Култура
„Богородичен покров“ – фестивал за духовни и хумани вредности

Третиот по ред меѓународен филмски фестивал за духовни, хумани и културни вредности „Богородичен покров“, годинава ќе се одржи од 15 до 18 октомври во Скопје во Кинотеката на Република Македонија. На фестивалот се прикажуваат филмови со духовни, хумани, морални, религиски и семејни вредности и филмови од културното и духовно наследство.
Свеченото отворање на фестивалот е на 15 октомври, понеделник, во 20 часот во Кинотеката на Република Македонија. Фестивалот е поддржан од амбасадите на Чешката Република, Словачка, Словенија, Романија и Босна и Херцеговина. На свеченото отворање ќе се обратат амбасадорите на Чешка, Словачка и на Словенија и други поддржувачи и гости.
Фестивалот ќе го прогласи за отворен почесниот претседател проф. д-р Јован Таковски, протојер-ставрофор, кој ќе ги додели и дипломите за духовни и хумани вредности на покровителите и гостите.
Отворањето на фестивалот е со документарниот филм „Очите на фотографката“, добитник на 70-ина интернационални награди, во режија на Матеј Минач, лауреат со многубројни награди и признанија, меѓу кои и наградата Emmy Award. Филмот е во чешко-словачка продукција и е дел од годинешната програма на одбележување на јубилејот 100 години од основањето на Чехословачка. Исто така, на фестивалот гостин ќе биде режисерот Денис Бојиќ од Босна и Херцеговина – Република Српска, со својот филм „Лицата на Лафоре“, кој ќе има трибина на 17 октомври во 12 часот во Кинотеката на Република Македонија за новите методи во светот на лекување на оваа тешка детска болест.
Основачи на фестивалот се Коле Јовановски, ТВ-монтажер и режисер од МТВ, и Зорица Костовска, ТВ и филмски продуцент, а членови на Програмскот совет, Драги Таневски, директор на фотографија, Владимир Ангелов, филмолог, проф. д-р Ѓоко Ѓорѓевски и Зорица Костовска, директор на фестивалот. Фестивалот е и во спомен на основачот Коле Јовановски, кој годинава прерано се упокои во 58. година од животот.
Изборот на филмови од неколку држави има цел да придонесе за воздигнување на човечките, духовните и семејните вредности во општеството. Организатор на фестивалот е „Топ ворлд“, независна ТВ-продукција од Скопје. Влезот на фестивалот е слободен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
„Голдберг варијациите“ на Бах во изведба на Дино Имери – утре во Виена

Македонскиот пијанист Дино Имери, еден од највпечатливите уметници на својата генерација, утре (13 јуни) ќе настапи во Виена – глобалниот и историски центар на класичната музика. На програмата е капиталното дело на Јохан Себастијан Бах – „Голдберг варијации“, кое ретко се изведува на концертните сцени низ Европа, токму поради неговата исклучителна сложеност и длабочина.
Концертот ќе се одржи во престижниот „Бехштајн Центрум“ во Виена, во организација на Амбасадата на Република Северна Македонија, со поддршка од Македонско-австрискиот бизнис клуб и компанијата SSB Infrastructure-Austria.
Ова дело, коешто Имери премиерно го изведе во Скопје во рамки на „Недела на Бах“, привлече големо внимание од публиката и критиката. Програмата бара техничка виртуозност и уметничка зрелост, а само мал број пијанисти во светот се осмелуваат да го стават во својот концертен репертоар.
„Настап во Виена е сон на секој уметник. Особено ми е чест да ги изведам ‘Голдберг варијациите’ – едно од најмонументалните дела на класичната литература, на сцена пред публика која секојдневно слуша врвни уметници и програми. Работев на ова дело повеќе од пет години. Искрено им се заблагодарувам на Н.Е. г-дин Освит Росоклија и на поддржувачите на концертот – без нив оваа реализација немаше да биде можна“, изјави „волшебникот на пијаното“ Дино Имери пред настапот.
Концертот е со слободен влез и отворен за сите љубители на класичната музика.
Култура
Фестивалот Credence Dance почнува на 16 јуни

Третото издание на фестивалот Credence Dance започнува на 16 јуни, а ќе трае до 21 јуни со програма конципирана тематски, Вечери на класичен балет и Вечери на современ танц.
Фестивалот оваа година има и дополнителна програма која ќе се состои од работилници и трибини. На програмата се фрагменти од бисерите на класичното наследство „Лебедово езеро“, „Рајмонда,“„Копелија“, „Дон Кихот“, „Силфида“ и други.
Освен тоа во делот на модерниот и современиот танц премиерно ќе бидат изведени дела на Игор Киров, Бојан Мицов, Џонс Хинг, Франциско Руиз и Јована Петровска кој кореографите наменски ги подготвија за фестивалот.
Овогодинешниот Credence Dance фестивал ќе понуди ексклузивни гости од Кина, САД, Италија, Франција, Германија, Велија Британија итн. Ова е исклучителна и ретка можност да се видат овие уметници на домашна сцена.
Во рамки на фестивалот традиционално ќе биде врачена Наградата за трајни вредности во танцовата уметност. Настанот се одржува во Националата опера и балет.
Фестивалот е поддржан од Министерството за култура и Универзитетот „Св Кирил и Методиј“, Скопје. Влезот е слободен.
Култура
Во Москва излезе „Пиреj“ од Петре М. Андреевски

Романот „Пиреj“ излезе од печат во Москва на инициjатива на Олга Панкина, познат популаризатор на македонските културни вредности во Русија. Таа го преведе уште во 2008 година, го обjави издавачката куќа „Феникс“, Скопjе. Како што обjаснува Панкина, романот на руски веднаш предизвика интерес каj публиката, но сепак книгата не можеше да допре до широк круг рускоjазични читатели. Сметаjќи го романот на основоположникот на современата македонска проза Петре М. Андреевски за ремек дело, таа си постави за задача да го преобjави во Москва.
Оваа година идеjата jа поддржа Центарот за книга „Рудомино“ со коj Олга Панкина плодно соработува веќе петнаесет години (Центарот за книга има обjавено творби на над 20 македонски автори).
Ова издание на „Пиреj“ е многу квалитетно (368 страни, тврд повез) и изгледа современо. На корицата има фрагмент од сликата „Стара куќа“ на Олга Панкина. Блескав предговор за книгата напиша Венко Андоновски, коj даде за руска читателска публика основни информации за историјата која е заднина на личната драма на едно македонско семејство од почетокот на ХХ век, семејството на Јон и Велика, jа подвлече актуелноста на романот и го нарече како најголем македонски бестселер на сите времиња.
Тукушто обjавениот роман веќе заживее своj книжевен живот – почна да стекнува читатели. Минатата недела, од 3 до 7 jуни, беше презентиран на Саемот на книга на Црвениот плоштад во Москва на штандот на издавачот Центар за книга „Рудомино“.