Македонија
Спортските обложувалници „Моцарт“ донираа медицинска опрема за Клиниката за детски болести – Скопје
Денеска во просториите на ЈЗУ Клиниката за детски болести – Скопје беше предадена медицинската опрема што спортските обложувалници „Моцарт“ ја донираат на Клиниката. Медицинските апарати беа набавени од средствата собрани во текот на донаторската кампања која за време на Светското фудбалско првенство 2018 (14 јуни – 15 јули) се одвиваше на сите уплатни места на спортските обложувалници „Моцарт“.
Инаку, се работи за апрати за механичка вентилација во домашни услови наменети за пациенти на кои им треба долготрајна вентилаторна поддршка. Тоа се пациенти со церебрална парализа во поодминатта фаза, како и за пациенти со невромускулни заболувања. Благодарение на овие апарати пациентите ќе можат наместо во болница да престојуваат дома со своите најблиски. Донираните апарати веднаш ќе бидат ставени во функција и ќе може да им го олеснат животот и на децата и на нивните родители.
Цената на еден ваков апарат е околу 550 000 денари.
Од името на спортските обложувалници „Моцарт“ донацијата ја предаде маркетинг-директорот Васко Илијевски, кој особено им се заблагодари на играчите кои ја препознаа важноста на кампањата и во голем број се вклучија во собирањето на средствата.
„Децата се нашето најголемо богатство и секако тие се нашата иднина, а сите ние сакаме таа иднина да биде што посветла. Токму затоа одлучивме и средствата собрани од оваа акција да ги донираме на Детската клиника во Скопје каде се лекуваат нашите мали ангели. За времетраење на акцијата во обложувалниците на ‘Моцарт’ беа собрани вкупно 1.023.596 денари, кои беа искористени за купување медицинска опрема која заедно со Детската клиника беше договорена. Вкупната вредност на медицинската опрема изнесува 1.085.600 денари. Разликата од околу 1 000 евра ‘Моцарт’ ја надополни за да се набави опремата што беше и повеќе од потребна. Би сакал да им се заблагодарам на сите вработени во ‘Моцарт’ , а особено на сите наши играчи без кои акцијата немаше да биде возможно да се спроведе. Тие се ‘највиновни“ што сме денес овде“ – изјави Илијевски.
За важноста на овие медицински апарати и начинот на кој ќе придонесат во работење на Клиниката, зборуваше директорката на Детската клиника, д-р Катерина Ставриќ.
„Еден од основните приоритети на Клиниката е да им се подобри квалитетот на живот на децата кои имаат потреба од долготрајна механичка вентилација и долготрајни престои на одделот за интензивна нега и терапија. Со оваа донација ќе се овозможи, со соодветна обука на родителите, респираторната поддршка да се спроведува во домашни услови каде децата ќе бидат опкружени со своите најблиски. Се надеваме дека децата со церебрална парализа во поодмината фаза и со невромускуларни заболувања ќе имаат најголем бенефит од оваа апаратура, со што ќе се скрати престојот на одделот за интензивна нега и терапија и одделеноста на детето од своите родители.”
Донацијата, која има особено значење за оваа група пациенти, ја поздрави и министерот за здравство, д-р Венко Филипче.
„Клиниката за детски болести доби опрема што е од голема важност во третманот на одредени дијагнози кај децата. Ќе може да бидат лекувани во домашни услови. Благодарност до донаторот и охрабрување за сите со намера и желба за добар гест!“
Донацијата на медицинска опрема за Клиниката за детски болести е само еден сегмент од стратегијата за општествена одговорност на спортските обложувалници „Моцарт“. Со ваквите кампањи обложувалниците „Моцарт“ докажуваат дека освен што се лидер во својата дејност, исто така се стремат да предводат и во доменот на грижа за заедницата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Сервисни информации
Променливо облачно, наместа со повремени врнежи од дожд
Времето денеска ќе биде променливо облачно, наместа со повремени врнежи од дожд. Ќе дува умерен, а долж Повардарието и во источните делови повремено засилен ветер од северен правец. Минималната температура ќе биде во интервал од 4 до 11, а максималната ќе достигне од 14 до 21 степен.
Во Скопје ќе биде променливо облачно со повремени врнежи од дожд. Ќе дува умерен ветер од северен правец. Минималната температура ќе се спушти до 8, а максималната ќе достигне 19 степени.
Во недела и понеделник времето ќе биде претежно сончево и потопло. Во вторник локално ќе има изолирана појава на пороен дожд и ретки грмежи. Под влијание на нов влажен бран во среда и четврток на повеќе места ќе биде нестабилно со пороен дожд и грмежи, локално во форма на невреме.
Македонија
Џафери: Северна Македонија, европска земја со европски вредности и стандарди за сите граѓани
Претседателот на Владата на Република Северна Македонија, денеска присуствуваше и се обрати на гала настанот со кој се одбележува отворањето на новата музичка сцена во Тетово, односно, основањето на најновата институција на Албанците, Националната установа Музички ансамбл на Република Северна Македонија – Тетово.
Основањето на оваа установа претставува реализација на долгогодишното барање на кадрите кои откако ќе завршеа факултет по музика, немаа каде да го продолжат својот професионален пат. Сега, во рамките на оваа установа во која ќе се негува и развива вокалната и инструменталната сериозна музика, како и популарната и џез музика, ќе можат да го негуваат и усовршуваат својот талент и својата пасија сите љубители на овој жанр, соопшти Владата.
Премиерот Џафери имаше свое поздравно обраќање на настанот и притоа, истакна дека „оваа национална културна институција ќе го збогати културниот живот во Тетово, меѓутоа и во земјата“.
Меѓу другото, пЏафери информираше за одлуката на владината седница на предлог на Министерството за култура со која на оваа установа и се доделуваат на трајно користење простории кои се сега во државна сопственост, и додаде дека – „со основањето на Музичкиот ансамбл, придонесуваме кон подобрувањето на демократската рамноправност во нашата заедничка држава, Република Северна Македонија и во оваа област од општествениот живот“.
Македонија
Лукаревска од Кочани: Сакале некои или не, СДСМ ќе биде запишан во историјата како организирана политичка сила која ја врати слободата и ја врати државата на вистинскиот пат
“На 8 мај само вие, со моќта на вашиот глас одлучувате во каква држава ќе живееме сите, ве повикувам на масовен одзив на двојните избори, на активно учество во креирањето на сопствената иднина бидејќи во демократијата најчесто гласовите на оние кои не излегуваат на гласање го одредуваат победникот. На дофат ни е членството во Европската унија, не дозволувајте да не тргнат од тој пат, алтернативата на тој пат е погубна за Македонија. И сакале некои или не, СДСМ ќе биде запишан во историјата како организирана политичка сила која ја врати слободата и ја врати државата на вистинскиот пат и да не забораваме дека секогаш најтешките битки ги водел СДСМ, од осамостојувањето до денес, рече вечерва во Кочани Сања Лукаревска, носителка на листа на СДСМ и Коалицијата за европска иднина во третата изборна единица.
СДСМ е одговорна, граѓанска, државотворна партија. Секогаш сме тука и за државата и за граѓаните и во добро и во лошо, тоа е патриотизам, како што е патриотизам да ја преземете одговорноста за тешките одлуки во тешки времиња, рече Лукаревска.
“ Немам намера да ги покривам или минимизирам нашите пропусти, не ги сокриваме под тепих и не ги подметнуваме на друг и никогаш не сме дозволиле државата да биде на коленици, никогаш. И во оваа изборна програма наш приоритет над приоритетите е стабилна, безбедна, сигурна и просперитетна Македонија чии граѓани ќе имаат предвидлива, спокојна иднина. Следете нè, не се откажуваме, тргнавме по патот на трпението, пат без насилство, со разум, со работа и дијалог до богата држава со задоволни граѓани и затоа на 8 мај, заедно, за број 1 и во Кочани и во третата изборна единица и во целата држава”.