Македонија
Ликовна работилница во Домот „11 Октомври“ во спомен на земјотресот во Скопје

Македонско здружение за култура, обичаи и традиции „Гороцвет“, Домот за деца без родителска грижа „11 Октомври“ од Скопје, Здружението на медицински сестри, техничари, акушерки и стоматолошки сестри (ЗМСТА ) и „ИНФЕ Македонија“ во знак на сеќавање и незаборав на 26 јули и жртвите од катастрофалниот земјотрес, денеска ќе организираат добротворен настан.
Од 11 до 13 часот во Домот, уметникот и химанист Живко Поповски – Цветин ќе одржи ликовна работилница за децата. Во рамките на поетската програма поетесата Анита Бошковска ќе ја изведе својата пригодна песна за поетесата Даница Ручигај, која животот го загубила во катастрофалниот земјотрес на 26 јули 1963 во Скопје. Ќе настапат и актерката Аница Бебиќ и новинарката Валентина Ѓоргиевска-Парго.
Целта на добротворниот настан е заедно со децата да се испрати порака за мир, хуманост и солидарност. Со уметничкото украсување и ликовната работилница, која ќе се одржи во дворот на Домот, и со поезијата да се испрати порака да го разубавиме Скопје, секој во својот двор и да се стави акцент на екологијата. Пораката да си помагаме ќе ја испратат медицинските сестри и ќе потсетат дека сестринството одиграло значајна улога во лекувањето на луѓето погодени од земјотресот. Настанот е од отворен карактер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.