Македонија
Јанкулоска не смее да го напушти Скопје до правосилност на пресудата

Ексминистерката за внатрешни работи, Гордана Јанкулоска, не смее да го напушти Скопје до правосилност на пресудата. Ваквата одлука ја донесе кривичниот совет во Основниот суд Скопје 1, кој денеска ја осуди Јанкулоска на 6 години затвор за злоупотреба на службената положба и овластувањето при набавката на луксузниот владин „мерцедес“.
Советот го усвои предлогот на обвинителката на СЈО, Фатиме Фетаи, за дополнителна мерка за претпазливост за Јанкулоска, која не смее да го напушти живеалиштето. Мерката ќе важи од правосилноста на решението до правосилноста на казната.
Јанкулоска е осудена за злоупотреба на службената должност и овластувањето, односно дека го поттикнала помошник-министерот во МВР, Ѓоко Поповски, да изврши кривично дело. На ексминистерката ѝ се судеше во раздвоена постапка во предметот „Тенк“ бидејќи имаше ризична бременост. Случајот „Тенк“ на СЈО е за набавката на луксузниот „мерцедес“ вреден 600 илјади евра.
Поранешниот премиер Никола Груевски за овој случај веќе е осуден на две години ефективна затворска казна, а поранешниот помошник во Министерството Ѓоко Поповски, доби намалување од шест и пол на четири и пол години казна затвор на скопска Апелација.
Јанкулоска во завршните зборови побара ослободителна пресуда со образложение дека немала намера никому да му влијае и да врши притисок.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЦУК: Планинар од Скопје поради лошите временски услови изгубил ориентација на Кожуф, за брзо е пронајден

Ефикасно и брзо е пронајдено залутано лице кај Мрежичко на Кожуф, информираат од Центарот за управување со кризи.
Во 13:15 часот денеска на бројот за итни случаи 112 во ЦУК, добиена била пријава за залутано лице на планината Кожуф, во близина на селото Мрежичко.
„Лицето било планинар од Скопје, кое претходната ноќ ја преспало во планината. Поради лошите временски услови и наросувањето од снег, загубило ориентација и решило да побара помош од службите“, велат од ЦУК.
Надлежните веднаш биле информирани.
„Од страна на Центарот за управување со кризи беа известени СВР Велес, ОВР Кавадарци, Гранична Полиција „ЈУГ“ Итна Служба, како и Општина Кавадарци и градоначалникот на Кавадарци, Митко Јанчев. Во 14.00 часот, лице од општината во Кавадарци кое го познавало теренот, стапило во контакт со залутаното лице и по кратко време го пронашол и со теренско возило го однел до безбедна куќарка во близината каде што бил згрижен, Потоа од страна на граничната полиција “ЈУГ“ лицето е транспортирано до градот“, стои во известувањето.
Македонија
Поради врнежи од снег се воведува забрана за сообраќај за тешки товарни возила на патниот правец Битола – Ресен преку планинскиот превој Ѓавато

Од 16:20 часот поради врнежи од снег се воведува забрана за сообраќај за тешки товарни возила на патниот правец Битола – Ресен преку планинскиот превој Ѓавато, информира АМСМ.
Претходно, беше воведена и забрана за сообраќај за тешки товарни возила на патниот правец Гостивар – Кичево преку планинскиот премин Стража.
Како што соопшти АМСМ, забраната важи и за патниот правец крак Маврово – Дебар и е воведена од 15.25 часот.
Македонија
Забрана за тешки товарни возила на Стража и патниот правец Маврово-Дебар

Поради врнежи од снег воведена е забрана за сообраќај за тешки товарни возила на патниот правец Гостивар – Кичево преку планинскиот премин Стража.
Како што соопшти АМСМ, забраната важи и за патниот правец крак Маврово – Дебар и е воведена од 15.25 часот.