Македонија работи активно на постигнување на родовата еднаквост и заштитата од дискриминација. Развиваме национален индекс за родова еднаквост, во кој ќе биде вклучен индикатор за мерење на родовата рамноправност, со кој ќе се прави споредба со ЕУ и нејзините земји членки, истакна министерката за труд и социјална политика, Мила Царовска, на неформалниот појадок во Виена во организација на австриското претседателство на Советот на ЕУ.

Министерката додаде дека со воспоставувањето е-обуки на цела администрација и воведувањето родово одговорно буџетирање ќе се направи механизам со кој родовата рамноправност нема да се гледа како изолирано прашање, туку како дел од сите национални политики што се носат во државата.

Како што информираат од МТСП, на наформалниот состанок во Виена министрите дискутирале за прашањето „Како дигитализацијата придонесува за еднакво граѓанско и политичко учество на девојчињата и момчињата?“

Според ресорното Министерство, напредокот во родовата еднаквост се гледа и од статистичките податоци.

„Во Македонија, според податоците на Државниот завод за статистика, во 2016 година од вкупниот број корисници на интернет, 48,7 отсто биле жени и 51,3 отсто мажи, а овој број во 2017 година се зголемил 76,8 отсто за жени и 81 отсто за мажи. Расте и свесноста на девојчињата и жените за школувањето. Тоа го покажуваат и бројките на застапеност на девојките во високото образование со 31 отсто наспроти бројот на момчиња 22 отсто. Бројот на девојки што дипломирале на природните математички науки е поголем од бројот на момчиња (2,8 отсто во 2016 година девојки наспроти 1,8 отсто во 2016 година момчиња). Во техничките науки, пак, бројот на дипломирани жени (5,07 отсто во 2016 година) е помал од бројот на дипломирани студенти од машки пол (8,2 отсто во 2016 година)“, појаснуваат од МТСП.

Оттаму додаваат дека на состанокот во Виена министерката Царовска се сретнала со австриската федерална министерка за жени, семејство и млади, Жулиен Богнер Штраус, како и со Силви Дурер, директорка на швајцарската Федерална канцеларија за родова еднаквост.