Министерството за дигитална трансформација во соработка со Државниот завод за статистика денеска официјално ја претстави најновата електронска услуга достапна на Националниот портал за е-услуги „образецот ВОИ20 за запишани студенти на додипломски студии (прв циклус) на факултетите и високите стручни школи“.

На денешната прес-конференцијата, министерот Стефан Андоновски изјави дека оваа услуга претставува значаен чекор во насока на дигитализација на јавните услуги, со фокус на младите и студентите како клучни корисници на услугата.

„Оваа услуга е наменета за сите студенти и високообразовни институции со цел да се поедностави, забрза и дигитализира процесот на поднесување и обработка на податоците. Наместо долгите процедури и хартиените документи, сега образецот може целосно да се пополни и испрати онлајн – брзо, ефикасно и без административни бариери“, изјави министерот.

Андоновски потенцираше дека со новата дигитална алатка студентите и универзитетите заштедуваат време и трошоци, како и тоа дека Државниот завод за статистика добива точни и навремени податоци, се зголемува административната ефикасност, а се намалува можноста за грешки.

Министерот најави дека во координација со ДЗС, во наредниот период се планира целата група на услуги поврзани со студирањето да бидат интегрирани и исклучиво достапни преку Националниот портал за е-услуги – www.uslugi.gov.mk.

„Со ДЗС размислуваме и за целата група на услуги кои се однесуваат на студирањето да бидат исклучиво достапни на Националниот портал. Ги повикуваме сите високообразовни установи и студенти да ја користат новата услуга на www.uslugi.gov.mk. Нашата цел е да создадеме систем каде административните обврски нема да бидат товар, туку поддршка за образованието и развојот.,“ истакна министерот.

Оваа иницијатива е дел од пошироката стратегија на Владата за целосна дигитализација на јавните услуги, со што се овозможува побрз, потранспарентен и подостапен јавен сектор за сите граѓани.

„Министерот за правда, Филков, има намера да магистрира на тема „Креирање на стратегии во сферата на правосудството како надлежност на министерот за правда“. Овој скандалозен потег, иако навидум е академски, е всушност крајно непримерен и не споив со високата јавна функција што тој ја извршува. Министерот за правда магистрира на тема за сопствени надлежности“, рече Јовица Јанковиќ, потпретседател на СДММ.

„Ова е директен судир на интереси, кој го разобличува неговиот личен и институционален интегритет.

Постапката на министерот отвора прашања за неговата свест за Законот за спречување на корупција и судир на интереси и неговите одговорности како службено лице.

Со користење на службени документи и информации до кои има пристап како министер, за да ги искористи за лична академска добивка, Филков директно го прекршува членот 62 од истиот закон, кој забранува какво било користење на службената положба за лични цели.

Ова не е ништо друго освен злоупотреба на службената должност.

Изјавата на министерот дека „не постои конфликтна или не конфликтна тема за магистерска работа“ е не само арогантна, туку и скандалозна.

Со тоа тој ги игнорира сите етички и законски принципи.

Токму креирањето на стратегии во правосудството е законска надлежност на Министерството за правда. Тие се дело на државни службеници и експерти, и никој нема авторски права над нив, па дури ни министерот.

Со овој чин, министерот Филков, всушност, си присвојува државен труд за своја лична корист.

Ова не е само неетички чин, туку и ја доведува во прашање суштината на академската чесност и интегритет.

Господине Филков, со овој потег, Вие го изгубивте моралниот и професионален интегритет за да ја извршувате функцијата министер за правда.

Очекуваме реакција на Антикорупциската комисија. Поттикнувањето на сомнежи за судир на интереси и злоупотреба на службената положба не смеат да бидат дел од дејствувањето на еден министер.

Јавноста бара одговорност, а не оправдувања и ароганција“, изјави Јовица Јанковиќ, потпретседател на СДММ.

Обвинителскиот тим, кој постапува во предметот во врска со пожарот во кочанската дискотека „Пулс“, денеска, до Основниот кривичен суд Скопје поднесе обвинителен акт против уште едно лице за сторени тешки дела против општата сигурност од член 292 став 2 во врска со член 288 став 3 во врска со став 2 во врска со член 22 од Кривичниот законик.

И овој обвинет се товари за сопствен особен придонес бидејќи заедно со повеќе одговорни и службени лица за кои веќе е поднесен обвинителен акт, кој е во фаза на оценка, како и со други засега непознати лица, не постапил според прописите и техничките правила за мерките за заштита и со тоа предизвикал опасност за животот и телото на луѓето, како и за имотот, од големи размери.

Поради нивните пропусти во еден подолг временски период, како и поради конкретните дејства на дел од обвинетите, на 16.3.2025 година во угостителскиот објект во Кочани бил предизвикан пожар на место на кое биле собрани поголем број луѓе при настап на музичката група ДНК, во целосно небезбедни и опасни услови, поради што настапила смрт кај 62 лица, тешки телесни повредидобиле 157 лица, а телесна повреда добиле 65 лица.

Последниот обвинет, во временскиот период од септември 2022 година до денот на пожарот, во Скопје и во Кочани, како одговорно лице – реален сопственик на обвинетото правно лице Друштво за обезбедување на имот и лица РУБИКОН СЕКЈУРИТИ СОЛУШН увоз-извоз ДООЕЛ Скопје, заеднички со веќе обвинетиот управител, раководел со деловниот потфат и целокупното работење на агенцијата за обезбедување.

Тие, иако имале сопственичка одговорност, не постапиле во согласност со чл. 3 од Законот за приватното обезбедување, со тоа што не презеле мерки и активности за спречување и откривање штетни појави и противправни дејства, кои ги загрозуваат телесниот интегритет и достоинството на личноста и имотот што се обезбедува и во согласност со чл. 6 од Законот за приватното обезбедување, односно обезбедувањето го вршеле без да имаат склучено писмен договор за приватно – физичко обезбедување со корисникот на услугата – угостителскиот објект „Клуб пулс“ и без воопшто да водат грижа, контрола и надзор при исполнување на обврските на лицата што вршеле обезбедување имот и лица.

На критичниот ден, тројца вработени во агенцијата со важечки лиценци за приватно обезбедување и со легитимации на обвинетото правно лице, како и еден обвинет без лиценца за вршење на работи на физичко обезбедување, биле задолжени да го обезбедуваат објектот во Кочани без да утврдат претходна безбедносна проценка со проверка по однос на сигурносните услови на објектот, опасностите и можностите за евакуација во случај на опасност, без проверка на влезови и излези и нивна исправност, во услови на преполнетост на капацитетот на посетители. Притоа, спротивно на законските обврски, правното лице не изготвило и не доставило План за обезбедување при одржување на јавен ред на настан од забавен карактер со присуство на поголем број на посетители и не биле ангажирани повеќе работници на обезбедување како што налагале условите во објектот.

Вработените распоредени од Агенција за обезбедување „Рубикон“ не постапиле по одредбите од Законот за приватното обезбедување и не извршиле проверка на идентитетот и возраста на лицата при влез на објектот што го обезбедувале и со тоа овозможиле влез на деца – лица што не наполниле 18 години и нивно присуство во објектот по 00.00 часот. Не постапиле и во согласност со законската обврска да извршат преглед на лицата при влез во објектот што се обезбедува, а заради пронаоѓање предмети што може да се користат за уништување или оштетување на имотот, како и предизвикување опасност за животот, со што не го спречиле внесувањето и користењето експлозивни материии – пиротехнички средства, со кои бил предизвикан пожарот.

Од доказите обезбедени во текот на истрагата произлезе дека сега обвинетиот имал главна улога во обвинетото правното лице, фактички раководел со агенцијата, и давал директни инструкции на обвинетите, кои критичната вечер биле ангажирани како обезбедувачи. Исто така, обезбедени се докази дека по пожарот во Кочани, тој презел активности во насока на формирање ново правно лице со седиште во Струмица, чија основна дејност му е исто така физичко обезбедување на имот и лица, а со цел да ја продолжи дејноста повторно затскривајќи се формално-правно во раководењето зад друго одговорно лице.

Од тие причини, иако истрагата за ова лице е завршена и доказите се обезбедени, јавните обвинители, кои постапуваат, проценија дека сè уште постојат одредени ризици за негово целосно обезбедување во текот на постапката. Имајќи предвид дека судот, одлучувајќи по жалба на обвинетиот, веќе ја заменил претходно определената мерка притвор со мерка куќен притвор и со дополнителни забрани за напуштање на живеалиштето, за комуникација со одредени лица и одземање на патната исправа, Јавното обвинителство до судот достави и предлог за продолжување на сите определени мерки и забрани.