Македонија
(Видео) Градоначалникот на Кисела Вода делумно го поддржа проектот за поставување споменици во општината
Општина Кисела Вода на чело со градоначалникот Филип Темелковски делумно го поддржа проектот на претходната градоначалничка од ВМРО-ДПМНЕ, Билјана Беличанец-лексиќ – „Програма за поставување спомен-обележја“, со кој е предвидено на територијата на општината да се постават 4 споменици во вкупна вредност од 2 милиони и 400 илјади денари.
Градоначалникот на Кисела Вода, Филип Темелковски, за „Макфакс“ вели дека два од четирите споменици мора да бидат поставени бидејќи веќе бил потпишан договор за нив, а евентуалното нивно стопирање би донело многу поголема штета за Општината поради пеналите што следуваат.
„За спомениците на Никола Бадев и Пеце Атанасовски веќе беа потпишни договори и нарачани пред да дојдам јас, поголема штета ќе беше доколку го стопиравме поставувањето на спомениците“, вели Темелковски.
Во однос на другите два споменика кои сè уште не се поставени, актуелниот градоначалник вели дека за нив нема никаков договор и поради тоа, нема да се постават доколку иницијаторите сами не си го дофинансираат проектот, односно тие да ги платат давачките за поставување и изведба на спомениците.
„Два од спомениците се стопирани, ставени се во програмата, но ќе ги исполниме само доколку иницијаторите сами сакаат да си ги финансираат бидејќи беше приватна иницијатива. Доколку не се финансираат од приватни средства, ние како Општина нема да одвоиме дополнителни средства, односно да го потрошиме целосниот буџет за тој проект“, вели Темелковски.
Проектот стартуваше во 2014 година во мандат на ексградоначалничката Беличанец-Алексиќ, а беше планирано да биде завршен во 2019. Спомен обележјата на Никола Бадев и Пеце Атанасовски кои се веќе поставени во паркот „Македонија“ чинат вкупно 1 милион и 200 илјади денари, односно, по 600 000 денари секој.
Во вториот дел од изведбата на проектот е планирано е да се постави споменик на Ангел Димовски, загинат борец од Шпанската граѓанска војна во 1936/37 година, како и спомен-обележје на Атанасе Јорица, поранешен жител на Кисела Вода, пејач и борец за правата на Власите.
Споменикот на Ангел Димовски планрано е да биде поставен на аголот меѓу улицата Божидар Аџија и булеварот Борис Трајковски, каде што постаментот е веќе подготвен, а локацијата за спомен-обележјето на Атанасе Јорица е сè уште непозната.
Како што велат од Општината, изведувачите на двата споменика се избрани по пат на конкурс. Како изведувачи на скулптурата од леена бронза на пејачот Никола Бадев наведени се Елена Рафајловска и Васил Николовски, а зад скулптурата на Пеце Атанасовски, исто така од леена бронза, стои потписот на Димитар Филиповски и Сашо Бајрактаров. Изведувачите на другите две скулптури засега се непознати.
Темелковски вели дека постојат уште неколку проекти започнати од претходната градоначалничка, кои не може да бидат прекинати поради административни работи.
Виктор Јованов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Лашкоска: Обновувањето на шумскиот фонд е дел од приоритетите на локално и национално ниво
Заменик министерката за животна средина и просторно планирање, Ане Лашкоска, денес ја посети Гевгелија каде заедно со градоначалникот, Андон Сарамандов, се приклучија на акцијата за масовно пошумување и подигање на јавната свест „Да пуштиме корени во нашата Гевгелија“ во рамките на која на месноста Топлик, Гевгелија се засадуваа 6000 дрвни насади.
„Министерството за животна средина ги поддржува активностите за пошумување во државата бидејќи тие се значаен ресурс од повеќе аспекти – заштита на биодивезитетот, подобрување на квалитетот на воздухот, климатските промени, заштита од ерозија и свлечишта и се важен економски ресурс“ изјави Лашкоска на настанот потенцирајќи дека обновувањето на шумскиот фонд е дел од приоритетите на локално и национално ниво особено во услови кога сме соочени со многу високи летни температури и со сериозно опожарување на шумите на територијата на целата држава.
Таа упати честитки и благодарност до градоначалникот на Гевгелија, Андон Сарамандов и општина Гевгелија за одлично реализираната акција.
Во рамките на посетата на општина Гевгелија, заменик министерката Лашкоска и градоначлникот Сарамадов направија увид во реализацијата на проектот за намалување на загуби на вода со замена и инсталација на водомери заедно со инсталација и конфигурација на опрема со далечинско отчитување. Проектот го имплементира ЈКПД Комуналец Гевгелија, а е финансиски поддржан од страна на МЖСПП со средства во висина од 5 милиони денари.
Македонија
СДСМ утре на Конгрес ќе избира ново раководство
Социјалдемократскиот сојуз на Македонија утре ќе го одржи 30. партиски Конгрес, на којшто ќе биде избрано новото партиско раководство.
Од опозициската партија известија дека Конгресот ќе има отворен и работен дел, ќе се разговара за идните, нови политики на партијата и ќе биде избрано новото раководство, однсно членовите на највисиките тела во СДСМ – Централниот и Надзорниот одбор.
На почетокот, ќе има обраќање на Венко Филипче, кој пред пет месеци ја презема претседателската функција од неговиот претходник, Димитар Ковачевски по големиот пораз што го претрпе партијата на парламентарните и претседателските избори.
Македонија
ВМРО-ДПМНЕ контра Кузеска: Оваа Влада вложува во модернизација, претходната потроши 5 милиони евра на службени возила
За разлика од ВМРО-ДПМНЕ која што вложува во модернизација, професионализација и осовременување на условите за работа во македонските институции, СДС и ДУИ во своето владеење за службени возила потрошиле повеќе од пет милиони евра, реагира ВМРО-ДПМНЕ на прес-конференцијата на портпаролката од СДСМ, Богданка Кузеска.
„Очигледно на функционерите од СДС изминатите седум години на власт, најважна им била сопствената комоција, а не и реалните проблеми на обичните луѓе“, велат од ВМРО-ДПМНЕ.
Додаваат дека во буџетот за 2025 година предвидено е зголемување на средствата за модернизација на МВР, одбраната, здравството, земјоделието, односно предвидени се зголемени средства за набавка на опрема во сите институции.
Кузеска претходно денес на прес-конференција обвини дека власта ги одби амандманите за поголеми плати, а ќе троши на мебел и скапи автомобили за функционерите.