Дванаесет рудари, номинирани од страна своите работодавци од активните рудници во државата, добија посебни плакети за својата професионална предаденост и постигнатите резултати на свеченоста организирана 11. пат од Министерството за економија по повод Денот на рударите.

„Рударите претставуваат наш бесценет човечки ресурс и должни сме да им обезбедиме што подобри услови за работа“, истакна министерот Бектеши честитајќи им го празникот и додаде дека овој важен стопански сектор, како и придружните што го опслужуваат овој комплекс во нашата земја, бројат над 10.000 вработени.

„Гледано по сектори, рударството и вадењето камен учествува со 8,31 отсто во вкупнато индустриско производство во државата претставувајќи еден од водечките сектори од индустриското производство со големо значење за македонската економија“, рече Бектеши додавајќи дека одредени општини во државата, па и пошироки области, речиси во целост се зависни од работењето на еден рудник.

Претседателот на Македонската асоцијација за рударство, Николајчо Николов, ги поздрави рударите како движечка сила на овој сектор, кој е базата на нашата индустрија, обрнувајќи внимание на потребата од постојано подобрување на нивните услови за работа од страна на работодавците.

Акцентот го стави и на измените на Законот за минералните суровини, предложени од група пратеници во скратена постапка, оценувајќи го како селективен и неприменлив, бидејќи кај законската регулатива секогаш постои можност за подобрување, но со темелна анализа и експертиза. Според Николов, непотребното негативно влијание насочено на рударскиот сектор никому нема да му донесе бенефит, особено затоа што развојот на оваа гранка води до економски раст за државата, а перспективно влијае врз секој сегмент на општеството.