат соодветна работна опрема со амблем на Град Скопје со што ќе бидат препознатливи, а се верува дека така ќе им се олесни и извршувањето на нивните задачи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Радев: Преговорите помеѓу Бугарија и Северна Македонија завршија пред две години
Преговорите меѓу Бугарија и Северна Македонија завршија во јули 2022 година, кога двете земји го потпишаа билатералниот протокол по Договорот за добрососедство и соработка, изјави бугарскиот претседател, Румен Радев, кој смета дека нема потреба од посредништво во дијалогот помеѓу Македонија и Бугарија.
Со овие зборови тој одговори на прашање за изјавата на премиерот на Христијан Мицковски, дека е подготвен за преговори со бугарскиот претседател.
Радев посочи дека секогаш бил отворен за дијалог, но мора да се прави разлика меѓу дијалог и преговори.
„Преговорите меѓу Бугарија и Северна Македонија завршија во јули 2022 година, кога двете земји го потпишаа билатералниот протокол по договорот за добрососедство и соработка“, рече Радев, пренесува „Новини.бг“.
Според него, доколку се зборува за дијалог, тој треба да се води меѓу Северна Македонија и Европската комисија и врз основа на преговарачката рамка за Северна Македонија усвоена во исто време.
„Дијалогот е таму, а се работи за условите што мора да ги исполни Северна Македонија, за да можат да почнат преговорите за членство на земјата во ЕУ“, додаде.
Радев истакна дека Бугарија може и треба да помогне во овој процес, за Северна Македонија побрзо и поефективно да ги исполни условите и самоуверено да го тргне својот европски пат.
Македонија
Уште еден земјотрес почувствуван во Македонија
Земјотрес со јачина од 3,6 степени според Рихтеровата скала вечерва е регистриран во близина на граничните премини помеѓу Македонија, Косово и Србија.
Според информациите на ЕМСЦ земјотресот се случил на длабочина од 10 километри, на 9 километри од Врање.
Граѓаните веднаш се огласија на социјалните мрежи и, како што велат, ова е четврти земјотрес од синоќа.
„Добро удри! Немаше нишање, повторно вертикално“, сведочи граѓан на Врање кој го почувствувал потресот, пренесува „Б92“.
„Силно, но кратко“, се дел од коментарите на корисниците на EМСЦ.
Земјотресот бил почувствуван во делови од Македонија, Србија, Косово и Бугарија.
Претходно утрово, земјотрес со јачина од 4 степени според Рихтеровата скала ја погоди јужна Србија, а беше почувствуван и во Македонија и во Бугарија.
Македонија
Огромни гужви на грчко-македонската граница: „Се чека и до три часа“, се жалат граѓани
Колони возила има попладнево на граничниот премин Еврзони од грчка страна, додека голем број македонски граѓани се враќаат од продолжениот празничен викенд кој го поминаа на туристичките места во Грција.
Според информациите од АМСМ, за влез во земјава се чека повеќе од еден час.
Граѓани пак, сведочат дека чекаат и до три часа.
„Колони има до патарина“, се жалат македонските туристи.
Гужви има и на велешката патарина, а колона возила стои во место и на влезот на Гостивар од „Стража“.
Според последните информации, на Табановце времето за чекање веќе е намалено откако претходно денес и таму беше забележано зголемено движење.
(Фото: архива)