Македонија
(Видео) Златески: Фудбалерите на Победа се како трговски патници, без стадион и без плати
,,Прилеп вчера по подолго време се израдува на спортски успех, а главните актери за тоа беа црвено-белите миленици од фудбалскиот клуб Победа. Затоа најпрво би сакал да им го честитам пласманот во полуфиналето во најмасовното фудбалско натпреварување кај нас, а тоа е фудбалскиот КУП на Македонија.
Фудбалерите на Победа се можеби единствените во светот кои оваа сезона настапуваат како трговски патници. Без стадион, од град во град, па уште и понижени и без заслужените плати и премии. Сепак, кога гладот и љубовта кон фудбалот се пресудни се стигнува и до ваков успех, и тоа против силен и економски моќен противник како Шкендија”, изјави Никола Златески на денешната прес-конференција на УМС при ОК ВМРО-ДПМНЕ Прилеп.
Според него, покрај ветувањето на актуелниот градоначалник Илија Јованоски дека Прилеп поскоро ќе добие стадион каков што заслужува, но и европски клуб со европски услови за работа, Победа оваа година ја поминува една од најтешките фудбалски сезони.
,,На градскиот стадион ‘Гоце Делчев’ подолг временски период не се извршуваат никакви активности, а локалните власти мачкаат очи во јавноста дека вината за тоа е кај претходната локална самоуправа предводена од ВМРО-ДПМНЕ.Па заборавате ли дека влеговте во втората година од вашиот четиригодишен мандат? Заборавате ли колку прес-конференции одржавте тука, на оваа локација?Го прашуваме Јованоски до каде е изборот на нов изведувач за изградба на стадионот?Каде е сега Јованоски да побара од советот на општината премија од еден милион денари, како што тоа го правеше кога СДСМ беше опозиција во Прилеп?Спортот, а особено фудбалот бара континуирано вложување, а со вашата несериозност го доведувате пред згаснување. Победа е повеќе од клуб, таа е љубов на прилепчани. Победа е емоција и радост на многу генерации. Клубот заслужува многу повеќе и заслужува да биде издигнат на повисоко ниво.
Прилепчани стравуваат дека нивниот миленик одново ќе го гледаат во понизок ранг на натпреварување, а вината за тоа ќе биде само ваша. Младите ве повикуваат итно да се зафатите со работа и да го консолидирате работењето на клубот. Победа не смее да биде жртва на вашата неумешност и незнаење.Почитуван градоначалник, прилепчани не се со кратко помнење, тие ги паметат сите ваши грандиозни ветувања. Времето во политиката поминува многу брзо, па казната за неисполнетото ќе ве стигне како молња. Ќе заминете како најнеуспешниот градоначалник и најнеуспешната локална власт во историјата на Прилеп”, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ за Димитриевски: Ароганција е кога човек-партија одработува против своите довчерашни сопартијци
Ароганција е кога човек-партија одработува против своите довчерашни сопартијци и во тоа нема ништо социјалдемократски ниту вредносно туку единствено и само личен интерес, реагира СДСМ по обвинувањата кои ги упати Максим Димитриевски од ЗНАМ, дека дозволиле отварање на бугарски клубови во Македонија и нивната ароганција е ненадминлива.
„За тоа кој ги отвораше клубовите со имиња како Ванчо Михајлов адресата е Белиот дворец на ДПМНЕ. Многу позната адреса каде ЗНАМ ги договара идните чекори за соработка заедно со поддршката на Гордана Силјановска Давкова.
Освен сликите на Ванчо Михајлов по штабовите на ДПМНЕ доволно говорат сликите на Мицкоски со основачите на тие клубови по манастирите низ државава за кои не слушнавме ниту збор од ЗНАМ.
Дали е тоа поради враќање на стари долгови за локалните избори 2021 година во Куманово или нови долгови јавноста ќе види многу скоро“, се вели во реакцијата на СДСМ.
Македонија
Утревечер и во петок нестабилно време со пороен дожд и грмежи
Времето утре ќе биде променливо облачно.
Од пладневните часови на повеќе места ќе биде нестабилно со пороен дожд и грмежи, локално во форма на краткотрајно невреме со засилен ветер и услови за изолирана појава на град. Услови за пороен дожд ќе има во текот на ноќта. Минималната температура ќе биде во интервал од 6 до 12, а максималната ќе достигне од 18 до 25 степени.
Во Скопје променливо облачно. Од пладневните часови во делови од котлината ќе биде нестабилно со пороен дожд, грмежи, засилен ветер и услови за изолирана појава на краткотрајно невреме. Минималната температура ќе се спушти до 12, а максималната ќе достигне до 23 степени, јавува УХМР.
Во наредните денови, следува период на променливо облачно време со повремени локални врнежи од дожд. Утре, во ноќта кон петок и во петок на повеќе места ќе има развој на нестабилна облачност проследена со пороен дожд и грмежи, локално во форма на краткотрајно невреме со засилен ветер и услови за изолирана појава на град.
Дневната температура од утре до сабота ќе биде во постепено опаѓање, а во недела ќе се покачи за 2 до 4 степени..
Македонија
Пендаровски: Не велам дека Европската преговарачка рамка е во ред, ама е договорена од 27 држави – ние или ја прифаќаме, или ја одбиваме
Во вечерашниот телевизиски дуел помеѓу двата претседателски кандидати, Пендаровски се осврна на неговиот концепт за напредок на државата, за кој, како што рече е победнички. Притоа нагласи дека се исполнети трите столба од неговата предизборна програма од 2019 година.
„Клучните столбови на мојата програма во 2019 година беа влез во НАТО, отворање на преговори со ЕУ и стабилни меѓуетнички односи – триаголникот на успехот и стабилноста, просперитетот на државата, тоа сум тврдел и ќе тврдам. Ако ова не е остварено кажете ми – членка на НАТО, почнати преговори и меѓуетнички односи кои не се идеални, меѓутоа се далеку од она што беше во времето на режимот“, рече Пендаровски.
И програмата за работа во вториот мандат, продолжи Пендаровски е заснована на реални основи, а не на фикции.
„Јас не тврдам дека оние кои го потпишале Преспанскиот договор треба да завршат во затвор и дека треба да бидат кривично одговорни. Јас тврдам дека тоа е добар договор кој ги штити македонските национални интереси. Госпоѓата тврди спротивно. Таа денес вели добро е што влеговме во НАТО, имаме гарантор на безбедноста, ама пред три-четири години во интервјуа вели треба кривично да бидат гонети тие луѓе. Јас не велам дека Европската преговарачка рамка е во ред, ама имаме проблем со другите аспекти. Европската преговарачка рамка е договорена од Европа, од 27 држави и ние или ја прифаќаме, или ја одбиваме“, додаде Пендаровски.
На прашањето зошто граѓаните да го дадат својот глас за него, Пендаровски упати јавен повик до сите граѓани кои ги поддржуваа кандидатите кои испаднаа во првиот круг и до оние кои воопшто не учествуваа во првиот круг, да гласаат за неговиот концепт доколку се препознаат во него.
Во однос на партиската и граѓанската поддршка, тој посочи дека во трката за нов претседател на државата, обајцата велат дека ќе бидат независни од кои било центри на политичка и економска моќ и притоа собирале граѓански потписи за да покажат дека имаат сила, граѓанска компонента за претседателската кандидатура.
„Госпоѓата Силјановска ги отфрли тие 20 и нешто илјади потписи колку и да беа и отиде само со потписи на пратениците. Сосема е логично партискиот лидер кој ја предложи за кандидатурата, да договара поддршка со другите партиски лидери за неа во вториот круг. Бидејќи не е граѓански поддржана, туку од партиите, логично е дека партискиот лидер ги прави тие меѓупартиски, меѓулидерски договарања“, истакна Пендаровски.