Свет
Момчиња избоделе германски новинар, го поздравиле со нацистички поздрав
Три германски момчиња избоделе локален новинар во источниот град Наумбург, изведувајќи нацистички поздрав по инцидентот. Репортерот се спасил од смртта и покрај раната длабока 6 см, пренесува РТ.
Клаус-Петер Крумлинг, новинар на „Наумбургер тагеблат“, се нашол на погрешно место во погрешно време, објави неговиот весник во вторникот. Крумлинг само што го завршил шопингот во локалниот супермаркет во петокот вечерта кога избила тепачка.
Додека одел кон својот автомобил, новинарот наишол на три момчиња, а едното од нив го плукнало и му покажало среден прст. Навреден од непристојниот гест, Крумлинг му се спротивставил на момчињата, по што бил нападнат. Еден од тинејџерите го прободел новинарот во стомакот, а друг го поздравил со нацистичкиот поздрав. Но Крумлинг дури подоцна сфатил дека бил избоден со нож.
„Дури подоцна во автомобилот забележав дека стомакот ми е влажен и дека се станува црвено”, изјави тој.
Крумлинг се вратил дома и ја повикал полицијата пред да биде однесен во болница. Се чини дека тој за малку ѝ избегал на смртта зашто раната му била длабока6 см, но, за среќа, не се покажала како опасна по живот.
Наумбург, град со околу околу 30.000 жители, се наоѓа во источната држава Саксонија-Анхалт. Источниот дел на Германија неодамна преживеа бран екстремно десничарски демонстрации поттикнати од убиството на 35-годишен Германец кој беше фатално прободен со нож во Хемниц.
Германија забележува голем пораст во бројот на насилни напади врз новинарите во текот на 2018 година, покажува најновата студија на Европскиот центар за медиуми и слободи (ЕКППФ). Оттаму велат дека вкупно 28 новинари претрпеле 22 потрдени физички напади во текот на 2018 година додека фотографирале, снимале или држеле камера за време на демонстрации или настани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Изгласана новата Европска комисија на Урсула фон дер Лајен
Претставниците на Европскиот парламент со повеќе од половина од мнозинството гласови ја избраа новата Европска комисија предводена вторпат од Урсула фон дер Лајен, која ја презема функцијата в недела, 1 декември.
Гласаа 688 пратеници, од кои 370 гласаа за потврдување на Комисијата, 282 беа против, а 36 беа воздржани.
Комисијата доби помалку гласови од Урсула фон дер Лајен кога Европскиот парламент гласаше за новиот шеф на Комисијата во јули кога таа доби 401 глас.
Пред пет години, во јули 2019 година, Урсула фон дер Лајен доби само 383 гласа, девет повеќе од апсолутното мнозинство, но нејзината прва Комисија доби поддршка од 461 европратеник, значително повеќе од денес, со тоа што тогашниот состав имаше помалку европратеници, 705, а сегашната има 720.
„Првата голема иницијатива на новата Европска комисија ќе биде компас за конкурентност, што вклучува затворање на иновацискиот јаз со САД и Кина, заеднички план за декарбонизација и конкурентност и зголемување на безбедноста и намалување на зависноста. Тој компас за конкурентност ќе биде рамка за нашата работа до крајот на мандатот“, објави претседателката на ЕК, Урсула фон дер Лајен, во својот говор пред претставниците на Европскиот парламент, во кој ја претстави својата програма.
Таа рече дека компасот ќе биде изграден на три столба од извештајот за европската конкурентност, што за Комисијата го напиша поранешниот италијански премиер и претседател на Европската централна банка, Марио Драги.
Зборувајќи за заостанувањето во иновациите, Фон дер Лајен рече дека ЕУ е на исто ниво со САД и Кина кога станува збор за патенти и создавање стартапи.
Сепак, само една третина од европските патенти се комерцијално експлоатирани, а европските стартапи наидуваат на многубројни пречки за нивниот раст.
Свет
Роберт Фицо му честита на Трамп за победата, разговараа за војната во Украина
Словачкиот премиер Роберт Фицо преку телефонски разговор му ја честитал победата на Доналд Трамп на претседателските избори во САД, од кој значаен дел е посветен на анализата на војната во Украина, соопштија од кабинетот на премиерот.
Фицо нагласи дека во Европа, а особено во Словачка, многумина се надеваат дека Трамп ќе го реши конфликтот во Украина, пренесе ТАСР.
„Убеден сум дека има огромни очекувања во однос на него не само во Словачка туку и во цела Европа кога станува збор за воениот конфликт во Украина“, рече Фицо.
Регион
Убиен син на хрватски пејач во Еквадор: го застрелале две лица на мотор, го убиле со четири куршуми
Томислав Зеленчиќ (48), хрватски државјанин, е убиен во вооружен напад во Манта, во провинцијата Манаби во Еквадор, што го прави четврта жртва во регионот во последните три дена. Зеленчиќ, кој живееше во тој град повеќе од 20 години, беше убиен во напад во вторникот, на 26 ноември, во 10 часот, во близина на неговиот дом во населбата Јоцај.
Според изјавите на сведоците, жртвата се движела по тротоарот во близина на неговата куќа, а нападот го извршиле две лица на мотор. Напаѓачите, според еквадорските медиуми, испукале најмалку четири куршуми кон Томислав Зеленчиќ пред да побегнат. Тешко повредениот Хрват останал да лежи на улицата во локва крв. Соседите и роднините со приватно возило го пренеле во болницата „ИЕСС Манта“, каде што и покрај напорите на медицинскиот персонал, набргу починал. Полицијата излегла на местото на настанот за прибирање докази. Телото е пренесено на судска медицина во Манта за понатамошна обдукција. Мотивот за нападот сè уште не е познат, а властите почнале интензивна истрага за откривање на сторителите.
„Јутарњи лист“ пишува дека Зеленчиќ е син на пејачот Инослав (Ино) Зеленчиќ, основач на групата „Задар експрес“. Пред многу години Томислав се преселил во Панама, каде што работел на рибарски бродови, по што се преселил во Еквадор. Еквадорските медиуми објавија и дека Зеленчиќ во 2016 година поднел пријава за грабеж, кој набргу бил решен.