Премиерот Зоран Заев се сретна со претставници на дијаспората од Македонија во Италија, Швајцарија, Луксембург, Германија, Словенија, Хрватска и во САД.

Како што информираат од владината прес-служба, на средбата била изразена поддршка на владините политики за членство на Македонија во НАТО и Европската Унија.

„На состанокот се разговараше за повеќе актуелни прашања, меѓу кои и за важноста на претстојниот референдум и за потребата од поактивна улога на сите граѓани, вклучително и на дијаспората со цел успешен референдум, што ги отвора перспективите на Македонија и можностите за квалитетен живот на сите граѓани“, се наведува во соопштението.

Премиерот Заев истакнал дека НАТО и ЕУ за Република Македонија значат економија, стабилност и безбедност и изразил очекување за успешен референдум.

„Мнозинството граѓани на Македонија веќе се изјаснија за промени, за перспективи наместо изолација, за благосостојба наместо сиромаштија, за реформи и демократија што водат кон квалитетен живот и безбедна иднина на државата и на сегашните и идните генерации. И убеден сум дека на референдумот ќе биде потврдена одлуката за евро-атлантска иднина на Македонија, што ќе донесе и европски живот во Македонија и стабилност и безбедност“, рекол премиерот Заев.

Притоа, тој ги повикал претставниците на дијаспората да излезат на престојниот референдум и со тоа, како што навел, да дадат значаен придонес во историските моменти за напредок на Македонија.

Заев и претставниците на дијаспората зборувале и за придобивките од реформските процеси во државата, од воспоставувањето добри односи со соседите и од евро-атлантските интеграции, а им изразил благодарност за желбата да помогнат вo остварувањето на стратешките цели на државата.