Надлежен јавен обвинител од Основното јавно обвинителство за гонење организиран криминал и корупција, постапувајќи по кривичната пријава поднесена од страна на Управата за финансиска полиција, донесе наредба за спроведување истражна постапка против пет лица за кои е поднесен предлог за определување мерки за претпазливост.

Постапката се однесува на поранешниот градоначалник на Карпош, Стевчо Јакимовски, поради злоупотреба на службената положба и овластувањата, како и поради соизвршителство против М.Д., раководител на Секторот за јавни набавки, Н.Н., помошник-раководител на Секторот за финансиски прашања, С.М., раководител на Одделението за норматива во правниот сектор, и А.С., раководител на Одделението за сметководство.

„Надлежниот обвинител до судијата на претходна постапка при Основниот суд Скопје 1 Скопје за осомничените поднесе предлог за определување мерки за претпазливост, и тоа обврска на обвинетите повремено да се јавуваат на определено службено лице или кај надлежен државен орган и привремено одземање на патната или друга исправа за преминување на државната граница, односно забрана за нејзино издавање“, соопшти Обвинителството.

Осомничените се товарат дека ја злоупотребиле својата службена положба и овластувањето во три постапки за јавни набавки, при што двајца сториле кривично дело злоупотреба на службената положба и овластувањето од чл. 353, ст. 5 во врска со ст. 1 во врска со чл. 22 и во врска со чл. 45, а тројца од осомничените за сторено кривично дело злоупотреба на службената положба и овластувањто од чл. 353, ст. 5 во врска со ст. 1 во врска со чл. 45 од Кривичниот законик.