Премиерот Зоран Заев се сретна со делегација на меѓународниот комитет на Црвениот крст (МКЦК) во состав Јелена Стијачиќ, шеф на регионалната делегација на Црвениот крст, Николас Флори, оперативен координатор за Европа и централна Азија, и Даниела Малијанска-Митевска, претставник на МКЦК во Македонија.

Како што информираат од владината прес-служба, на средбата се разговарало за состојбите во областа на човековите права и условите во затворите во земјата, како и третманот на затворениците.

На сoстанокот Заев истакнал дека соработката со МКЦК е од посебна важност за реализирање на зацртаните реформи во одредени области во општеството.

„МКЦК има капацитети со кои не секогаш располага државната администрација од причина што искуството и капацитетите на МКЦК се од меѓународни размери и градени врз волонтерство и поради тоа, соработката на институциите на Република Македонија со оваа меѓународна организација е од исклучителна важност да се продлабочи“, истакнал Заев.

Премиерот исто така потенцира дека Владата веќе презема конкретни чекори за подобрување на условите на затворениците во затворите преку инвестирање во реновирањето на македонските затвори за што од голема помош, како што рекол, биле и претходните извештаи од МКЦК и други релевантни европски и светски организации.

Претставниците на МКЦК од Заев побарале поддршка за олеснување дел од процедурите за посета на затвореници од страна на претставниците на МКЦК бидејќи во моментот за секоја посета мора да се добива дозвола од надлежен судија.

За оваа тема тие најавиле и средба во широк состав со македонските судии на која ќе ги презентираат своите предлози и идеи за подобрување на македонскиот казнено-поправен систем, како и за условите во кои престојуваат затворениците базирани врз меѓународните искуства на МКЦК.