Свет
Се самоуби крадец на вредна колекција вино – се фрли од луксузен хотел на Менхетн

Поранешниот личен асистент на извршниот директор на „Голдман Сакс“ се самоуби скокајќи од хотел на Менхетн истиот ден кога требаше да се појави во федералниот суд, каде што е обвинет за кражба на ексклузивна колекција вина од неговиот поранешен шеф.
Николас де Маер е обвинет за крадење висококвалитетно вино вредно над 1,2 милион долари од колекцијата на својот поранешен шеф Дејвид М. Соломон, кој сега е главен извршен директор на „Голдман Сакс“.
Тој требал да се појави вчера во федералниот суд во 14.30 часот. Но, само осум минути подоцна полицијата примила повик дека тој се фрлил од хотелот.
Де Маер (41) скокнал од 33. кат на луксузниот хотел „Карлајл“, каде што престојувал. Властите соопштија дека тој бил прогласен за мртов на местото на настанот.
Полицијата го испитува случајот како самоубиство.
Додека бил личен асистент на Соломон, Де Маер, место да го испорача виното до визбата на Соломон во источен Хемптон, на Лонг Ајленд, тој украл стотици шишиња што ги продал на дилер од Северна Каролина.
Меѓу огромната колекција највредни биле седум шишиња Domaine de la Romanée-Conti, француско пино-ноар од Бургундија, произведено од едно од најпознатите лозја во светот. Рецензентите вината што може да достигнат десетици илјади долари за шише ги опишаа како течно кадифе. Соломон ги купил шишињата за 133.650 долари.
Де Маер беше уапсен на меѓународниот аеродром во Лос Анџелес во јануари, но до неодамна живееше во Охајо. Тој се соочуваше со казна од 10 години затвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Руски научници развија ново соединение за борба против ракот

Експерти од Државниот универзитет во Мари и Федералниот истражувачки центар „Уфа“ при Руската академија на науките развија ново хемиско соединение што би можело да стане основа за создавање иновативни лекови против тумори, објави Министерството за наука и образование на Русија.
Ова соединение дејствува селективно на туморските клетки, речиси без да ги оштети здравите клетки, а неговата молекуларна структура комбинира фенотијазинска и трифенилфосфониумска група.
Благодарение на оваа комбинација соединението ја таргетира слабата точка на туморските клетки – митохондриите и ја нарушува нивната работа, објавува „РИА новости“.
„Резултатите од истражувањето покажаа дека новото соединение ефикасно го потиснува растот на разни малигни клетки, вклучувајќи рак на црниот дроб, аденокарцином на белите дробови, колоректален карцином и леукемија. Активноста се манифестира дури и при ниски концентрации, што го прави соединението особено ветувачко за развој на лекови“, рече Константин Белослудцев, доктор по биолошки науки и проректор за иновации на Државниот универзитет во Мари, објавува „Танјуг“.
Како дополнителна предност, Белослудцев ја истакна едноставноста на синтезата на соединението, што овозможува негово производство во доволни количини за претклинички и клинички испитувања. Овие студии се спроведени во рамките на програмата „Приоритет 2030“, пренесува медиумот.
Свет
Стаб: Се надевам дека кај Трамп набргу ќе го снема трпението за Путин

Финскиот претседател Александар Стаб денес изјави дека се надева дека трпението на американскиот претседател Доналд Трамп со рускиот претседател Владимир Путин наскоро ќе исчезне и додаде дека европските земји ќе продолжат да се залагаат за траен мир во Украина.
Според него, единствениот начин да се принуди Путин да ја заврши војната во Украина е преку неговите сојузници, со проценка дека оние кои можат да го убедат рускиот претседател да постигне примирје се на Истокот, објавува „ Ile“.
Финскиот претседател, исто така, рече дека го предупредил Трамп дека Путин користи „типични руски тактики на одложување“ за да избегне средба со украинскиот претседател Володимир Зеленски.
Фото: принтскрин
Свет
Мерц: Германија нема да ја признае палестинската држава на Генералното собрание на ОН

Германскиот канцелар Фридрих Мерц денес изјави дека Германија нема да се придружи на иницијативата на западните сојузници за признавање на палестинската држава на Генералното собрание на Обединетите нации следниот месец.
Мерц го објави ова на заедничка прес-конференција со канадскиот премиер Марк Карни, кој минатиот месец изјави дека Канада планира да ја признае државата Палестина на Генералното собрание по слични најави од Франција и Велика Британија, пренесува „Ројтерс“.
„Ставот на федералната влада е јасен во врска со евентуалното признавање на државата Палестина. Канада го знае тоа. Ние нема да се придружиме на оваа иницијатива. Не гледаме дека условите се исполнети“, рече Мерц.
Фото: принтскрин