Македонија
Сугарески: Автопатот Миладиновци – Штип ќе биде комплетно завршен до средината на октомври

Министерот за транспорт и врски, Горан Сугарески, изврши увид во изградбата на автопатот Миладиновци – Штип, при што истакна дека се очекува до средината на месец октомври автопатот комплетно да биде завршен.
Како што информираат од Министерството, Сугарески потенцирал дека изградбата е во завршна фаза и се очекува во многу брзо време овој, како што рекол, капитален проект да биде ставен во функција.
„Денеска со директорот на ЈПДП, Китанов, ја поминавме целата траса и извршивме увид во изградената делница. Со многу забрзано темпо се работи на последните неколку километри, на завршената траса се работи на поставување знаци, табли и одбележување на коловозот. Грешките што ги наследивме ги коригиравме, сите проблеми ги надминавме и на крај имаме квалитетен автопат што ги задоволува сите меѓународни стандарди“, изјави министерот за транспорт и врски.
Сугарески истакна дека иако крајниот рок беше до крај на овој месец, сепак, ќе има незначително пролонгирање поради временските услови во изминатиот период.
Според директорот на ЈП за државни патишта, Зоран Китанов, коj исто така присуствуваше на терен, сите проблеми се надминати и градежните работи ќе завршат според предвидениот договор.
„Сакам да појаснам дека ова пролонгирање од временска дистанца не значи ништо. Градежните работи ќе завршат во предвидениот рок, а потоа во најбрз временски рок ќе ги поставиме знаците и таблите”, изјави Китанов.
Атопатот Миладиновци – Свети Николе – Штип е во должина од 47 километри, а вкупната вредност за изградба е 226 милиони евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Пред велигденските празници ќе бидат достапни сите лекови за онколошките пациенти во количини за наредните 12 месеци“, велат од ВМРО-ДПМНЕ

„СДС повторно шири лаги и манипулации. СДС се препознатливи единствено по неговата навика да користи чувствителни теми за да го има во медиумскиот простор, дури и по цена да бараат тема таму каде што нема“, реагира ВМРО-ДПМНЕ на соопштението на СДСМ.
„Лекови за сите онколошки болни пациенти ќе има. Како што веќе објаснија од надлежните институции, моменталниот недостаток на дел од терапијата за онколошките пациенти е поради промени во системот за јавни набавки и за недела дена, односно пред велигденските празници сите лекови ќе бидат достапни во стабилни количини за наредните 12 месеци.
Оттука го повикуваме СДС да престане да шири паника, лаги и манипулации.
Исто така, потсетуваме дека СДС е партија која ја води Венко Филипче, кој порано бил министер за здравство и кој е директно одговорен за наследената лоша состојбата во македонското здравство.
Кога сме кај грижата на СДС, токму за ваквите пациенти болни од рак, само ќе повториме дека СДС е партија во чие време на владеење на онколошките пациенти наместо терапија им се даваше физиолошки раствор, а скапата терапија завршуваше на црниот пазар“, соопшти ВМРО-ДПМНЕ.
Македонија
Се бара одговорност за илјадниците примероци од правописот кои со години скапувале во несоодветни услови

По информациите дека повеќе од 2600 примерока од Правописот на македонскиот јазик (второ издание, 2017 година) седум години се чувале во несоодветни услови во просториите на НУБ „Св. Климент Охридски“ – Скопје, политичката партија Левица повика на одговорснот.
Скандалот го обелодени актуелниот директор на НУБ – Скопје, така што Секторот за култура при Левица бара одговорност од сите претходни директори на Установата, кои несовесно работеле и ја затаиле некомплетната реализација на проектот: Сенка Наумовска (2017-2018), Фримзим Даути (2018-2021), Јелисавета Костадинова (2021-2022) и Раметула Куќи (2022-2024).
Бидејќи публикувањето на второто издание на Правописот и неговата понатамошна дистрибуција се дел од проект од национален интерес, финансиран од Министерството за култура, партијата бара одговорност и од министрите за култура, чиј проект останал да гние, а за кој била одобрена милионска сума.
Од тука прашуваат кој од Министерството за култура вршел евалуација и мониторинг на проектот, колку Министерството се базира само на наративни извештаи без да излезе на терен и да направи увид во наменското трошење на милионските суми доделени по основ на проекти. Прашуваат и дали ова е потврда плус дека дел од извештаите за реализираните проекти во различните области се фиктивни.
Инаку, наспроти несоодветно истретираните над 2600 примерока, според моменталната евиденција во базата, македонските библиотеки располагаат со само 11 примерока на ниво на Македонија и тоа: по 2 примерока се чуваат во библиотеките во Виница, Тетово и Куманово, еден примерок што не е за зајмување има во Библиотеката во Пехчево, еден примерок што не е за зајмување има на Филолошкиот факултет во Скопје и 3 примерока се чуваат во НУБ „Св. Климент Охридски“ – Скопје.
Претходно вчера беше објавено дека по иницијатива на претседателот на ЗЕЛС, Орце Ѓорѓиевски, во соработка со НУБ ,,Св. Климент Охридски” – Скопје, почнува акција за дистрибуција на примероци од „Правописот на македонскиот јазик“ во сите основни училишта низ државата. Акцијата следи откако во депоата на Националната и универзитетска библиотека „Св. Климент Охридски“ – Скопје беа откриени 2600 примероци од второто издание на Правописот, кои цели седум години не биле дистрибуирани и биле чувани во несоодветни услови, иако првично биле наменети за сите јавни установи и институции, како и за лекторатите и библиотеките во земјава и странство.
Македонија
Алијансата го исклучи од партијата директорот на Геријатрија кој барал мито за да смести неподвижно лице

Алијансата за Албанците го исклучи од партијата Мухсин Арифи, кој е осомничен дека зел мито за да смести неподвижно лице.
Од партијата на министерот за здравство, Арбен Тараври, информираа дека нивниот етички кодекс бара политичките претставници да имаат високи стандарди на морален, правен и професионален интегритет, а членовите на раководните структури да постапуваат во согласност со законот, Програмата и Статутот на партијата, избегнувајќи лични финансиски или материјални придобивки.
Арифи е разрешен и од функцијата претседател на Огранокот Сарај, до донесување конечна одлука од страна на надлежниот суд.
Мухсин Арифи, според истрагата, знаел дека пациентот што требало да се смести во установата бил богат и барал 100.000 евра поткуп. Кога роднината на пациентот рекол дека тоа се многу пари, директорот предложил до сумата да се дојде преку продажба на стан што го поседувал пациентот. По неколку средби, сепак, било договорено роднината да даде 20.000 евра за да го смести болното лице во болницата.