Македонија
37-годишниот Македонец бил пронајден застрелан во автомобил во Кабул
Триесет и седумгодишен Македонец, кој работел како готвач во Кабул е меѓу тројцата странци кои биле киднапирани и убиени утринава. Според информациите кои што ги пренесуваат светските медиуми, покрај македонскиот државјанин, убиени се и 39-годишен Индиец и 64 -годишен Малезиец кои работеле за француската компанија ,,Содексо”. Според полицијата, станува збор за терористички чин.
Според досегашните информации, тројцата биле киднапирани од нивниот автомобил на пат кон аеродромот. Нивните тела биле пронајдени во областа Мусаи. Ниту една група досега не ја презема одговорноста за убиствата.
Според Бахар Мех, официјален претставник во Министерството за внатрешни работи, тројцата излегле од нивниот службен автомобил во четвртокот изутрина и влегле во приватно возило, по нивна волја. Тоа според него, укажува дека некој што го знаеле помогнал да се испланира нивното киднапирање.Еден час подоцна, биле пронајдени нивните тела.Полицијата го истражува случајот.
До нивните тела биле пронајдени документи за идентификација.
,,Тие биле застрелани во автомобилот”, изјави Бахар Мехр со Министерството за внатрешни работи. Друг портпарол на министерството изјави дека возачот на автомобилот бил испрашуван од полицијата и се третира како можен осомничен.
Хашмат Станакзаи, портпарол на полицијата во Кабул, изјавил дека тројцата странци биле киднапирани од кабулскиот округ 9, на исток од градот, но нивните тела биле пронајдени во јужниот дел на градот.
Тројцата работеле за меѓународна компанија Содексо, која обезбедува храна и угостителски услуги низ целиот свет. Неодамна компанијата победила на тендерот во Париз и ја добила работата во рестораните во Ајфеловата кула. Компанијата ,,Содеко” го потврдила идентитетот на тројцата вработени и изразила ,,тага и шокираност” поради нивната смрт.
,,Во оваа фаза мислиме дека тоа е терористички инцидент”, изјави портпаролот на полицијата, Хашмат Станакзаи за АФП.
Индиската влада го осуди овој инцидент. Индиската амбасада во Кабул е во контакт со авганистанските власти и компанијата каде работеле готвачите.
Киднапирањето е едно од најчестите злосторства во воено разурнатиот Авганистан. Повеќето киднапирања се случуваат заради откуп и на Авганистанци, но и на странци. Убиствата се случуваат време кога авганистанскиот главен град е потресен од зголемен број напади во последниве месеци.
Претходно оваа година шестмина индиски инженери кои работеле во северен Авганистан беа киднапирани заедно со нивниот возач.
Ова е петти македонски државјанин убиен во Авганистан, кој што преку приватна компанија отишол да работи во оваа земја. Во 20 година, четворица македонски државјани беа киднапирани, а потоа и убиени од талибанските милитанти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ: Претходната власт испланирала буџет за половина година, а сега наместо раст Владата враќа нивни долгови
Владата на СДС и ДУИ целосно ги промашила проценките за економијата и сега наместо раст Владата враќа нивни долгови, велат од ВМРО-ДПМНЕ преку соопштение.
„За да видиме каде сме, треба да знаеме од што почнавме или што ни остави претходната Влада предводена од СДС и ДУИ.
Реалноста покажува дека СДС и ДУИ ни оставија институции кои тонат во корупција и криминал, нереално проектиран буџет, нереално проектиран раст. СДС и ДУИ планирале буџет за половина година, а не за текот на цела 2024 година што значи на новата Влада не и оставија никаков простор за маневар.
83 милиони евра од Буџетот ќе се потрошат за отплата на кредитите кон странство што претходната влада на СДС и ДУИ заедно со директорите ги направиле преку јавните претпријатија како Државни патишта, Железници, ЈСП, ЕСМ кои не се во состојба да ги исплаќаат, а за истите се издадени државни гаранции.
И не само ова, туку претходната влада ан СДС и ДУИ целосно ги утнала проценките за раст на економијата кога го креирала Буџетот. Оттука, растот кој сега се очекува не 3,4 проценти, туку 2.1 процент.
Ваква Македонија наследивме. Ова ќе го смениме. Неспособноста завршува со нив, работиме 100 проценти одговорно за твојата иднина!“, се вели во соопштението на ВМРО-ДПМНЕ.
Македонија
Следува период на стабилно и релативно топло време за овој период од годината
Времето утре ќе биде сончево со мала до умерена локална облачност. Ќе дува слаб до умерен, а долж Повардарието засилен ветер од северен правец.
Минималната температура ќе биде во интервал од 9 до 18, а максималната ќе достигне од 19 до 26 степени.
Во Скопје сончево со мала до умерена облачност. Ќе дува умерен ветер од северен правец. Минималната температура ќе се спушти до 14, а максималната ќе достигне до 25 степени.
Следува период на стабилно и релативно топло време за овој период од годината.
Македонија
Сиљановска Давкова се обрати на Свечената академија по повод 11 Октомври – Денот на народното востание
Претседателката Гордана Сиљановска Давкова денеска се обрати на свечената академија по повод 11 Октомври – Денот на народното востание, што под нејзино покровителство се одржа во Музејот на македонската борба за самостојност.
„Во историјата на секој народ постојат периоди на големи премрежја што можат да се пребродат само со храбри одлуки. Таков мрачен период беше Втората светска војна, кога речиси цела Европа беше под фашистичка окупација, и кога Хитлер и неговите сојузници изгледаа незапирливи и непобедливи. Во такви услови, на 11 октомври 1941-та, македонскиот народ посегна по непресушното човеково право на отпор против опресијата, неправдата и окупацијата и храбро, без колебање, ја избра вистинската страна во најголемата војна во историјата на човештвото. 11 октомври е меѓникот што ја одреди нашата иднина, денот кога ние храбро и одлучно се вклучивме во антифашистичката коалиција на слободољубиви и правдољубиви народи.
Херојската борба против фашизмот нè сплоти, нè прероди и ни даде легитимитет како народ да се самоопределиме и да создадеме слободна македонска држава на Првото заседание на АСНОМ. Како еден од најголемите демократски триумфи на човештвото, антифашизмот ни овозможи на историската сцена да настапиме рамноправно и со чиста совест да учествуваме во обновата на разрушениот свет. Не случајно, македонската држава за која копнееја Илинденците и за која се изборија антифашистите, трае веќе 80 години. Нејзината сегашност и нејзината иднина се сраснати со нејзиното минато“, рече Сиљановска Давкова.
„Нас никој не нѐ ослободи. Сами се ослободивме со помош на над 110-илјадната Народноослободителна војска на Македонија. Нам никој не ни ја подари државата. Сами се изборивме за неа. За нас, антифашистичката беше и истовремено и народноослободителна војна во која дадовме 24.000 жртви.
Затоа, ние не смееме да дозволиме историски ревизионизам и релативизирање на народноослободителната и антифашистичка борба, бидејќи со тоа би се поткопале илинденските и антифашистичките темели врз кои е изградена македонската држава. Со тоа би се обезвреднила жртвата на илјадници млади борци кои несебично гинеа за слободата и правдината. Ние тоа не смееме да го дозволиме“, изјави Сиљановска Давкова.
Во рамки на Свечената академија настапи Воениот оркестар на Армијата со сплет на македонски патриотски и партизански песни.