Македонија
(Видео) Кризниот штаб против референдумот: Поткупувања и нерегуларности во Битола, Струмица и во Шуто Оризари
Кризниот штаб против референдумот, кој ја предводеше кампањата „Бојкотирам“, на прес-конференцијата, која се одржа во 16 часот, информира дека во текот на денот имало низа нерегуларности во гласањето, особено во Битола, каде што набљудувачите забележале голема раздвиженост на возила со скопски и тетовски регистарски таблички, кои, како што велат, имале цел да ги извадат луѓето на гласање. Исто така, било забележано и поткупување гласачи во струмичкото ромско маало, како и во скопската населба Шуто Оризари.
Според ангажираните 1.646 набљудувачи од страна на Кризниот штаб против референдумот, одѕивот до 10 часот бил околу 3 отсто, во 12 часот – 7,5 отсто, а до 15 часот изнесувал приближно 19 отсто.
– Во штабот на марионетската влада има паника поради слабиот одѕив и се прави очајнички обид да се сменат работите во последен момент. Можеме да кажеме дека референдумот не може да успее оти македонскиот народ и повеќето од граѓаните не сакаат членство во НАТО и не сакаат промена на името, идентитетот, историјата и традицијата на македонскиот народ – изјави потпретседателот на Единствена Македонија, Драган Угриновски.
Угриновски малиот одѕив кај Албанците на денешниот референдум до 17 часот го образложи велејќи дека лидерот на ДУИ, Али Ахмети, во текот на денот имал состанок со премиерот Зоран Заев, на кој побарал на наредните престедателски избори Заев да поддржи кандидат Албанец за претседател, а во спротивно Албанците да ги наполнат гласачките кутии во последните неколку часа од гласањето на местата каде што преовладува албанското население.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.