Црна хроника
За еден ден повредени четворица пешаци
Четиринаесетгодишно момче е повредено во Кавадарци кога во него удрил автомобил што го возел 19-годишник. Уште тројца пешаци во Скопје и Штип настрадале во сообраќајни несреќи што се случиле во текот на вчерашниот ден.
Шеесет и осумгодишна жена е повредена во сообраќајна несреќа во Штип. Полицијата информира дека вчера во 15.50 часот било пријавено дека во Штип на крстосницата на улиците Ванчо Прке, Јосиф Ковачев и Кирил и Методиј, возило „фолксваген голф“ со штипски регистарски таблички, управувано од А.Ј. (63) од Штип, удрило во пешакот Д.С. (68) од Штип. Повредената жена со возило на итната медицинска помош била пренесена во Клиничката болница во Штип. Увид на местото извршила екипа од СВР Штип и се работи на целосно расчистување на случајот.
Седумдесет и тригодишна жена е повредена во сообраќајна несреќа во Скопје. Според полицијата, вчера во 7.30 часот во Секторот за внатрешни работи Скопје било пријавено дека на улицата Кемал Сејфула, возило „мерцедес вито“ со скопски регистарски таблички, управувано од Ј.Б. (48) од село Грчец, Скопско, удрило во пешакот Ж.Ш. (73) од Скопје. Таа со возило на итната медицинска помош била пренесена во Градската општа болница „8 Септември“ за укажување лекарска помош. Извршен бил увид на местото на настанот и се работи на целосно расчистување на случајот.
Во Секторот за внатрешни работи Скопје, вчера во 20.30 часот, било пријавено дека на булеварот Никола Карев, возило „форд фокус“ со скопски регистарски таблички, управувано од Д.А. (23) од Република Турција, удрило во пешакот В.Л. (65) од Скопје. По незгодата, со возило со итната медицинска помош В.Л. била пренесена во комплексот клиники „Мајка Тереза“, каде што ѝ биле констатирани тешки телесни повреди. Извршен бил увид на местото на настанот и се работи на целосно расчистување на случајот.
Малолетник на возраст од 14 години бил повреден кога во него удрил автомобил што го управувал 19-годишен возач, синоќа, во Кавадарци. Според полицијата, сообраќајната незгода се случила во 17.30 часот на крстосницата од улиците 7 Септември, Блажо Алексов, Браќа Џунови и Цано Поп – Ристов.
Автомобил „матиз“ со кавадаречки регистарски ознаки, управуван од Д.О. (19), удрил во 14-годишниот пешак. По сообраќајната незгода, повредениот бил однесен во Општата болница во Кавадарци, а потоа бил пуштен на домашно лекување. Полицијата извршила увид и ги утврдува причините за сообраќајните незгоди.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.