„Цел на Владата на ВМРО-ДПМНЕ се инвестиции во модернизација на здравствените установи низ државата. Владата предводена од ВМРО-ДПМНЕ континуирано инвестира средства од централниот буџет за капитални инфраструктурни објекти во општините. Целта е општините да станат вистински сервис за граѓаните кои ќе испорачуваат навремени услуги“, велат од ВМРО-ДПМНЕ.

„Заложбата на Владата на ВМРО-ДПМНЕ е модерни, транспарентни и финансиски стабилни општини. Во таа насока реализирани се 94 проекти на Владата со локалната самоуправа.

По половина век општина Илинден доби нова здравствена установа, амбуланта во населено место Илинден која е во рамки на ЈЗУ Здравствен дом-Скопје. Преку соработка на Владата и локалните самоуправа се реализира проект кој е долго ветуван и неопходен за граѓаните на општината и околните населени места.

Со вкупна површина од над 600 квадратни метри, објектот е изграден на две нивоа според највисоките современи стандарди. Има можности како за примарни здравствени услуги така и за специјалистички. Во оваа амбуланта вложени се 16 милиони денари но заедно со придружната инфраструктура вкупната инвестициска вредност достигна 25 милиони денари.

Преку овој проект граѓаните ќе добијат квалитетни и навремени здравствени услуги.

Дел од проектите кои се реализираа во изминатиот период се: целосно реновиран одделот за ургентна инфектологија, и интензивната нега во Инфективната клиника.

Во Општата болница во Гостивар се реновираа неколку одделенија, како и во Клиничката болница во Тетово.

Се реновираше радиологија на Хируршките клиники, како и невролошката амбуланта во Детската клиника, интензивно се работи на клиниката КАРИЛ.

Преку соработка и на владата, општините и институциите се реализираат ветувањата со цел поквалитетен живот на граѓаните“, се наведува во соопштението на ВМРО-ДПМНЕ.

„Поминаа пет дена од јавно поставените прашања до Демократската унија за интеграција, а тие сè уште молчат. Ниту еден збор, ниту еден демант, ниту еден одговор. Пет дена ДУИ молчи колку и какви средби имал Бујар Османи со претставници на српските власти“, велат од „Влен“.

„Пет дена ДУИ молчи колку пати Бујар Османи бил приватно во Србија, без да ја информира јавноста?

Зошто толку тишина од една партија која тврди дека е „заштитник“ на евроатлантскиот курс и интересите на Албанците? Дали овој молк не е всушност потврда за сè што беше кажано?

Го прашуваме јавно Бујар Османи: Дали веќе започнал да соработува со ПР-стратезите на Александар Вучиќ? Дали ќе ја продолжи соработката со ПР-стратезите на Вучиќ што ја имаше претходната Влада на СДСМ и ДУИ? Дали Бујар Османи ќе ја добие поддршката од Белград како што ја добиваше и до сега? Дали зад сцената и понатаму се градат сојузи со Белград, додека на јавна сцена се симулира „патриотизам“?

Вистината не може да се скрие: ДУИ водеше дипломатија со Белград, не со Приштина. ДУИ се сликаше со Вучиќ, не со Курти.

Време е за одговори. Време е за транспарентност. Албанците не заслужуваат да бидат водени од луѓе кои градат тајни врски со центри на моќ што ги игнорираат нашите национални интереси.

ДУИ, не можете да се криете зад празни фрази. Народот веќе знае дека зад вратата на „европска дипломатија“ се кријат состаноци што мирисаат на „српски свет“. И тоа нема да го дозволиме!“, се наведува во соопштението на „Влен“.

„Демократска обнова на Македонија (ДОМ) остро се спротивставува на сè поопасната пракса на владејачкото мнозинство но и на опозицијата (партиите-коалиционери од поранешната влада), кои со едната рака доделуваат милиони евра за невладини организации, а со другата рака ги блокираат демократските механизми што би им овозможиле на граѓаните реално политичко учество. Со усвојувањето на Ребалансот на Буџетот за 2025 година, беа зголемени трансферите кон невладиниот сектор од 26,7 на 34,4 милиони евра, а во исто време нема никаква политичка волја за измена на Изборниот законик што би овозможил учество на независни кандидати на претстојните локални избори“, велат од ДОМ.

„Поддршката за граѓанските организации е важна и потребна, но добива сенка на партиска инструментализација кога се користи како параван за прикривање на партиципативната демократија. Во исто време кога се зголемуваат средствата за невладиниот сектор, граѓаните и граѓанките системски се блокирани да учествуваат како независни политички субјекти. Згора на тоа: кои се механизмите за надзор над потенцијалната злоупотреба на овие средства зголемени за 30% на три (3) недели пред објавувањето на локалните избори? Дали веќе се знае кои невладини (нечии миленици) ќе ги добијат тие средства?

Зелената партија ДОМ остро се спротивставува на оваа пракса, каде со една рака се делат милиони, а со другата се бришат граѓаните од картата на политичка партиципација.

ДОМ уште еднаш упатува јавно барање веднаш да се отпочне постапка за измена на Изборниот законик и да се обезбеди еднаква, фер и демократска можност за учество на независни и граѓански листи на локалните избори во 2025 година. И да не се лажеме: партиските мастадонти ќе си формираат свои прокси политички субјекти воочи локалните избори и ќе си „туркаат“ со своите миленици – и од тие причини веќе знаеме кој ќе биде одговорот на нашето барање…за жал!“, соопшти ДОМ.