Македонија
Заврши Балканската школа за педијатри која за прв пат беше организирана во Скопје
Преку седумдесет еминентни професор и лекари од Македонија, но и од Австрија, Албанија, Бугарија, Србија, Хрватска, Словенија, Австралија, Црна Гора и Турција, беа дел од тридневната Балканска школа за педијатри која беше во организација на Здружението на педијатрите во Македонија.
Балканската школа се одржа во Скопје, во хотелот Александар Палас, а траеше од 12 до 15 септември. Покрај стручните предавања имаше и саем на кој излагачи беа фармацевтски компании. Покрај лекарите – педијатри, стручни предавања имаа и медицинските сестри, како и професионалните физиотерапевти.
На свеченото отворање, кое се одржа на 12 Септември, свое обраќање имаа: министерот за здравство, Венко Филипче, Проф.Др. Валтер Клепетко, директорот на УНИЦЕФ во Македонија Бенџамин Перкс, претседателот на Здружението на лекари Албанци, Невзат Елези, претседателката на Лекарската комора на Македонија,Др. Калина Старделова Гривчева, претседателот на Македонското лекарско друштво, Доц. Др.Горан Димитров, координаторката на Унијата на здруженија на медицински сестри, акушерки и техничари, Гордана Бешлиовска, како и претседателката на Здружението на педијатрите во Македонија, Доц. Др. Аспазија Софијанова. На свеченото отворање поддршка на првата Балканскашкола за педијатри дадоа и премиерот на Република Македонија, Зоран Заев заедно со неговата сопруга, Зорица Заева, како и министерот за информатичко општество и администрација, Дамјан Манчевски.
Школата имаше за цел да поттикне размена на знаења и искуства помеѓу стручниот кадар од Македонија и Европа во областа на педијатријата, за подобрување на секојдневните практики, начин на третирање и протоколи.
Учеството на Балканската школа даде единствена можност лекарите и помошниот медицински персонал одблиску да се запознаат со меѓусебните практики, пречки, но и стимули во секојдневната работа што ќе овозможи надминување на проблемите и создавање на синхронизиран процес на работа.
Свои стручни излагања на оваа школа имаа македонски и странски предавачи коипрезентираа новини во превенцијата, дијагностиката, третирањето и заздравувањето, односно целосниот процес на лечење и закрепнување на пациентите опфаќајќи превентивна педијатрија со имунизација, кардиологија, пулмологија со алергологија, неврологија, гастроентерохепатологија, хематоонкологија како и интензивна нега и реанимација.
На огромна чест на сите учесници свое предавање имаше и познатиот универзитетски професор од Виена, Проф.Др. Валтер Клепетко кој во Светот е познат како хирургот кој му даде втор живот на легендата на Формула 1, Ники Лауда, а пак во Македонија е познат како човекот кој пред две години направи успешна трансплантација на бели дробови кај пациентка заболена од цистична фиброза.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.
Македонија
Утре затворени неколку улици во Скопје
Утре од 08.30 до 12.30 часот, поради одржување на натпревар „Стопански триоги триатлон”, со стартно-целна позиција кај Спортскиот центар „Борис Трајковски” во дел од градот ќе има изменет режим на сообраќај, соопшти СВР Скопје.
Посебниот режим на сообраќај ќе опфати дел од уличната мрежа околу СЦ „Борис Трајковски” и дел од булеварот Илинден (десна коловозна лента), потоа на потегот од крстосницата со булевар 8 Септември до крстосницата со улицата Никола Парапунов и обратно.
Утре исто така со почеток во 09.45 часот, поради одржување на спортско-рекреативен настан „Прв до врв” ќе има посебен режим на сообраќај во делот од градот каде што ќе се реализира манифестацијата.
Настанот почнува пред Музеј на град Скопје – улица Св.Кирил и Методиј, потоа лево по булеварот Св.Климент Охридски, во продолжение право по булеварот Мајка Тереза, па лево по улицата Тодор Александров и по локалниот пат за Средно Водно до врв на Водно („Милениумски крст”).