СВР Охрид поднесе кривична пријава против поранешен началник на одделението на Државниот пазарен инспекторат во Охрид поради постоење основи на сомнение за сторено продолжено кривично дело „злоупотреба на службена положба и овластување”.

Во соопштението на полицијата се наведува дека 45-годишниот Ѓ.Б. од Охрид, во октомври 2014 година, како началник на одделението на Државниот пазарен инспекторат во Охрид, од О.Ф. од Скопје, сопственик фирма од Скопје, побарал да исплати фактура во износ од 35 900 денари кон друга фирма од Охрид. Потоа, во декември 2014 година пријавениот повторно од О.Ф. побарал да исплати фактура во износ од 40 532 денари кон наведеното правно лице. Во текот на 2015 година пријавениот од О.Ф. побарал да исплати треата фактура во износ од 60 000 денари кон хотел во Охрид, при што тој одбил да ја исплати истата, велат од полицијата.

Од МВР додаваат дека по случајот со третата фактура, во деловен објект фирмата на О.Ф., од страна на вработени во Државниот пазарен инспекторат бил констатиран прекршок при што била изречена соодветна глоба. Па поради тоа, О.Ф. повел судска постапка во која било утврдено дека прекршоците констатирани од Државниот пазарен инспекторат не биле направени, по што било поништено решението на Државниот пазарен инспекторат.