Македонија
Во Битола одбележан Меѓународниот ден на стари лица
Со желби за добро здравје и длабока старост низ богата културно-уметничка програма, денеска на старите лица згрижени во Домот за стари лица во Битола „Сју Рајдер“, им беше честитан Меѓународниот ден на стари лица. Градоначалничката на општина Битола, поздравувајќи ги сите присутни на денешниот настан, испрати порака до сите граѓани, потсетувајќи на должностите на секој од нас, како важен фактор во создавање услови за квалитетен живот на старите лица.
„Денес е Меѓународниот ден на старите лица, на оние коишто целиот живот претходно се грижеле за нас помладите. Останува ние да им возвратиме со грижа каква што заслужуваат. Секоја власт, локална или централна, треба да работи во таа насока. Демографската слика во државата, за жал, не ни е на завидно ниво, покажува дека населението ни старее. Токму затоа, тоа е причина повеќе во контекст на она што го кажав: Да го вложиме својот максимум за живот на овие простори за да имаме соодветна грижа и за старите лица“, изјави градоначалничката на Општина Битола, Наташа Петровска.
Културно-уметничките програми и другите форми на социјализација претставуваат дел од најзначајните форми низ кои може да им се разубави секојдневието на старите лица, преку посебно влијание врз социјалниот момент.
„Со пригодна програма им овозможивме да си го разубават денот. Нашата институција згрижува околу 160 лица во моментов и грижата е на високо ниво, од сите аспекти: храна, сместување и сè што им е потребно. Добро е што постојат и вакви институции, каде што луѓето се згрижуваат, ја добиваат потребната медицинска заштита и нега, се грижи матичен лекар, се грижат доктори специјалисти и сè она што им е потребно. Најбитен е социјалниот момент затоа ја користиме секоја можност да се социјализираат во општеството, за да не се чувствуваат оставени или запоставени“, изјави Јулијана Котевска, директор на ЈУ Дом за стари лица „Сју Рајдер“ – Битола.
Интересот за згрижување стари лица во „Сју Рајдер“ и понатаму е голем, но со соодветен начин на менаџирање, листите на чекање постепено се намалуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Православните верници го слават Велигден
Православните верници денеска го слават најголемиот христијански празник Велигден – Христовото воскресение, ден кога Исус Христос ја докажал својата божествена моќ и воскреснал од мртвите. Воскресението Христово на полноќ беше објавено во сите храмови на Македонската православна црква, а денеска се одржуваат воскресенски литургии.
Поглаварот на МПЦ-ОА г.г. Стефан богослужеше во Соборниот храм „Свети Климент Охридски“ во Скопје од каде го објави Христовото Воскресение и упати Велигденски пораки.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.