Онер Јакупоски, кандидат за градоначалник за општина Маврово-Ростуше од редовите на ВМРО-ДПМНЕ, на денешниот митинг одржан во рамките на изборната кампања, под слоганот „Вистинскиот избор! Твојот човек! Твоето место! За твојата иднина!“, се обрати и потенцираше дека време е да се врати надежта во општина Маврово-Ростуше и да стане општина која ќе биде сервис на граѓаните, каде младите ќе ја градат својата иднина.

„Денес стојам пред вас со јасна цел, да ја промениме нашата општина, да ја прекинеме летаргијата и апатијата, од нефункционална општина да направиме општина што ќе биде вистински сервис за сите граѓани и еднакви можности за сите. Време е да ја вратиме надежта, време е да создадеме општина, каде младите ќе градат своја иднина тука а не во туѓина. Ви ветувам ќе бидам гласот на народот, ќе работам со силна енергија и решителност да донесеме вистински промени во Маврово и Ростуше. Мојата програма не е само парче хартија, таа е програма која ги детектира сите проблеми во нашата општина, мојата програма претставува обврзувачки документ кој се потпира во пет столбови и тоа модерна општинска инфраструктура, туризам, дигитализирана општина, зелена чиста и енергетски ефикасна и петтиот столб, општина на културата и традицијата и мост за комуникација со дијаспората“, рече Јакупоски.

Јакупоски наброи дел од проектите на изборната програма и го потенцираше отворањето на нова општинска канцеларија која ќе биде центар за услуги на граѓаните, каде што ќе можат да ги подигнуваат сите потребни документи коишто се дигитализирани.

„Санација на спортската сала Македонија, предвидуваме изградба на нов мост под село Ростуше на регионалниот пат, како трет клучен проект за развој на туризмот предвидуваме изградба на пешачка и вело патека околу мавровското езеро. Ќе соработуваме со сите локални бизниси, хотели, со помош на вештачката интелегенција ќе воведеме многу новини, преку отворање на општинска канцеларија која ќе биде центар за услуги, каде што на едно место ќе можат да ги подигнат сите барани документи коишто се дигитализирани а сето ова ќе го направиме во тесна соработка со Министерството за дигитализација. Во иднина очекувам одлична соработка со раководството на националниот парк Маврово во делот на јавната чистота, со организирани акции да ги исчистиме дивите депонии настанати изминативе осум години. Во општинското комунално претпријатие ќе иницирам сериозни реформи и комплетна реорганизација“, посочи Јакупоски.

Две нови градинки и проширување на капацитетите на постоечките во општина Аеродром, ветува во својата изборна програма Александар Трајановски, кандидат за градоначалник на општина Аеродром од СДСМ.

„Еден од најголемите проблеми во нашата општина е недостатокот на слободни места во детските градинки. Родителите со години се соочуваат со листи на чекање за упис во градинка и преголеми групи на деца во градинките. Секое дете во Аеродром мора да има свое место во градинка. Тоа е еден од главните приоритети на кои ќе се посветам како иден градоначалник. Не нудиме неостварливи ветувања. Две нови современи детски градинки предвидовме за следните 4 години – една во Мичурин со капацитет од 300 деца и една во Ново Лисиче со капацитет од 150 до 250 деца. Овие градинки ќе бидат изградени по највисоки стандарди, со енергетски ефикасни објекти, целосна пристапност за лица со попреченост и со современи услови за престој, воспитание и игра. Со тоа отвораме повеќе од 450 нови места за децата во Аеродром, а дополнително проширување на постоечките градинки конечно ќе го решиме долгогодишниот проблем со недостигот на капацитети во градинките. Нашата цел е ниедно дете во Аеродром да не остане без место во градинка“, рече тој.

Современа противпожарна опрема за сите пожарникари и функционална хидрантска мрежа во Кочани ветува Владко Грозданов, кандидат за градоначалник на општина Кочани поддржан од ВМРО-ДПМНЕ.

„Во наредниот четиригодишен мандат, јас како кандидат за градоначалник, заедно со носителот на листата на советници, најавуваме зајакнување на капацитетите за заштита и превенција од пожари. Тоа значи грижа за граѓаните, шумите, инфраструктурата, односно безбедноста на целиот град. Набавка на современа противпожарна опрема за сите пожарникари, набавка на навално возило и противпожарни цистерни. Ревизија и оспособување на градската хидрантска мрежа, ревизија и оспособување на станбената хидрантска мрежа. Усогласување на бројот на вработени според законската регулатива“, рече тој.