Македонија
Народен правобранител:Да ги елиминираме дискриминацијата, тортурата, нехуманиот третман

На 10 декември пред 70 години, земјите членки на Обединетите нации одлучија на хартија да ги стават постулатите на човековите права и тој документ да го наречат Универзална декларација за човековите права. Сигурен сум дека во тој момент предвид ја земале нивната универзална димензија. Од тогаш овој ден симболично се одбележува како Меѓународен ден на човековите права, како ден кој служи како потсетник дека секое човечко суштество заслужува почит, достоинствен живот и еднаков третман.
Секој, Секаде, Секогаш. Ова, накратко се главните постулати на Декларацијата која низ годините стана составен дел од голем број на домашни и меѓународни документи. Таа стана основа за еднаков третман на луѓето без разлика на која раса, вера и националност и припаѓаат. Каде живеат, во која ситуација се наоѓаат.
Еднаквоста, стана основно правило на владеење на сите држави и тоа како за нејзините државјани, така и за странците, бегалците/мигрантите, азилантите. Правото, правдата, еднаквиот пристап до сите добра станаа основно правило на живеењето во најголемиот дел од светот. Но, за да се дојде до сето ова требаше да поминат години, да се извојуваат многу битки. Мартин Лутер Кинг да го „отсонува својот сон“, Роза Паркс да докаже дека бојата на кожата не ја прави помалку вредна да биде во предниот дел од автобусот, Нелсон Мандела да стане симбол на борбата против апартхејдот, соопшти Народниот правобранител.
Ова е само мал дел од историјата за борбата за еднаквост, која за жал и денес, после 70 години се уште се води во одредени делови од светот. Денес, во 21 век, во времето на дигиталната технологија, за жал и понатаму има земји каде жените и децата не се третираат еднакво, каде пристапот до чиста вода и електрична енергија е луксуз, каде се водат најпримитивни војни поради кои илјадници луѓе се приморани да ги напуштат своите домови и да го добијат статусот на бегалци/мигранти.
,,Денес, е добар повод ние бранителите на човековите права уште еднаш да ја потврдиме својата цврста заложба да работиме на промоција и унапредување на човековите права. Да работиме сите под еднакви услови да можат да си ги остварат своите со устав и закон загарантирани права. Да ги елиминираме дискриминацијата, тортурата, нехуманиот третман, да помогнеме во создавањето на услови за еднаков пристап до правото и правдата за сите. Да помогнеме децата да имаат среќно и безгрижно детство, квалитетно образование. Да докажеме дека потребата од родова еднаквост е минато. Всушност тоа е и наша основна задача, како адвокати на народот, максимално да се заложиме за нивните слободи и права.
Од овие причини, упатувам апел до властите, институциите доследно да ги спроведуваат законските прописи да овозможат еднаков третман за сите, затоа што само така ќе можеме да кажеме дека навистина сме изградиле Едно општество за сите”, се додава на соопштението од канцеларијата на Народниот правобранител.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Потпишан Меморандум за соработка помеѓу Македонија и Италија за користење на ЕУ фондови

Во рамките на официјалната посета на Република Италија од делегација на Националната агенција за европски образовни програми и мобилност, предводена од Петар Богојески, во Рим беше потпишан Меморандум за соработка помеѓу македонската и италијанската Национална агенција, предводена од Федерика Целестини Кампанари.
Овој стратешки документ претставува темел за унапредување на билатералната соработка во областите на образованието, науката, младите, спортот и културата, со што се отвораат нови перспективи за директна поддршка на македонските универзитети, училишта, младински организации и компании преку европски фондови од Брисел, чии финансиски капацитети се значително повисоки од оние кои се достапни преку националните програми.
Потпишувањето на ваков документ со една од основачките и водечки земји-членки на Европската Унија, Италија, претставува чин од особена важност за Република Македонија. Истовремено, тоа е јасен сигнал за проширување на европската солидарност и зацврстување на меѓусебната доверба и партнерство на полето на образовниот и научниот развој.
Со овој договор, корисниците од Република Македонија ќе добијат непосреден пристап до институционални мрежи, програми и партнери од Италија, со можност за заедничка реализација на проекти и иницијативи од европски ранг.
Ова партнерство претставува уште еден чекор напред во заложбите на Националната агенција за создавање нови можности за македонските граѓани, во духот на европските вредности, меѓународната соработка и одржливиот развој.
Националната агенција изразува длабока благодарност до италијанските домаќини за топлиот прием и за визионерскиот пристап кон заедничката европска иднина на нашите млади генерации.
Македонија
Ѓорѓиевски: Награди за талентираните ученици

„Кисела Вода изобилува со талентирани ученици, на што сме исклучително горди! За таа цел, објавен е јавниот повик за доделување на награди на талентирани ученици и спортисти од основните училишта на територијата на Кисела Вода, што претставува еден стимул за нивното понатамошно градење како личности“, велат од Општината.
„Имено, се работи за Јавен повик за пријавување на најдобрите основци кои, постигнале одлични резултати на натпреварите во образованието, културата, науката и спортот кои ќе добијат финансиска поддршка, а мешовити комисии составени од претставници на Советите на родителите, наставничките совети, општинската администрација итн, ќе се погрижат за објективен и транспарентен избор на најдобрите, согласно Правилниците донесени од страна на Советот на општината, за таа намена.
Огласот е објавен на веб страната на општината и ќе трае пет дена од денот на објавувањето, а покрај објавата на општинската веб-страна и социјалните медиуми, истиот ќе биде објавен и на огласните табли на сите воспитно-образовни установи во општината.
Ги повикуваме сите заинтересирани кандидати кои ги исполнуваат условите наведени во огласот, да не се колебаат и да земат учество во изборот“, се додава во соопштението на Општината.
Јавниот оглас и потребните документи за апликација може да ги најдете на следниот линк
Македонија
(Фото) Герасимовски во Капиштец: Вложуваме во квалитетен живот на центарци, програмата заедно ќе ја пишуваме

Општина Центар, синоќа го почна караванот „Се гледаме во маало со Горан Герасимовски“ во населбата Капиштец.
Герасимовски, како што соопштува Општината, во интерес на транспарентноста и решавање на проблемите на центарци, во следните три недели ќе ги посети жителите и заеднички ќе дискутираат за проектите што се спроведуваат, но и ќе ги сослуша сите проблеми и идеи со кои ќе се креира новата четиригодишна програма за уште поубав Центар.
Пред жителите на Капиштец, Герасимовски информираше дека програмата за работа мора да произлезе од центарци, затоа што само така може општината да работи во интерес на граѓаните. Тој истакна дека во завршна фаза е реконструкцијата на паркот во Капиштец на површина од 7.800 м², кадешто има ново зеленило, нови патеки, урбана опрема и ЛЕД осветлување.
„Вложуваме во сè што значи квалитетен живот. Паркот во Капиштец целосно го обновивме и хортикултурно го уредивме, со нови дрвја, клупи и осветлување. Инвестираме во нова инфраструктура, ги реконструиравме улиците „Козара“, „Шарски Одред“ и го реконструиравме тротоарот на ул. „Народен Фронт“. Детското игралиште кај трговскиот центар „Зебра“ и спортското игралиште на ул. „Народен Фронт“ ги обновивме. Можам да кажам дека ги подобривме условите во целата населба. Пензионерите добија свој пензионерски клуб во Капиштец кадешто секојдневно се дружат и социјализираат“, рече Герасимовски.
Герасимовски, потенцираше дека се расчистени дивите депонии спроти Католичка црква и на ул. „Народен фронт“. „Општинските служби секојдневно се грижат за хигиената на општината, чистејќи го и сметот, но и дивите депонии. Изминатиов период, ЈП „Комунална хигиена“ потфрли во чистењето на контејнерите на територија на Центар поради што спремаме и кривични пријави. Недозволиво е централното градско подрачје да изгледа вака поради пропусти на градската власт“, посочи Герасимовски.
Караванот „Се гледаме во маало со Горан Герасимовски“ продолжува и денеска, на средби со центарци во Дебар маало, кај клупата на Горан Стефановски, со почеток во 18.30 часот.