Повеќе еколошки здруженија за утре во 11 часот најавија протест на кој ќе побараат заштита на охридското крајбрежје. Тие од Лагадин ќе тргнат во протестна поворка против, како што велат, непланската урбанизација и девастација и по попатни застанувања кај Горица, Св. Стефан и Студенчишко Блато, ќе пристигнат пред Општина Охрид, каде што заедно со граѓаните што ќе се приклучат од Охрид со почеток во 12 часот ќе одржат протестен перформанс.

Мирниот протест, организиран од „Охрид СОС“ и здружението „Стар Лагадин“ и поддржан од „Гоу грин – Биди зелен, фронт 21/42“ и Здружението за заштита на животните и животната средина Е.Д.Е.Н. има цел да го сврти вниманието на институциите и на јавноста кон сериозната опасност Охрид да го загуби статусот светско наследство на УНЕСКО поради уништувањето на крајбрежјето и езерото со хиперурбанизација и развивање масовен туризам во услови на нефункционален и нецелосен колекторски систем.

Во одбрана на можеби најважното и највредно обележје на земјата, еден од нејзините најзначајни заштитни знаци, единственото место со УНЕСКО-статус, организаторите на овој настан бараат да престане префрлувањето на одговорноста меѓу државната и локалната власт и итно преземање на сите потребни чекори за целосно спроведување на шестата препорака на Реактивната мисија на УНЕСКО – прогласување мораториум на сите крајбрежни и урбани трансформации на пoдрачјетo на светскoтo наследствo сè додека не се изработат сите релевантни плански документи и додека не се прифати соодветна правна регулатива и се воспостават ефикасни механизми за контрола.

Преку овој протест граѓаните бараат од Општина Охрид итно да се заложи за прогласување мораториум според препораката на УНЕСКО, како и да се заложи за поништување на општиот акт за с. Лагадин најмалку преку стопирање на сите издадени дозволи за градење и стопирање на издавањето нови и преку известување на Уставниот суд за својата заложба.

Организаторите на овој настан ги повикуваат сите оние што не се согласуваат со урбаното и еколошкото насилство врз Охридскиот Регион да дојдат и заедно преку еден симболичен чин – протестен перформанс – гласно и на повеќе светски јазици да ги повикаат надлежните во одбрана на автентичното природно, културно и амбиентално богатство на Охрид и крајбрежјето.