Македонија
(Видео) Арсовски: Вработени во МВР незаконски основаат агенција за обезбедување
Партиски обезбедувачи на Зоран Заев и СДСМ, вработени во МВР, а дел од нив и бивши осуденици незаконски и надвор од секоја процедура основаат агенција за обезбедување, обвини Димче Арсовски, портпарол на ВМРО-ДПМНЕ.
„Агенцијата ‘Код секјурити груп’ ДООЕЛ од Струмица, која е формирана од страна на Александар Трајков, долгогодишен личен бодигард на Заев, Николчо Колев и Стево Трајков, од Струмица, вработени во МВР, како и Лазо Котуровиќ, повеќекратен осуденик за насилство и тешки телесни повреди, е новата параполициска структура на власта и на СДСМ која треба да биде дел од подземјето и да врши рекет, уцени, закани, како и политички притисоци со цел обезбедување на политички резултати во корист на СДСМ, Заев и Оливер“, обвини Арсовски.
Според Правилникот за работење, вели Арсовски, и дејностите што се во судир со полициските работи, агенција за обезбедување не може да биде формирана од страна на лица вработени во МВР, и од тука се поставува прашањето дали и како Оливер Спасовски потпишал дозвола за работа на агенцијата за обезбедување ‘Код секјурити груп’, каде двајца од четворица основачи се вработени во МВР.
ВМРО-ДПМНЕ побара од Оливер Спасовски да одговори дали свесно и покрај тоа што постои законска пречка потпишал дозвола за работа на агенцијата за обезбедување „Код секјурити груп“ од Струмица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Православните верници го слават Велигден
Православните верници денеска го слават најголемиот христијански празник Велигден – Христовото воскресение, ден кога Исус Христос ја докажал својата божествена моќ и воскреснал од мртвите. Воскресението Христово на полноќ беше објавено во сите храмови на Македонската православна црква, а денеска се одржуваат воскресенски литургии.
Поглаварот на МПЦ-ОА г.г. Стефан богослужеше во Соборниот храм „Свети Климент Охридски“ во Скопје од каде го објави Христовото Воскресение и упати Велигденски пораки.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.