Македонија
Макрадули во Цементарницата „Усје“: Преку зголемена транспарентност и комуникација ќе ги лоцираме вистинските загадувачи
Заменик-министерот за животна средина и просторно планирање, Јани Макрадули, денеска, заедно со претставници на Државниот инспекторат, присуствуваше на отворениот ден на Цементарницата „Усје“ во Скопје, со цел, како што изјави, да придонесе кон транспарентната борба што се води за добивање реални податоци за тоа што се случува со загадувањето.
„Деновиве, сите екологисти и светски стручњаци се упатуваат кон Катовице на Светскиот самит за климатски промени, чиј темел или компоненти се: реалност, наука и предупредување. Сите активности што ние ги преземаме во рамките на планот за справување со загадувањето, односно планот за чист воздух, се базираат на реалноста, на науката и на предупредувањето“, изјави заменик-министерот Макрадули.
Тој истакна дека денешната посета на компанијата „Усје“ е со цел да се придонесе кон разбивање на стереотипите, кои се шират меѓу граѓаните за загадувањето, но истовремено изрази одлучност за продолжување на активностите во справувањето со изворите на загадувањето. Заменик-министерот Макрадули информира и за почнувањето на праксата на партнерски однос предводена од Светскиот економски форум за алијанса помеѓу владите и бизнис-заедницата.
„Вчера ја поканив Стопанската комора, очекувам компаниите што постојат во Република Македонија да се вклучат во заедничката акција на спроведување на планот за чист воздух и веќе имаме најави од неколку компании кои ќе се придружат, пред сè, во замената на нееколошките извори на затоплување во градинките, во основните училишта и во здравствените домови со еколошки извори на затоплување“, истакна заменик-министерот Макрадули.
Тој јавно упати апел и до преостанатите компании да го следат примерот на Цементарницата и да организираат отворени денови оценувајќи дека само на тој начин, преку зголемена комуникација и транспарентност, ќе може да се лоцираат вистинските извори на загадување за полесно отстранување на причините.
Заменик-министерот за животна средина потсети уште еднаш дека и според сите анализи во големите градови, како што се Скопје и Битола, главен причинител за аерозагадувањето е домашното затоплување.
„Уште еднаш да повторам: во Битола и во Скопје клучен елемент на загадувањето е домашното затоплување“, информира Макрадули и нагласи дека задачата на Владата е со средства од буџетот и со партнерство на компаниите да ги заменат овие нееколошки средства на затоплување на граѓаните што ги употребуваат поради социјалната состојба.
За РЕК „Битола“, заменик-министерот информира дека има почнато процес за третирање на пепелта, од 1 јануари ќе се заменуваат електростатските филтри што не биле заменети од 1980 година и кои ќе доведат до намалување на емисиите во согласност со усогласувањето на оперативниот план.
Генералниот директор на „Цементарница „Усје“, Борис Хрисафов, изјави дека со внимание ја следат загриженоста на јавноста во врска со состојбите во градот Скопје и со задоволство ги отвораат вратите на граѓаните да им ја доближат својата работа повикувајќи ги сите за заштита на животната средина со цел да се лоцираат вистинските причинители.
Директорот посочи дека компанијата ги почитува законските прописи и регулативи и наведе дека податоците од мерењата јасно укажуваат на фактот дека „Усје“ во целост ги исполнува законски предвидените услови и емисиите се во просек неколкупати пониски од законски дозволените концентрации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Лекарска комора одбележа 32 години постоење: Со заеднички напори да креираме подобри услови за работа на лекарите и лекување на пациентите
Лекарската комора одбележа 32 година од постоењето како самостојна и професионална организација на сите доктори на медицина во нашата земја на свеченоста организирана во „Куќата на уметноста“, во село Кнежино, во присуство на претставници на органите и телата на Комората, претставници на државни институции како и доктори од целата држава. Пригодни обраќања имаа претседателката на Комората, Калина Гривчева Старделова и заменик претседателот на Комората, Беким Исмаили.
„Времињата и околностите во кои живееме и работиме се турбулентни и променливи, но она што мора да биде нашата константа, како доктори, тоа е нашиот напор да се држиме до професионалното, стручно и квалитетно работење бидејќи само така ќе сме сигурни дека она што го правиме е токму тоа за што сме учеле и на што сме се обврзале. Комората останува да биде претставник на лекарите како и конструктивен партнер на креаторите на здравствените политики во креирање на подобри услови за работа на докторите и задржување на младите доктори во земјава, обезбедување достоинствени приходи и обезбедување на одржлив и квалитетен здравствен систем што претставува еден од основните сегменти на квалитетно општество. Верувам дека само заедно, со обединети сили, можеме да издејствуваме подобро утре и за нас, како доктори, и на нашите пациенти“, истакна Гривчева Стаределова во своето обраќање, давајќи пресек на активностите кои ги имаше Комората во изминатиот период.
Исмаили поблиску се осврна на измените во начинот на кој се полага стручниот испит, што почнуваат од јунската испитна сесија.
„Писмениот дел од испитот ќе се полага на компјутер, преку посебена програма што ќе генерира тест со испитни прашања и понудени одговори, а докторите ќе може да одберат дали ќе полагаат на македонски или на албански јазик. На интернет страницата на Лекарска комора е достапна обновената база на испитни прашања, со што докторите добиваат подобра поддршка за подготовка за полагање на стручен испит. Со новиот начин на полагање, целиот процес ќе се забрза бидејќи тестовите од писмениот дел нема да треба да се прегледуваат од страна на комисијата, што е особено важно за испитните сесии во кои има голем број кандидати. За реализација на оваа активности се набавија компјутери, се изработи посебен компјутерски програм, а се адаптираше и соодветен простор“, истакна Исмаили.
На настанот беше врачено највисокото признание што го доделува Комората, наградата „Св. Наум Охридски“ која ја доби Панче Арсов, интернист од Велес, со богато професионало искуство. Арсов претставува синоним за доктор кој посветено и одговорно се грижи за своите пациенти и несебично дава поддршка на колегите во секојдневната комуникација но и преку организираното дејствување во Комората и стручните здруженија.
Посебната награда „Примариус д-р Димитар Ивановски“ за тројцата студенти по медицина со највисок просек од трите медицински факултети, годинава ја добија Анастасија Петличковска – Медицински факултет, Универзитет Св. Кирил и Методиј – Скопје, Бојана Кацарова – Факултет за медицински науки, Универзитет Гоце Делчев Штип и Аљбина Рамадани – Факултет за медицински науки, Државен универзитет Тетово.
Плакетата за најдобар труд го доби трудот “Екстракорпорална фотофереза во третман на GVHD по алогена трансплантација на матични хематопоетски клетки”, чиј автор е Лазар Ј. Чадиевски и коавтори Александра Пивкова Велјановска, Сања Трајкова, Лидија Чевреска,Борче Георгиевски, Милче Цветаноски, Невенка Ридова, Симона Стојановска, Божидар Кочоски и Ирина Пановска Ставридис, сите од Оддел за трансплантација на хематопоетски матични клетки при ЈЗУ Универзитетска клиника за хематологија, Скопје.
Лекарската комора е формирана на 5 јуни 1992 година на иницијатива на неколку доктори од Македонското лекарско друштво. Првата конститутивна седница на Собранието на Комора е одржана во просториите на Воената болница. Во Лекарската комора во почетокот членувале доктори по медицина и доктори по стоматологија. Во 1995 година стоматолозите се издвојуваат и формираат нова Стоматолошка комора. Tриесет и две години подоцна Лекарската комора прерасна во почитувана, самостојна и независна професионална организација која е етаблирана на домашен и меѓународен план со свои јасни цели и јасна програма во рамки на промоција на правата на лекарите и унапредување на здравствениот систем.
Македонија
Лога со писмо ја известил меѓународната заедница за најавите за ,,упад” од парламентарното мнозинство врз правосудниот систем
Министерот за правда Кренар Лога испратил писма до Делегацијата на ЕУ во Северна Македонија, до амбасадите на САД, Германија , Франција, Холандија и Белгија, до мисијата на ОБСЕ во Скопје, Програмската Канцеларија на Советот на Европа во Скопје, до Стејт Департментот преку Амбасадата на САД во РСМ и до Европската Комисија во Брисел, во кое изразил загриженост за најавите на парламентарното мнозинство дека подготвуваат пакет закони со кои ќе се распуштат двете уставни и независни категории – Судскиот совет и Советот на јавните обвинители, известуваат од неговиот кабинет.
Лога во писмото пишува:
„Ценејќи ја Вашата досегашна континуирана поддршка изразена преку многубројните проекти и вложени средства, кои несомнено придонеле за реформските процеси, како и обезбедување на цврсти гаранции на владеење на правото, со вознемиреност и загриженост Ви се обраќам со ова писмо.
Во оваа прилика би сакал да Ве информирам и да го насочам Вашето внимание кон најавите за ,,упад”, кој се подготвува од парламентарното мнозинство во правосудниот систем. Паралелно со најавите за реформа на органите на управата и реорганизација на министерствата, владеачкото мнозинство соопшти дека подготвува и пакет закони со кои ќе се распуштат двете уставни и независни категории – Судскиот совет и Советот на јавните обвинители“, пишува Лога.
Изјавите од партиски функционери за мене лично и за Министерството за правда, како што појаснува во писмото, се неприфатливи и недозволиви не заради одбрана на поединци во овие органи, туку за независноста и непристрасноста на овие институции за кои имаме добиено извештај од Оценската мисија каде точно е наведено што треба да се преземе од страна на органите на државата за подобрување на состојбите во судството.
„Иако како министер за правда минатата година кога се случија настаните во Судскиот совет, јавно излегов со став за престанок на мандатот на членовите за кој не добив поддршка од коалиционите партнери ниту од опозициските партии, а исто така и по оддржани консултации со Ваши претставници, ми беше сугерирано дека Оценската мисија ќе ја скенира состојбата во Судскиот совет и ќе даде препораки за надминување на состојбите, за што добивме и Извештај. Препораките од Извештајот со особено внимание беа разгледани од највиските претставници на правосудната, академската и стручната фела, како и граѓанскиот сектор и останатите засегнати страни. Дотолку повеќе, што овие препораки се дел од најзначајните документи, како што се: Стратегијата за развој на правосудниот сектор, Патоказот за владеење на правото, како и Планот за раст. Дополнително, беше формирарана работна група за законски реформи на Судскиот совет каде во повеќе наврати беа поканети претставници на тогашната опозициска партија и сегашен носител на владејачкото мнозинство, ВМРО ДПМНЕ, на што не добивме повратен одговор.
Изразуваме сериозна загриженост што поставеноста на ваквата концентрација на моќ на трите власти кај една политичка партија ќе значи пресликување на состојбите и проблемите пред 2017 година, коишто неспорно создадоа заробена држава, констатирано во повеќебројни извештаи од меѓународните организации.
Ваквите најави се избрзани и опасни, и цениме дека од страна на владејачкото мнозинство треба да се почитува процесот на правилно креирање на политики кое вклучува оценка на состојбите и консултација за сите претстојни обврски и одговорности кои Република Северна Македонија ги има во договор со Европската Унија и останатите меѓународни партнери“, потенцирал Лога во писмото кое им го испратил на делегации на меѓународната заедница.
Македонија
ВМРО-ДПМНЕ: Стани Цаци, Јово грант, доктор тендер корона Филипче – нема кандидат за претседател на СДС што не е поврзан со криминал
„Иднината на партијата која и ја даде Македонија на тацна на ДУИ се состои во доктор тендер корона Филипче, стани Цаци и Јово грант.
Нема кандидат за претседател на СДС кој не е поврзан со криминал или неспособност“, велат од ВМРО-ДПМНЕ.
Додаваат дека Венко Филипче ќе остане запаметен како човекот кој како министер во ек на корона бркаше провизии од вакцини, по матните тендери за реагенси, набавките во четири очи и колабрираното здравство.
„Славјанка Петровска ќе остане запаметена по луксузната хациенда која ја криеше, и Ковачевски кој ја стануваше на сред митинг да ја видат сите која е.
Јово Деспотовски е директорот на ФИТР кој штанцаше грантови за се и сешто, истиот фонд од кој се делеа пари за обуки на магариња.
И Филипче и Петровска и Деспотовски се поврзуваат со криминалите и неспособноста на Заев и Ковачевски. СДС целосно да се реформира“, истакнуваат од ВМРО-ДПМНЕ.