Македонија
(Видео) Заев: Со пенкало турнавме режим, со пенкало добивме кандидатски статус
Ви реков дека ќе падне режимот? Падна режимот? Рековме дека ќе бидеме 30. членка на НАТО? Станавме 30. членка на НАТО. Пенкалото нè движи сите нас. Со пенкало турнавме режим и со пенкало добивме кандидатски статус. Ни под точка разно не размислувам дека нема да успее референдумот, одговори премиерот Зоран Заев на новинарско прашање што ако референдумот за промена на името не успее.
Заев од Брисел, откако ја прими поканата од генералниот секретар на НАТО, Јенс Столтенберг, порача дека вербата во договорот со Грција е вербата која им дава сила и убедување дека ќе успеат процесите кои следуваат. „Убеден сум и дека сите политички фактори се за интеграција во НАТО и ЕУ и сите тие сакаат унапредување на соработката со соседите“, рече Заев.
Тој повтори дека е убеден дека огромно мнозинство ќе излезе на референдумот и дека ќе биде исполнет цензусот. Исто така, кажа дека и Грците ќе го поддржат договорот. „Верувам и дека Грција ќе го заврши својот дел од договорот. Правиме голем чекор и Грција прави голем чекор. Договорот е правичен и знам дека ќе донесе само бенефит, прогрес и просперитет и за двете земји и за нивните граѓани. Убеден сум дека не ни требаат 5 или 10 години туку за неколку меесеци граѓаните ќе почувствуваат корист од договорот“, рече Заев.
Претходно, Столтенберг, заедно со поканата за членство во НАТО која му ја врачи на претседателот на Владата, Зоран Заев, симболично му подари и пенкало.
Откако се фотографираа со поканата, Заев го бакна подареното пенкало.
За време на свечената церемонија генералниот секретар на НАТО истакна дека по завршувањето на внатрешните процедури и ратификување на договорот, Македонија ќе седи на иста маса со сојузниците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На полноќ настапува молк пред вториот круг од претседателските и парламентарните избори
На полноќ завршуваат кампањите за вториот круг од претседателските избори и за парламентарните.
Кампањата за претседателските избори започна веднаш по првиот круг од изборите, додека дваесетдневната кампања за парламентарните избори на 18 април.
На полноќ започнува молкот пред изборите, кој завршува со затворањето на гласачките места на 8 мај во 19 часот.
Македонија
Во мај уште еден продолжен викенд
Денеска се одбележува вториот ден на Велигден според православниот календар и е неработен за сите граѓани на земјава.
Овој месец ни престои уште еден неработен ден, а тоа е 24 мај (петок) кога се одбележува „Св. Кирил и Методиј“ – Ден на сесловенските просветители.
За граѓаните од православна вероисповед неработен ќе биде 21 јуни (петок), Духовден, петок пред Духовден.
На 23 мај (четврток) се одбележува Националниот ден на Власите и ќе биде неработен за припадниците на оваа националност, додека 16 јуни (недела) муслиманите во земјвата ќе го слават Курбан Бајрам, а неработен ќе биде првиот ден на Курбан Бајрам.
Македонија
СДСМ: Граѓаните масовно да излезат на изборите на 8 ми мај, се одлучува за иднината
СДСМ ги повикува граѓаните масовно да излезат на изборите на 8 ми мај и да гласаат за Стево Пендаровски за претседател и за пратеничките листи на СДСМ и Коалицијата за европска иднина.
„На 8 мај се одлучува за иднината. Во овој клучен момент државата се наоѓа на крстопат. На една страна е враќање назад кон изолација, конфликти, меѓуетничка нетрпеливост и внатрешни поделби со ДПМНЕ. А на другата, продолжување напред, кон прогресот и просперитетот на Македонија во ЕУ, со СДСМ и Коалицијата за европска иднина“, дополнуваат од СДСМ.
Според нив, на 8 мај постои само една социјалдемократска опција, само една лева прогресивна опција која се вика СДСМ.
„Граѓаните со моќта на својот глас можат да кажат стоп за враќањето во кошмарното минато на поделби и тензии и да испратат јасна и гласна порака на сите ретроградни сили дека во Македонија живеат прогресивни луѓе, кои сонуваат за подобра европска иднина за себе и своите деца“, завршуваат од СДСМ.