Македонија
(Видео) Ѓорѓиевски:Референдумот е димна завеса за затскривање на криминалите што ги прави СДСМ
,,Денеска заедно со мојот тим сме во Кривогаштани од каде што теренските посети ќе ги продолжиме за Крушево. Од она што можеме да го чуеме кај нашиот народ, јасно и евидентно може да се заклучи која беше причината на СДСМ и Зоран Заев ваков тип на прашање да постават за референдум. Односно вакво сложено прашање коешто содржи три елементи во себе. Знаеме и самите дека според Уставот на Република Македонија, прашањето за референдум мора да е еднозначно и да биде јасно дефинирано. Ние имаме сложено прашање, а причината за сложеното прашање можеме да ја најдеме кај самиот наш македонски народ, откако ќе ги прашаме во дискусиите со нив. Значи тие категорично го негодуваат овој договор, не го прифаќаат и не се согласуваат по однос на истиот”, изјави Орце Ѓорѓиевски, член на ИК на ВМРО-ДПМНЕ.
Според него, под димната завеса што ја фрла СДСМ и нивната влада со овој договор стојат други работи во позадина, стојат криминалите коишто секојдневно ги прават, стојат плаќањето на школување на децата на министрите во странство, стојат заканувањата на актуелните градоначалници ширум Република Македонија, но ние како народ мораме да издржиме и мораме да се спротивставиме на ова зло што се случува моментално во Република Македонија.
,,Освен овие прашања коишто се поврзани директно со референдумот и прашањето како такво за референдумот, ние разговаравме и за актуелната економска состојба и за оние проблеми кои исто така не помалку од прашањето за референдумот ги тиштат нашите сограѓани. Гледаме дека се сочуваме со катастрофа во земјоделието. Имаме 0% пораст на БДП, има нула инвестиции во Република Македонија.Гледаме дека буквално државата ни стагнира на секое ниво. Ова мораме заеднички со нашиот народ да го пребродиме, односно да се спротивставиме на овој режим што владее моментално во Република Македонија. Да го победиме како таков и режимот и ова зло што е надвиснато над Република Македонија и само така како ВМРО-ДПМНЕ заедно со нашиот партнер, со граѓаните ќе можеме Република Македонија да ја вратиме во правилната насока”, рече Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Студено утро со измерени -5 степени во Берово
Најстудено изутринава е во Берово, каде се измерени – 5 степени, по што следуваат Битола и Струмица, -4, Скопје-Петровец и Штип, – 3, Демир Капија, Велес и Куманово, – 2. Во Тетово, Скопје-Зајчев Рид, Кавадарци, Гевгелија, Прилеп, Mаврови Анови и Претор температура од – 1, Крива Паланка, Попова Шапка, 0, Охрид, 1, Виница и Kрушево 2, информира Управата за хидрометоролошки работи (УХМР).
Времето денеска ќе биде променливо облачно со сончеви периоди. Претпладне по одделни котлини ќе има појава на магла. Ќе дува слаб ветер од југоисточен правец. Максималната температура ќе биде во интервал од 6 до 13 степени.
Во Скопје, променливо облачно и тивко со појава на магла. Максималната температура ќе достигне до 7 степени.
УХМР најави дека до вторник ќе се задржи стабилно и претежно тивко време. По одделни котлини ќе има појава на магла и зголемена облачност. Од вторник кон крајот на денот и во следните денови ќе има повремени локални врнежи од дожд. На планините и на повисоките места врнежите ќе бидат од снег.
Македонија
Ќе се менува проводник на далновод во Прилеп, градот неколку часа ќе биде без струја
Прилеп и приградските населби утре претпладне, од 6:30 до 11 часот, ќе останат без напојување со електрична енергија.
Како што информираат од АД МЕПСО, исклучувањето се врши поради планирани активности на електропреносната мрежа, кои опфаќаат демонтажа на старо проводно јаже од 110 киловлти за далноводот ТС Битола 1- ТС Прилеп 1 и монтажа на нов проводник. На замената ќе работат стручните екипи на АД МЕПСО.
Согласно со планираната динамика, работите ќе траат најмногу четири и пол часа, по што напојувањето со електрична енергија во Прилеп ќе биде повторно воспоставено.
Од АД „МЕПСО“ до корисниците апелираат за разбирање, имајќи предвид дека станува збор за планирани зафати од значење за сигурно и стабилно функционирање на електропреносниот систем.
Македонија
Дедо Мраз од Лапонија ќе дојде со волшебен воз на Железничка во Скопје
Специјална новогодишна театарска претстава за деца „Дедо Мраз дојде со воз“ ќе се одржува од денеска 30 декември на Железничката станица во Скопје, со почеток од 19 часот. Претставата ја организираат Училиштето за театар „Од игра до претстава“, Македонски железници Инфраструктура и Македонски железници АД Транспорт.
Публиката ќе може да го следи големото доаѓање на Дедо Мраз од Лапонија, со неговиот волшебен воз во центарот на Скопје, преку приказна која се раскажува на различни локации: музејската постановка на Македонски железници, театарска претстава во салон и посета не волшебниот воз и подарок од Дедо Мраз за секој посетител во вагонот.
– Како куриозитет годинава во соработка со МЖ Транспорт, го имаме и легендарниот воз „Шпанец“, неодамна реставриран, во кој се пренесува новогодишната волшебна магија и со која посетителите ќе може да патуваат низ Скопје и да другаруваат со ликови од претставата. Претставата ги следи патешествијата со кои се соочува Дедо Мраз пред да стигне на Железничката станица во Скопје и неговото доаѓање е неизвесно, па му треба помош од неговите Елени, Џуџиња, Снешко, но најмногу од неговите обожаватели, децата, се вели во соопштението од „Од игра до претстава“, ЈП Македонски Железници – Инфраструктура Македонски Железници АД Транспорт.
Автор и продуцент на проектот е Миодраг Костиќ, а текстот и режијата на Игор Ивковиќ. Реставратор и автор на музејската изложба користена во проектот е дело на авторот Ванчо Милошевски.
Во претставата играат актерите: Дарко Вељиќ, Андреј Серафимовски, Тодор Стојковски, Симона Петрушева, Ведра Димова, Александар Спироски. Вклучени се и 40-тина учениците од училиштето за театар „Од игра до претстава“.
Визуелното обликување на проектот е доверено на Бранкица Јордановска, во соработка со Горан Сачкарски. Музиката е авторско дело на Драган Илиевски, а монтажата е на Андреј Златаноски.
За потребите на претставата, ќе бидат користени: локомотива создадена во 1942 година, серија 33 и вагон што е изработен во 50-те години на 20 век и бил во употреба до крајот на 70-те години, а сега реставриран по урнекот на „ОРИЕНТ ЕКСПРЕС“, како и од неодамна реставрираниот воз „шпанец“ серија 712/714.

Билети може да се купат на билетарницата на Железничка станица – Скопје, секој работен ден од 12 до 19 часот. Резервација на [email protected] и на телефонскиот број 075 295 905.

