Македонија
Одбележан Денот на ослободувањето на Прилеп

Со полагање свежо цвеќе пред спомениците на Методија Андонов-Ченто, Кузман Јосифоски-Питу, Могилата на непобедените и споменикот на Песјобрдце, Општина Прилеп го одбележа 3-ти Ноември, Денот на конечното ослободување на градот.
Градоначалникот Илија Јованоски, претседателот на Советот на Општина Прилеп, Миле Талевски, претставници на АРМ, боречката организација, политички партии и здруженија на граѓани, се поклонија пред загинатите борци и им оддадоа почит на сите учесници во четиригодишната Народноослободителна борба против фашистичкиот окупатор.
Честитајќи им го на своите сограѓани Денот на ослободувањето, градоначалникот Илија Јованоски истакна дека денешните, но и сите идни генерации, треба да ги почитуваат жртвите на борците за денешната слобода.
„Сакам да ви го честитам денешниот празник, 3-ти Ноември, кога после четиригодишната Народноослободителна борба беше ослободен нашиот град. Тука сме да се поклониме пред Могилата на непобедените, пред загинатите борци, кои ни оставија аманет да ја чуваме нашата држава и сите заедно да се бориме за подобар животен стандард, за поголем развој на нашиот град и за подобар живот на сите граѓани на Прилеп“, рече градоначалникот Јованоски.
„3-ти Ноември, Денот на ослободувањето од фашистичкиот окупатор, е еден од најважните датуми на Прилеп. Мотивот кој го имале нашите предци, да се изборат за слобода, независност и државност, нека биде поттик повеќе за сите нас, без разлика на нашата верска, политичка или било каква друга определба, да се избориме за економски просперитет. Да се избориме да бидеме рамо до рамо со најмоќните држави во светот, да бидеме членка на ЕУ и НАТО. Нека им е вечна слава на сите паднати борци кои ги дадоа животите за својата држава“, нагласи во своето обраќање Миле Талевски, претседател на Советот на Општина Прилеп.
„Се наоѓаме пред еден значаен споменик, Могила на непобедените, каде се наоѓаат останките на многу наши сограѓани и многу наши блиски кои ги дадоа своите животи за оваа слобода. Ние повозрасните се сеќаваме на настаните од 1944 година за конечното ослободување на Прилеп, кога се водеа жестоки битки меѓу партизанските единици веќе формирани во бригади, со германските војски. Во тие борби, храбро загинаа повеќе од 230 партизани. Како прилепчани, треба да сме горди што нашиот Град Херој ги почитува овие револуционерни традиции, а и младите генерации треба да бидат воспитувани во револуционерен дух, почитувајќи ги идеите на партизаните“, изјави Круме Соколоски, претседател на Општинскиот одбор на Сојуз на борци – Прилеп.
За значењето на денешниот ден, како и за завршните борби за ослободување на Прилеп, пред споменикот во месноста Песјобрдце, зборуваше историчарот Рубин Белчески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Злато во багаж и ботокс во торба запленети на граница

Царинската управа информира дека при контроли на неколку гранични премини се спречени обиди за криумчарење различни производи, меѓу кои златен накит, ботулински токсин, суплементи, цигари и обувки со заштитен знак.
На граничниот премин Богородица, мобилен царински тим заплени златен накит тежок 304 грама и вреден околу 1,3 милиони денари. Две патнички со македонско државјанство, кои патувале на релација Турција – Македонија, се сомничат за криумчарење, а против нив ќе бидат поднесени кривични пријави.
На Деве Баир, цариници открија 210 вијали ботулински токсин (DYSPORT и MASPORT 500) во патна торба на патник кој пристигнал со автобус од Истанбул. Супстанцата, која е под строг режим на увоз, била запленета, а лицето ќе биде кривично пријавено.
На Меѓународниот Аеродром Скопје, кај холандски државјанин се пронајдени 2.580 капсули суплементи „Afye“, скриени во куфер. Лицето се обидело да ја избегне контролата користејќи го зелениот канал.
При контрола на камион на Табановце, биле откриени 144 делови за земјоделски машини скриени во торби во кабината.
На Богородица, во фабричка празнина под приколката на празен камион-кипер биле пронајдени 21 штека цигари.
На преминот Дојран, запленети се 128 пара обувки со ознаки на заштитени трговски марки, пронајдени во товарно моторно возило натоварено со стока од Турција наменета за увозник од Косово.
На Аеродром Скопје, при контрола на пратка од Дубаи, биле откриени 74 ремчиња за смарт часовници кои не биле пријавени во царинската документација. Стоката е запленета, а ќе биде поведена соодветна постапка против увозникот.
Македонија
Синдикатот на новинарите бара зголемување на минималната плата: социјалниот статус на медиумските работници во земјата е на многу ниско ниво

Самостојниот синдикат на новинари и медиумски работници во време на општата дебата за висината на минималната плата недвосмислено е за зголемување на минималната плата. Ставот на ССНМ, како што појаснуваат, кореспондира со актуелните барања на дел од синдикатите и вели дека покачувањето е повеќе од ургентно. Корекцијата, како што напоменуваат е неопходна поради тоа што моменталната висина на минималната плата е недостојна за пристоен живот на работниците, меѓу кои и на новинарите и медиумските работници, чии интереси ги застапува ССНМ.
„Владата и синдикатите преговараат за финансиска иднина на работниците, иднина во која новинарите и медиумските работници не смеат да бидат одминати. Последната опсежна анкета на ССНМ објавена во јануари 2024 покажа дека во медиумите повеќе од 50 проценти од вработените имаат
примања под просечните, а голем дел од вработените се зависни од висината на минималната плата пропишана со закон. Со оглед дека платите во медиумскиот сектор речиси и да не поместени од мртва точка во изминатите две години може слободно да се каже дека три четвртини од ангажираните во медиумите сега се под просечната плата, а се повеќе се зголемува бројот на оние кои се на минимална плата. Поради фактот дека голем дел од вработените во медиумите се директно поврзани со висината на минималната плата, ние како легитимен претставник на работничките права на новинарите и медиумските работници, бараме што е можно побрзо нејзино покачување.
Социјалниот статус на новинарите и медиумските работници во земјата е на многу ниско ниво, а праксата досега покажала дека тој директно влијае врз степенот на мотивација, професионалност и посветеност што не смее да биде под знак прашање за тие што водат сметка за јавниот интерес во државата. Притоа нагласуваме дека во оваа професија неретко се случува луѓето да бидат истовремено ангажирани на повеќе работни места, за што најексплицитен пример се локалните медиуми, во кои вработените често се ангажирани и на по три работни позиции, најчесто на минималец, кој е, како што истакнавме, под секое ниво за достоинствен живот“.
Синдикатот на новинарите и медиумските работници кој претставува голем дел од вработените во овој сектор, бара и очекува од Владата и работодавците решение кое е во согласност со потребите на членството, што би значело висина на минималната плата на ниво на платите на колегите од земјите од регионот.
Пристојни плати на новинарите и медиумските работници значат и професионално новинарство, независно од центрите на моќ, и чувар на јавниот интерес и слободата на медиумите и изразувањето, велат од ССНМ.
Македонија
Во Рашче има приведени поради пукање на свадба

Две лица беа приведени вчера во скопското село Рашче поради пукање на семејна веселба.
„Околу 22 часот во СВР Скопје е пријавено дека се слушаат истрели во селото, по што веднаш се преземени соодветни мерки и активности и утврдено е дека Е.К. и Б.К. со гасни пиштоли пукале на свадба“, соопшти МВР.
Тие се приведени во полициска станица и по целосно документирање на случајот ќе бидат поднесени соодветни поднесоци.