Општина Ѓорче Петров продолжува со континуирани инвестиции во образованието и подобрување на условите за најмладите. Потпишан е договорот за доградба на подрачното училиште „Димитар Поп Георгиев – Беровски“ во населбата Хром, со што започнува реализацијата на уште еден значаен проект, најави кандидатот за градоначалник од редовите на ВМРО-ДПМНЕ, Александар Стојкоски.

Со проектот, како што појаснува е предвидена изградба на осум нови училници со вкупна површина од 560 м², со енергетски ефикасна фасада и систем за централно греење, што ќе овозможи современи, безбедни и функционални услови за работа.

„Новите простории ќе овозможат едносменско одвивање на наставата, што значи повеќе простор, подобра организација и поквалитетен наставен процес за учениците и наставниците.

Во рамките на училиштето, веќе е целосно завршена изградбата на новата спортска сала, со што се заокружува современ училишен комплекс кој ги обединува образованието и спортот во едно.

Со завршената спортска сала и доградбата што следи, создадовме услови какви што навистина заслужуваат нашите ученици. Ова не е само инфраструктурен проект, туку инвестиција во образованието и иднината на Ѓорче Петров – изјави градоначалникот Александар Стојкоски.

Со овие вложувања, Општина Ѓорче Петров уште еднаш го потврдува својот фокус на создавање современи и безбедни услови за учениците, затоа што иднината на општината започнува во училницата“.

Кандидатката за градоначалник на општина Бутел, Оливера Ливриниќ со најава на својот тим на советници за современа, чиста и фер општина. Тимот, составен од стручни, чесни и енергични личности, ја отсликува посветеноста кон вредностите на одржлив развој, социјална еднаквост и транспарентно управување, нагласува.

„Се кандидирав за градоначалник затоа што верувам дека нашата општина може да биде пример за одржлив развој, модерни услуги и отчетна локална власт. Нашата визија е општина во која секој граѓанин ќе има еднаков пристап до јавните услуги, чиста и безбедна средина и повеќе можности за економски напредок“, изјави Ливриниќ.

Ги претстави клучните приоритети на програмата:

Подобрување на инфраструктурата и локалните услуги;
Поддршка за младите, семејствата и локалните бизниси;
Грижа за чиста животна средина и нови зелени површини;
Зголемена транспарентност и отчетност на општинската власт.

„Мојот тим е доказ дека политиката може да биде чесна, отворена и насочена кон луѓето. Ќе работиме со јасен принцип – транспарентност во секој чекор. Секој граѓанин има право да знае како се носат одлуките и каде се трошат јавните пари,“ додаде Ливриниќ.

„Во современ Центар нема место за поделби – има место за луѓе“. Кандидатот за градоначалник на Општина Центар од Движењето ЗНАМ – За наша Македонија, Мирослав Лабудовиќ, истакна дека инклузивноста, човечката достоинственост и еднаквите можности ќе бидат основата на новиот модел на локално управување во Центар.

„Центар мора да биде пример за општина која не остава никого зад себе. Ќе обезбедиме еднакви можности за сите – без исклучок. Ќе отвориме дневни центри за децата со попреченост, со современи услови и стручна поддршка, а ќе воспоставиме и програми за нивна целосна инклузија во образованието“, изјави Лабудовиќ.

Во фокусот на новите политики ќе бидат социјалната грижа и локалната економија – два стожери на човечка и функционална општина.

Општината ќе спроведе проект за формирање дневни центри и „Сениор Центар“ за пензионери и ранливи категории, како и програми за поддршка на самохрани родители, лица со попреченост и бездомници.

Дополнително, ќе се воведе и проект „Топол оброк“ за бесплатни или субвенционирани оброци за најзагрозените, се наведува во соопштението.

„Грижата за најранливите не е само прашање на хуманост – тоа е прашање на визија и вредности. Општина што се грижи за најслабите е општина што расте со најсилните“, потенцираше Лабудовиќ.

Паралелно, тој најави силен фокус на локалниот економски развој и поддршката на малите и семејни бизниси, кои се двигател на Центар.

Со формирање на општински фонд за мали и средни бизниси, Општината ќе обезбеди финансиска и советодавна помош за нови претприемачи, стартапи и занаетчии.

Ќе се организираат саеми на локални производи, како и програми за модернизација на трговските улици и пазарите, за подобрување на условите за работа на малите стопанственици, се вели во соопштението.

„Центар има талент, има креативност и има можности. Нашата цел е младите да ја гледаат својата иднина токму овде – да основаат сопствени бизниси, да создаваат вредност и да останат во својата земја“, изјави Лабудовиќ.

„Нашата визија е едноставна – општина која не дели, туку спојува. Каде секој глас е слушнат, секој труд е вреднуван, и секој граѓанин чувствува дека припаѓа. Само така ќе создадеме Центар кој живее, дише и расте со сите нас,“ заврши Лабудовиќ.

Со овие системски решенија, Центар ќе стане модерна, праведна и човечна општина – општина што ги штити вредностите, го поддржува развојот и создава можности за сите, се додава во соопштението.