Градоначалникот Горан Герасимовски вчера беше говорник на панел-дискусија ,,За посигурна иднина на животните: Законски промени сега!” организирана од Либерален институт – Скопје. На панел-дискусијата се разговараше за потребата од итни и системски решенија кои ќе овозможат подобра заштита и грижа за животните.

„Општина Центар активно ја имплементира политиката „Залови – Стерилизирај, Вакцинирај, Врати“ во соработка со ЈП „Лајка“, со годишен буџет од 2 милиони денари. Признаваме дека е потребен дополнителен ангажман за да се зголеми ефикасноста на оваа политика, а токму затоа планираме нови активности. Проблемот е на ниво на Град Скопје и сите скопски општини. За да имаме целосно решение, потребна е пообемна стерилизација. Не велам дека ова целосно ќе го реши проблемот. И понатаму ќе има бездомни кучиња, но сигурно ќе се намали нивниот број.
Сите општини треба навремено да ги подмируваат трошоците кон ЈП „Лајка“. Граѓаните имаат право да знаат зошто плаќаат и што добиваат за тоа што го плаќаат. Колку кучиња се заловени? Колку се вакцинирани? Како се третирани? Бараме конкретни статистики за да видиме што сме добиле за парите што ги вложуваме, особено кога некои општини не плаќаат, а други го носат целиот товар” изјави Герасимовски.

Во подготовка е програма за субвенционирање на стерилизација на домашни миленици, по примерот на успешната пракса од Општина Гази Баба. Преку оваа програма, ќе им се овозможи на сопствениците на миленици полесен пристап до стерилизација, со што директно ќе се влијае врз намалување на бројот на бездомни животни – најчесто последица од неодговорно сопствеништво.

Стерилизацијата не само што придонесува за контрола на популацијата, туку и го намалува ризикот од агресивно однесување кај животните.

Општина Центар работи и на координирани активности со соседните општини за справување со проблемот на глутници бездомни кучиња кои се пренесуваат од една општина во друга. Заеднички акции и образовни кампањи ќе бидат клучни за долгорочно и одржливо решение.

,,За да дојдеме до вистинско решение, мора сите да бидеме совесни како градоначалници на сите 10 скопски општини и редовно да го покриваме трошокот кон ЈП „Лајка“. Дополнително, ја отворивме темата и во рамки на Скопскиот плански регион, каде што разговараме за потребата од зголемен број стационари и други системски решенија. Не смее да се случува, како што веќе беше спомнато, кучиња од една општина што не ги третира проблемите, да завршуваат во друга. Тоа не е решение, само го префрламе проблемот од една на друга општина. Очекуваме позитивен одзив од граѓаните, затоа ги охрабруваме сите сопственици на миленици да се вклучат и да придонесат кон похумано и побезбедно урбано живеење”, истакна Герасимовски.

Министерот за внатрешни работи Панче Тошковски присуствуваше на граничниот премин „Блаце – Елез Хан“ на кој во присуство на премиерите на Македонија, Христијан Мицкоски и Косово, Албин Курти и министерот за внатрешни работи на Косово, Џелал Свечла и делегации од двете земји, свечено беше пуштен во употреба системот на заеднички гранични проверки „One Stop Shop“.

Министерот Тошковски во своето обраќање потенцираше дека обврска на институциите е со својата работа да го унапредуваат квалитетот на животот на сите граѓани и со пуштањето во употреба на овој систем се отвора нова ера на побрз транспорт на стоки и повеќе трговија, повеќе туризам, повеќе дружба и поголемо пријателство.

„Ова е резултат на договорот меѓу двете влади и Протоколот што го уредува начинот на гранични и царински контроли, инфраструктурата, размената на податоци и поделбата на трошоци. Целта е јасна – побрзо, поедноставено и побезбедно преминување на границата. За патниците тоа значи една проверка наместо две, пократко чекање и подобро искуство, а за службите – поефикасна работа, подобра координација и посилна борба против незаконски активности.“, потенцираше министерот Тошковски.

Тошковски подвлече дека овој граничен премин е еден од најфреквентните во државата со повеќе од четири милиони патници годишно и дека со неговата имплементација отвораме ново поглавје на поврзаност – побрз транспорт, повеќе трговија, туризам и пријателство меѓу двете држави.

На граничниот премин Долно Блаце – Елез Хан профункционира заедничката гранична контрола (One Stop Shop). Со нова физичка и дигитална инфраструктура е воспоставен систем кој овозможува само едно застанување и една пасошка контрола.

Премиерот Христијан Мицкоски рече дека осовременувањето на граничниот премин е отворање на нова перспектива за граѓаните, стопанството и за регионот.

„На најдобар начин покажуваме дека границата не мора да биде ѕид, границата може и треба да биде наш заеднички мост, кој поврзува луѓе, идеи и можности, преку кој се зборува за доверба, соработка, економска соработка, развој на културата и туризмот“, кажа премиерот.

Оваа заедничка гранича точка, рече Мицкоски, не е само премин помеѓу двете држави, туку премин кон европските вредности на соработка, интеграција и на слободно движење.

Косовскиот премиер Албин Курти посочи дека по подолг период ангажманот и посветноста резултирале со проект од голема важност за граѓаните на Македонија и на Косово.

„Отсега па натаму, граѓаните ќе бидат проверувани само при влез во земјата, а податоците ќе се разменуваат во реално време преку современиот технолошки систем. Само во 2024 година над пет милиони граѓани ги поминале трите гранични премини меѓу двете држави, што укажува на врската меѓу нашите граѓани, но и потребата за слободен и брз проток на луѓе и стока“, изјави Курти.