Регион
Според „Асошиетед прес“, стравувањата за конфликт на Балканот не се неосновани
Стравувањата од некои европски официјални претставници дека на Балканот може повторно да има конфликти доколку бргу не го прифатат членките на ЕУ, не се неосновани, проценува американската агенција „Асошиетед прес“ (АП) тврдејќи дека руското влијание се зголемува на Балканот, во балтичките земји и во Централна Европа.
Агенцијата проценува дека тензиите меѓу Белград и Приштина се во пораст и покрај напорите на ЕУ за постигнување трајно решение меѓу двајцата поранешни воени непријатели.
Исто така, потсетува дека Белград пред две недели ја зголеми борбената подготвеност на армијата поради присуството на косовската специјална полиција во северно Косово, населено со Срби.
Агенцијата, всушност, сугерира дека ЕУ поради свои проблеми, со години ги игнорира балканските земји и дека некои официјални претставници на ЕУ сега се плашат дека Балканот може повторно да стане воено жариште, освен ако набргу не го прифатат членките на блокот.
Претседателот на Европската комисија, Жан-Клод Јункер, предупреди на ризикот од избувнување војна на Балканот ако ЕУ дозволи да се изгасат надежите за влез во ЕУ.
АП исто така тврди дека двајца руски воени разузнавача работеле од Србија во 2016 година кога се обиделе да организираат државен удар во Црна Гора со цел да го спречат да се приклучи кон НАТО.
Се проценува дека победата на Милорад Додик за српски член на Претседателството на БиХ го зајакна влијанието на Москва во Западен Балкан бидејќи „тој сега може да ја блокира секоја стратешка одлука доколку Путин каже“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Ужас во Загреб: пронајдено тело во автомобил во одводен канал
Граѓани попладнево во одводен канал во Загреб пронашле возило со тело на непознато лице, соопшти полицијата.
Повикот во полиција стигнал нешто по 13 часот.
Полицијата набрзо пристигнала на локацијата меѓу Антуновац и Тења и потврдила дека лицето во возилото починало, пишува Вечерњи лист.
Истрагата е во тек.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.