Култура
Почнува манифестацијата Европски денови на културното наследство

Денеска, во 12 часот, во Музејот на Македонија, ќе биде одбележан почетокот на манифестацијата Европски денови на културното наследство. Во таа пригода ќе биде отворена изложбата „Споделување на европското наследство“.
На изложбата ќе бидат поставени дваесетина постери објавувани во повеќе европски земји по повод Европските денови на културното наследство во текот на изминатите дваесет години. Покрај тоа, ќе биде презентиран разновиден промотивен материјал печатен по истиот повод. Автор на концепцијата за изложбата е Нада Андоновска, координатор на манифестацијата.
Европските денови на културното наследство претставуваат нajшироко прифатен партиципативен културен настан што го споделуваат граѓаните на Европа. Сеевропската природа на овој проект придонесува кон зближување на граѓаните и кон истакнување на европската димензија и вредностите на културното наследство. Со организирање повеќе од 70.000 настани во педесетте земји потписнички на Европската конвенција за култура, целта на манифестацијата е подигнување на свеста кај пошироката јавност за заедничкото европско наследство. Во текот на повеќедецениската реализација Европските денови на културното наследство прераснаа во најголем европски проект поврзан со наследството.
Во Република Македонија реализацијата на активности поврзани со овој настан повеќе од дваесет години дава голем придонес кон приближувањето на културното наследство до пошироката публика, особено до помладите генерации.
Годинава е предвиденo мaнифестацијата да се одржи во периодот од 27 септември до 7 октомври. Веќе е познато дека 2018 година е прогласена за Европска година на културното наследство од страна на Европската Унија. Како поддршка на оваа иницијатива годинешното издание на Европските денови на културното наследство ќе биде одбележано со мото „Европска година на културното наследство: Уметноста на споделувањето“. Во годинешното одбележување, во координација на Музејот на Македонија, ќе учествуваат дваесетина музеи, невладини организации и други институции што се грижат за културното наследство. Ќе бидат организирани отворања на изложби, проекции на филмови, промоции на публикации, едукативни настани и други активности посветени на наследството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Љутков од Битола: Почнаа реконструкцијата и адаптацијата на поранешното кино „Партизан“, капитален проект вреден 96 милиони денари

Министерот за култура и туризам Зоран Љутков, заедно со премиерот Христијан Мицкоски и градоначалникот Тони Коњановски, денеска во Битола присуствуваше на отпочнување на реализација на капиталниот проект за реконструкција и адаптација, на поранешното кино Партизан.
Љутков истакна дека проектот, вреден 96 милиони денари, претставува прв сериозен чекор кон новата културна иднина на градот.
„Како што ветив и при мојата неодамнешна посета, денес, во Битоа започнуваме со реализација на капиталниот проект за реконструкција и адаптација, на поранешното кино Партизан вреден 96 милиони денари. Изведувач е битолската компанија „БВ Инженеринг ДООЕЛ“, а надзор врши „ЗИМ“ од Скопје. Реализацијата на проектот е предвидена до крајот на 2026 година“, рече министерот Љутков.
Министерот Љутков истакна дека затекнал нереализирани и закочени проекти, поради што Министерството посветено и системски работело на на откочување на наследените проекти, на нивна правна и финансиска консолидација и, пред сè, на создавање реални услови за нивна вистинска реализација.
„Во изминатиот период посветено, одговорно, фокусирано и системски работевме на откочување на наследените проекти, на нивна правна и финансиска консолидација и, пред сè, на создавање реални услови за нивна вистинска реализација. Затоа ова не е обичен проект. Ова е доказ дека кога има волја – има резултати“, рече Љутков.
Култура
Мицкоски: Да ја вратиме Битола на мапата на значајни културни центри во државата

Премиерот Христијан Мицкоски денеска присуствуваше на почеток на реконструкција на зградата на поранешното кино „Партизан“ во Битола при НУ Народен театар Битола.
„Со вкупна вредност од 96.000.000 денари, проектот претставува значајна инвестиција во културниот развој на нашиот град, а неговата реализација е планирана да заврши до декември 2026 година.
Со вакви проекти продолжуваме да градиме посилна културна инфраструктура и да ја враќаме Битола на мапата на значајни културни центри во државата“, вели Мицкоски.
Култура
Современ перуански филм во Кинотеката

Овој месец Кинотеката го претставува циклусот на современ перуански филм, во организација на Амбасадата на Република Перу во Букурешт, Кинотеката и почесниот Конзулат на Перу во Македонија.
Програмата на оваа прва Недела на перуанскиот филм почнува во четврток, на 19 јуни, со проекција на играниот филм „Кралици“ (Reinas, 2024) во режија на Клаудија Рејнике, а по сценарио на Рејнике и Диего Вега Видал, приказна фокусирана на односот помеѓу еден татко и неговите ќерки, и нивните општествени предизвици во денешно Перу.
Следниот ден, петок (20 јуни), ќе биде прикажан документарниот филм Мисија Кипи (Misión Kipi, 2024) на режисерката Сонали Туеста – трогателен и инспиративен филм во кој главната улога ја има роботот наменет за дружење и социјализација со деца кои поминале низ периодот на изолацијата за време на пандемијата со Ковид-19.
Циклусот завршува во сабота, 21 јуни, со играниот Вкусно сушено овошје (Deliciosa Fruta Seca, 2017) на Ана Каридад Санчез – филм што балансира меѓу фикција и документарен пристап, претставувајќи емотивна приказна жена во седмата деценија на животот соочена со финансиска криза, која го преиспитува својот идентитетот и културното наследство.
Сите три проекции се бесплатни за посетителите.
На отворањето на фестивалот свое обраќање ќе има Директорот на Кинотеката Бошко Грујоски, и почесниот конзул на Перу во Македонија Ненад Јаничевиќ. Добредојдовте на првото филмско патување низ Перу!